Wednesday, 16 May 2012

ခရမ်းရိပ် အနုပညာမဂ္ဂဇင်း { မေ ၂၀၁၂ }

with 0 comments




                                                                                      ကဗျာ




မနိုင်ဝန်ထမ်း၍ပိပြားသေဆုံးခြင်း။သတင်းအစုံအလင်မှာ
_______ မှူးေ န ဝ န်း ____________________

ငါ့ကိုဘာများမှတ်နေလဲ။ အိမ်မပြန်ချင်သေးဘူးကွာ ဒီည
အပြတ်ကဲမယ်။ ကျွန်မသမီးလေးက ဘာသာစုံဂုဏ်ထူးလေ..ဟင်းဟင်း။
အမဲရိုးနှယ်ဟင်းအိုးမှအားမနာ။ ခင်ဗျားမှာ Standard မရှိဘူးလား။ နေနှင့်ဦး
ပေါ့ကွာ။ ဟေ့ မင်းဘယ်ကကောင်လဲ မင်းကိုမမြင်ဖူးပါဘူး မင်းဒီနားကို
ဘာလာလုပ်တာလဲ။ ရောမရောက်ရင် ရောမလိုကျင့်ရတယ် သူငယ်ချင်း။
ဒီကိုနောက်ထပ်တစ်ပိုင်းဟေ့။ တစ်ကွက်ကျော်မြင်တတ်ရတယ်ကွ။
ဦးက မီးလေးကို ဂရုမစိုက်တော့ဘူး.. ဘာလဲအချစ်လျော့သွားပြီလား။
ဝင်ခွင့်ပြုပါဆရာ... ကျွန်တော်တို့ပါ။ သံသယထားတာမမှားဘူး ကိုယ့်လူ။
တောက်.. ငါ့မျက်နှာကိုအိုးမည်းသုတ်တဲ့ကောင်ကွာ။ နင့် (၅၀)သားထုပ်ကလည်း
အလေးပြည့်ရဲ့လားအေ။ ဒီမိုကရေစီ၊ လူ့အခွင့်အရေး ၊ လွတ်လပ်စွာ ထုတ်ဖော်
ပြောဆိုခွင့်။ ယုံကြည်မှုကြောင့် မိမိကိုယ်ကို အကျဉ်းချခြင်း။ ဟေ့ ပန်းရံဆရာ
အလှူရှင်နာမည်ကို သေချာထွင်းနော်.. မမှားစေနဲ့။ အမလေး အစ်ကိုရဲ့
ရှင်မရှိရင် ကျွန်မလည်းမနေဘူး.. လိုက်ခဲ့မယ်တော့။ ပိုစ့်မော်ဒန်တွေကွ
နားမလည်ရင်မဖတ်နဲ့ ။ မင်းရက်စက်တယ်အသည်းရယ်။ ဒီစားပွဲမှာ
ဝင်ထိုင်ဖို့ ခင်ဗျားရဲ့ ရှူးဖိနပ်ကိုပြောင်အောင်သုတ်လိုက်ပါဦး မစ္စတာ။ ။


                    -----------------------------------------------------------------------------




အတူတကွသက်တည်ခြင်းဟာ ဗီဇရဲ့ဖရိုဖရဲအဖြစ်မှာ/သာ ထင်ပါရဲ့ မောင်
________ ဂျူ နို _______________________________________


မဖြစ်သင့်ဘူးမှန်း သိသိရက်နဲ့ ဘုရားသခင်ဘာလုပ်နေပါလိမ့် လေစီးကြောင်း အေးခနဲမှာ ဆံစတွေ လွင့် ဖွာ ထွက်သွား---

သိပ်လှတာပဲ စကားတစ်ခွန်း ဘယ်သူ့ဆီကမှန်းမသိထွက်ကျလာတယ်နားစည်ကြားမှာခိုအောင်းနေတဲ့အလှအပတစ်ခုက
 နောက်ဆုံးအကြိမ်အဖြစ်လွှင့်ထုတ်လိုက်တယ်(ထင်ရဲ့) masterpiece (လို့) ယူဆရပါတယ်မောင် 
 လေအေး/နွေးစီးကြောင်းနဲ့အတူ ပရမ်းပတာလွင့်ထွက်သွားတဲ့ ကျွန်မဆံပင်တွေ နောက်-- မောင့်ဆံပင်တွေ နှစ်ဦးသဘောတူ 
သဘောကျမိခဲ့ကြ အတူတကွ/ဝေးလွင့်ခြင်း/ဖရိုဖရဲဖြစ်ခြင်းကို ခြေချ/ကြွကတည်းက သဘောကျမိခဲ့ကြ
ကျွန်မကြောင့် ရေခဲတောင်တွေ ပွတ်တိုက်ပြတ်ထွက်ကြတဲ့အခါ သိပ်ပျော်စရာကောင်းမယ်ထင်ပါရဲ့မောင်
မောင်ဟာ သန်းခေါင်ကျင်းမှ ထ ထတွန်မယ့် တိန်ညင်တစ်ကောင်လည်း ဖြစ်နိုင်တာပဲ စိတ်လိုလက်ရပြောပြတဲ့အခါ 

မောင်စိတ်ကောက်မယ် knock knock
ဒီမူကွဲတွေအတွက်ကိုပဲ ကျွန်မတို့ပြင်ဆင်ခဲ့ကြတာမဟုတ်ဘူးလားမောင် ဒါဟာပြဿနာလို့ မထင်တတ်တဲ့အခါ အနီးဆုံးခရီးဟာ 

ေ ဝး ကွာ ခြ င်း သာ ဖြ စ် လာ ဤခရီးနီးသလား ဒီအရွယ်တွေလည်း မဟုတ်တော့ပါဘူးမောင် လို့ဆိုတော့ ထပ်ဆို 
ဤခရီးနီးသလား မနက်ဖြန်သတင်းစာမှာပါလာမှာပေါ့ အဖြေဟာ ဒီ SIM card ကြီးကိုပဲ ကမ္ဘာ့အပြင်တစ်နေရာရာ လှေ့ 
ထုတ်လိုက်ရမလား ဝမ်းဗိုက် ဝဲဘက်တစ်ခြမ်းလုံး ထုံကျင်ကြေမွလာတဲ့အခါ မောင့်နာမည်ကို မခေါ်မိတော့ဘူး ဒီလိုပါပဲမောင် 
အမြင့်ဟာအနိမ့်ကို တစ်ခါတစ်ရံမှာလည်း အနိမ့်ဟာ အ မြင့် ကို ဝမ်းသာစရာပါပဲ
ဒါလူနေမှုဘဝပါပဲ လောကဓံကို မောင်မုန်းမှာထက် ပိုကြောက်လာတတ်ခဲ့ တစ်ခြမ်းသောနေရာမှာ မောင် ဆက် လက်မှတ်ထိုးပါ ဒီလိုအခါမျိုးမှာ မောင့်နာမည် အော်မခေါ်မိတော့ဘူး
ခိုးခိုးခစ်ခစ်ရယ်သံတစ်ချို့နဲ့ အဝတ်အစားတွေ ခုတင်ခြေရင်းဘက် ခြေကန်ထုတ်လိုက်တယ် ဒါဟာပျော်ရွှင်မှုပါလို့ 

လက်ဝါးချင်းရိုက်ခဲ့ကြ ဒါဟာအချစ်ပါလို့ နှုတ်ခမ်းဖျားချင်း ဖိအပ်ခဲ့ကြ နယ်မြေသစ်ဟာ ဗျာဒိတ်တော်နဲ့အတူ 
ပိတ်မိနေပြီမဟုတ်လားကွယ် ကပ်ကိုမှ ဆာလောင်ခဲ့ကြ ဒီလောက်ဆို စောင့်ကြည့်ရမည့်သူများစာရင်းမှာ ပါလာနိုင်မလား မောင်။ 
ဒီလိုလည်း ခပ်လှောင်လှောင်တွေးမိပါရဲ့။ ပေါင်းစပ်ခြင်းဆိုတာ ချုပ်ရိုးပေါက်ခံလိုက်ရတဲ့အဝတ်စနှစ်ခုလို တစ်သားတည်း။ အဓိပ္ပါယ် -- အပြုံးဟာရာသီဥတုမှာတော့ လှောင်ပိတ်မိနေဆဲ။ နွေငွေ့က ဒီအခန်းကနေ တခြားသွားစရာမရှိဘူးမဟုတ်လား။ ဒါကိုပဲ 
လှောင်ပြုံးလို့ခေါ်လေသလား မ သိ ။
ကြိုတင်ကာကွယ်ခွင့်မရှိခဲ့တဲ့အရာတွေအတွက် ကျွန်မတို့ ဘယ်လိုမှ ၀မ်းမနည်းကြေး မောင် ။ ကွာ.. စောစောစီးစီး 

အကုသိုလ်တွေ အထွေးလိုက် အပွေ့လိုက် တဖဲ့ချင်းစီ သယ်နေမိတော့တာပဲ
ဖတ်လက်စ စာမျက်နှာဟာ Supernova ကျွန်မလက်မှတ်ထိုးပြီးပြီ မကြည့်ပါနဲ့မောင် အဲ့ဒီလိုမကြည့်စမ်းပါနဲ့ ကွယ် 

အံ့သြစရာဆိုတာ ဒီလောကထဲရှိသေးလို့လား ကလေးရဲ့ ဟောခနဲ ဟောခနဲ မြန်နှုန်းကြိမ်နှုန်းတွေစိပ်လာတဲ့ အသက်ရှူသံဟာ 
လက်မှတ်တစ်ချက်လောက်မခက်ခဲ (မှန်းသိပြီး) ဒီလိုနဲ့ဓားဖျားပြန်ပိတ်ခဲ့ရတာပါကွဲ့ အဟက်ဟက် 
 ကောက်ရိုးမျှင်ဆိုတာလည်းမရှိခဲ့ဘူး အပ်ချည်စလေးဟာ ရှိတ်ပ် ခနဲ မီးလောင်ရာလေပင့်တဲ့အခါ မောင် အောက်စီဂျင်
(၁)ဆ ဖြစ်ပါမောင် ပန်းခင်းလမ်းလည်း ဖိနပ်မပါရင် မလျှောက်ရဲဘူး မောင်လည်းဤသို့သာပဲ ကျွန်မနားလည်တာပေါ့မောင် 

ပုံသဏ္ဍာန်တွေကွဲပြားလာတဲ့အခါ အိပ်မက်ဟာ အိပ်မက်မှန်း တိုး တိုး တိုးလို့ပိုသေချာလာခဲ့ လုပ်ကြံလိုက်သလိုပဲ နီးလွန်းတယ်
ကွက်လပ်ဖြည့်ပါ လက်မှတ်ထိုးပါ knock knock knock မနက်ဖြန်ဆိုပါလာမှာပေါ့ Out!! knockout 

သွားတိုက်ဆေးကအမြှုပ်တွေ ထွေးထုတ်လိုက်တာမျိုး ကျွန်မမှားခဲ့ရင်တောင် ကျွန်မမမှားဘူး

                    -----------------------------------------------------------------------------


သွားကိုက်နေလို့ပါ၊ ဆေးစက်တော့ မကျစေနဲ့ဦး

_________ ကြ ယ် စ စ် သ ည် ___________

အစာအိမ်ရောဂါ ရှိလား ဟင့်အင်း
ဆေးစပ်နေတာ အယ်ကိုဟောနဲ့ မတည့်ဘူး ဟုတ်
ရုတ်ရုတ် မလုပ်ဘူး၊ သွားဖုံးက ကိုက်နေတာ
ကိုက်နေတာ ဘာအကောင်လဲ သွား သွား သွား
ယောင်နေတာတွေလည်း သွား အကြိတ်တွေလည်း သွား
သွားဖုံးက ကိုက်နေတာ ဆေးစပ်ပေးပါ။
အယ်ကိုဟောနဲ့ မတည့်ဘူး ဟုတ် သိပြီ။
အစာစားပြီးမှ သောက်ပါ၊ တစ်ရက် သုံးကြိမ် ဟုတ်
လက်ဝဲနဲ့ မတည့်ဘူး၊ လက်ယာကို ရှောင်ပါ၊ ဒီ ... ဟို ... ခရေဇီလား
ဟင့်အင်း သွားကိုက်နေတာ၊ သွားဖုံး ယောင်နေတာလေ
အသားတွေကို ဘယ်လိုဝါးမလဲ၊ ဟင့်အင်း ဟင့်အင်း
ငြင်းပေါ့ အကြိတ်ဆိုတာ ခွဲသင့်ခွဲထုတ်ရတာပဲ
အဲ အဲ ရဲရဲတောက် စာသားတွေ ထစ် ထစ် ထစ်နေတယ်။ ရင်ရှုပ်နေပါတယ် ဆိုမှတော့
“ ဟေ့ ... အခုကအခွေနဲ့ ကြည့်နေတာ ” အဲ အဲ ရောသွားလို့
သုံးခုကျော်ရတယ် ပြောတယ်၊ ထစ် ထစ် ထစ်နေရတာ မောတယ်ဗျာ
“ မဗျာနဲ့လေ သုံးရက်တစ်ကားပဲ ကြိုက်မှကြည့် ” ကြည့်သလောက်တော့ သိရမှာပေါ့
အတန်းနဲ့အဆင့်၊ အတန်းက အမြင့်ကို ဘယ်လိုလှမ်းမလဲ ရမ်း ရမ်း ရမ်းသန်းမှန်းသန်းပေါ့
“ ပေါ့ သီချင်းတွေ ခေတ်ကောင်းသေးလား ” စည်သူလွင်ကော သီချင်းဆိုနေသေးလား
ကိုဆူးခက်မင်းကော ကဗျာရွတ်နေသေးလား၊ သွားကိုက်နေသေးလား
ဟင့်အင်း အစာအိမ် ရောဂါမရှိပါဘူး
အယ်ကိုဟောလား မသောက်ပါဘူး မူး မူး မူးလို့
ပျို့ပျို့သွားတယ်၊ အင်း နေရာမှားနေပြီ၊
ဆေးစပ်နေတာလေ၊ ဆေးစက်တော့ လာမကျနဲ့ အရုပ်ထင်သွားဦးမယ်။

                    -----------------------------------------------------------------------------


ခေတ်ခက်ဆစ်

_______ လ င်း လ က် တာ ရာ _______________________

ခေတ်က   လူရိုသေရှင်ရိုသေမျက်နှာဖုံးအသစ်ကို  တပ်ဆင်လိုက်တယ်
     ။           ဖားတစ်ပိုင်းငါးတစ်ပိုင်းကျီးမရောက်ကြက်မမြောက် အာရုံခံစားမှုခလုတ်ကို တပ်ဆင်လိုက်တယ်
     ။          ပြီးပြီးရောတစ်ခါသုံးဖော့တုံးစကားလုံးခပ်များများကို တပ်ဆင်လိုက်တယ်
     ။          နည်းပညာလှိုက်စားမှု အန္တရာယ်စက်ကွင်းကို တပ်ဆင်လိုက်တယ်
     ။          အချစ်မဲ့နှလုံးသားအမြုံတစ်ခုကို တပ်ဆင်လိုက်တယ်
     ။         ဆူနာမီ ၊ စစ်ပွဲ ၊ လူကုန်ကူးမှုနဲ့ ယူရေနီယံစာလုံးမည်းကြီးတွေကို တပ်ဆင်လိုက်တယ်
     ။         ရသနည်းနည်း မီဒီယာများများ ခံစားမှုကွပ်မျက်ခြင်းကို တပ်ဆင်လိုက်တယ်
     ။         ဦးနှောက်ကိုးကွယ်ရာဘာသာရပ်ဆော့ဝဲလ်တွေကို တပ်ဆင်လိုက်တယ်
     ။         ဘယ်သူသေသေ ငတေမာရင်ပြီးရော အတ္တပုံဆောင်ခဲကို တပ်ဆင်လိုက်တယ်
     ။         လုပ်ကြံဖန်တီးပြုပြင်ထားတဲ့ ကောလဟလတွေကို လက်ခံစဉ်းစား တပ်ဆင်လိုက်တယ်
     ။         အိုဇုန်းလွှာကို မျက်နှာလွှဲခဲပစ်ပြီး ပလူတိုဂြိုဟ်ဖြုတ်ချခြင်းဖောင်ဒေးရှင်းကို တပ်ဆင်လိုက်တယ်
     ။         လိင် ၊ တက်ကျမ်း ၊ ဘုရားသခင် နဲ့  ညစာလျှော့စားခြင်းအကျိုးကျေးဇူးတချို့ကို တပ်ဆင်လိုက်တယ်
     ။         စက်ရုံဆန်ဆန်ထုတ်လုပ်ခြင်းနဲ့  စက်ရုပ်ဆန်ဆန်တွေးခေါ်ခြင်းကို တပ်ဆင်လိုက်တယ်
     ။         အနုပညာကိုအနုပညာမှန်းမသိအောင် အနုပညာအတုနဲ့  ဖုံးကွယ်တပ်ဆင်လိုက်တယ်
     ။         ခေတ်ရှိကြောင်းထွက်ဆိုဖို့ ခေတ်ယောင်ဆောင်ထားတဲ့ ခေတ်တစ်ခေတ်ကို ငှားရမ်းတပ်ဆင်လိုက်တယ်

ဟေ့ခေတ်!!! လူကသယ်ဆောင်နေတာလား ၊ လူကိုသယ်ဆောင်နေတာလား ။

                    -----------------------------------------------------------------------------


သစ္စာ

______ လ င်းေ ဝ အိ မ် _____________

သစ္စာတရားတစ်ခွက်ပေးစမ်းဗျာ  ရေမရောနဲ့
အရက်ကောင်းရင် အမြည်းမလိုပါဘူး ဒီမှာဟေ့လူ
ယဉ်ယဉ်ကျေးကျေးမူးတတ်တဲ့ အရက်သမားဟာ သီလအစင်ကြယ်ဆုံးသတ္တဝါပဲဗျ
အခု ကျွန်တော့်ကိုတွဲဦး ကျွန်တော်သောက်ခဲ့တာအရက်မစစ်ဘူး
ဟေ့လူ ခင်ဗျားဘယ်တော့ ဘယ်တော့မှ ဥသြမဆွဲနဲ့
ယုံယုံကြည်ကြည် သောက်ခဲ့တဲ့ အရာတွေကို ဘယ်အာရုံပဲ အမိန့်ပေးပေး အန်မထုတ်နဲ့
အဲဒါဟာ လူသားအားလုံးလိုက်နာသင့်တဲ့ အခြေခံဥပဒေပဲ
မြို့လယ်ခေါင်တိုက်ခန်းက အိပ်ယာလေးဆီကို
လူကြုံပါးပေးစမ်းဗျာ အဲဒီမှာ ဂုတ်သွေးစုပ်မယ့်ကြမ်းပိုးတွေ
သိပ်များလွန်းတယ် ဒီည ကျွန်တော် ရွာပြန်အိပ်မယ်
မိုးလင်းပြီ ဒါပေမယ့် မိုးမလင်းသေးဘူး အိပ်နေတယ်
မိုးလင်းမှ အိပ်ယာထရမယ်ဆို ကျွန်တော်ရန်ကုန်မပြန်တော့ဘူးအမေ
အဖေလယ်ထဲဆင်းပြီလား ကျွန်တော့်ကဗျာလေးကို လှည်းပေါ်တင်ခေါ်သွားဗျာ
ဒီကောင့်ပန့်ဆံပင်ကို ရွာနံ့မပျောက်အောင် ရွှံ့နည်းနည်းလူးပေးလိုက်
ဘုံဆိုင်လေးတွေကိုရွှေချကြစမ်းပါ
အဲဒါ သီလစင်ကြယ်သူတို့ရဲ့ ဗိမာန်ပဲ ညီမလေးရဲ့
ကျွန်တော့်ကိုအရက်တစ်ခွက်ပေး ကျွန်တော် အရက်တစ်လုံးပြန်ပေးမယ်
(ဟေ့ လူတွေ...) ဘယ်တော့ ဘယ်တော့မှ ရေမရောကြေးဗျာ။      ။

                    -----------------------------------------------------------------------------


ခေတ်ကိုအမှီလိုက်သူသတင်းဌာန၏ သတင်းစဉ်များကတော့

_________ေ မာ င် မြ တ် သူ ____________________

(အက်တမ်ထဲမှာ ဘုရားသခင်ကို ရှာရင်း-ဘုရားသခင်က အက်တမ်တွေကို
တအံတသြငုံ့ရှာနေတဲ့အကြောင်း)

D နေ့ရဲ့ Web Page တွေ သတင်းစာခေါင်းကြီးပိုင်းနဲ့ မြို့ပြရဲ့အချက်အလက်
အသစ်အသစ်တွေကြားမှာ အမျိုးသမီး/သား တန်းတူညီမျှရေး ဆောင်ပုဒ်ဟာ
ကင်ဆာပဲ ဟု လော်စုတ်လေးနဲ့အော်ဟစ်--လမ်းတကာမှာ မှန်
ရာ/ရှာဖွေ ဖြေရှင်းကြ အားထုတ်ကြ မေ့ကြ အိပ်ရေးဝဝအိပ်ကြနဲ့ ရှုပ်/လုပ်
ထူးထူးကဲကဲ ထဲထဲဝင်ဝင် ထွန်းထွန်းပေါက်ပေါက်ရှိသူတွေက
နေအထွက်မှာ ရွှေခွက်ကြီးနဲ့ ဘီယာခပ်နေလေပြီ မကြာမီ လာမည် ဆန်
`ရှင်ဖွင့်တမ်း ´ဇာတ်ကားနဲ့အကယ်ဒမီ ယူမည့်သူ များ--
သူတို့ဟာ ဆိုင်ရာများကို ရှာဖွေနေတယ်
အဓိကရှာဖွေမှုဟာ ဒီပုဒ်ကြီးရဲ့ ဒီပဲကြီး ဒီပဲကြီးက
ယင်း ထ လာတော့ ဒီပဲကြီးအတွက်ပြဿနာကို ဖြေရှင်းရေး
(ဒီအရပ် ဒီဇာတ်မှာ ဒီလူတွေဟာ ဒီမိုးရေအတွက်တော့ အားလုံး ဒီပုဒ်ထဲကဒီပဲ)
အယ်ဒီတာရဲ့အာဘော်နဲ့ အထူးသတင်းအနေနဲ့ကတော့
မြန်မာ- ဗမာ အဓိကရုဏ်း အားလုံးဟာ
ဂျန်းဒါးခွဲခြားတဲ့ တောသားမဟုတ်တော့ဘူး ဆိုတဲ့အကြောင်း
ဘူးသီးနုနုမခူးတဲ့ ဦးရဲ့ အထူးပွဲဆိုတဲ့ ဒိုင်ပွဲရပ်အကဲဖြတ်မပါတဲ့
သတင်းကလွဲရင် အားလုံးက ကိုနေမြဲ=မောင်နေမြဲပါပဲ

မနက်ဖြန်အတွက် အထူးပြုသတင်းကတော့
မောင်မြတ်သူသည် အသက်နှစ်ဆယ်ပြည့်ပြီးသူဖြစ်သည့်အတွက်
မဲပေးလို့ရပြီ၊ ဂြိုဟ်သက်စပြီ၊ မိန်းမယူလို့ရပြီ ၊ ကဗျာရေးလို့ရပြီ၊
ခေါင်းပုံဖြတ်လို့ရပြီ ဆိုတဲ့အကြောင်း နှင့်
ထောင်းလမောင်းကြေနေသော စိတ်ဓါတ်လို ပုံအဖြတ်ခံထားရတဲ့ခေါင်းနဲ့
ငါးစိမ်းတန်းမှာ တွန်းတိုက်နေရတဲ့ မိခင်လို
မျိုး ချွေးထွက်များပြီး သွေးထွက်များနေသေးတဲ့
မြို့ပြဟာ သူ့အခွံထဲမှာ သူဝှက်နေဆဲပဲ ရှိသေးတယ် ဆိုတဲ့အကြောင်း
မှန်ဘီလူးနဲ့ မှန်တစ္ဆေနဲ့ မှန်သူရဲနဲ့ သင့်သလိုကြည့်ပါ
မြို့ပြဟာ သူ့အခွံထဲမှာပဲ ရှိနေသေးသလို
ဘုရားသခင်ဟာ အက်တမ်ကိုရှာတုန်းဆိုတဲ့...။
  
မှီငြမ်း- (ကိုလင်းရမ္မာရဲ့ ကဗျာတစ်ပုဒ်)

                    -----------------------------------------------------------------------------


အိမ်ပြေးလေးတော့ မဟုတ်ခဲ့ပါ

____ေ မ ဝို င်း _____________

ငါတို့  ကိုလံဘတ်လည်းမဟုတ်
ငါတို့  ကိုလိုနီလက်သစ်လည်းမဟုတ်
ငါတို့  ဒုက္ခသည်တွေလည်းမဟုတ်
ငါတို့  အိမ်ပြေးတွေလည်းမဟုတ်

အချိုးကျကျပေါင်းစပ်ထားတဲ့ ဒီစက်ရုပ်မြေမှာ 
ငါတို့ က အလိုမတူအလိုမပါပဲ  အများသတ်မှတ်ခြင်းခံထားရတဲ့
ခေါင်းငုံ့ခံလူတန်းစား ကျုးကျော်သူတစ်စု

ငါတို့  မျှော်လင့်ချက်တွေကို အရောင်းအဝယ်လုပ်ဖို့ ရောက်လာကြတယ်
ငါတို့  အိပ်မက်တွေကို အရောင်တင်ဖို့ အတွက်ရောက်လာကြတယ်
ငါတို့  နေ့သစ်တွေကို မွေးစားဖို့ အတွက်ရောက်လာကြတယ်
ဘာပဲဖြစ်ဖြစ် ငါတို့ တွေ ခေတ်တစ်ခုရဲ့ ယန္တရားအောက်မှာ
အသက်ရှူသံတွေ မှားယွင်းခဲ့ကြ

 ၂၄နာရီရက်ရက် ပါတ်
ဒီလိုနဲ့ ချည့် နဲ့ စွာ လတွေ နှစ်တွေကို ရေတွက်
အချိုးမညီတဲ့ ခုနှစ်တွေထဲ
ငါတို့ ဘဝ တွေကို ရင်းခဲ့ရ
ဒီနှလုံးသားတွေလည်း မြေစာပင်ဖြစ်ခဲ့ရ

ကောင်းကင်ကိုကြည့် ညိုတော့မလား
မိုးသားတွေကြည့် ပြိုတော့မလား
ဒီလိုနဲ့ ပဲ ရထားပေါ်က ခပ်တိုးတိုး ညည်းရှိုက်သံအချို့
မိုးမျှော်တိုက်တွေကြားတိတ်တဆိတ် ငိုကြွေးသံအချို့
အမျိုးမျိုး မထူးဇာတ်စုံ အဖုံဖုံ ခင်းလို့ တဖြည်းဖြည်းနဲ့ 
ငါတို့ တွေ စက်ရုပ်မြေပေါ်မှာပဲ အရယ်အပြုံး ဘာသာကင်းမဲ့
ဒီလို အနှိမ်ခံသက်သက်
အပေါစားဆန် စက်ရုပ်အတန်းစားတွေ ဖြစ်မှန်းမသိဖြစ်ခဲ့ကြ......

ဒေါင်းယောင်ဆောင်ချင်တဲ့ ကျီးတွေလည်းရှိချင်ရှိမယ်
အံကိုကြိတ်လို့ ခေါင်းငုံ့နေရတဲ့သူတွေလည်းရှိချင်ရှိမယ်
အပျော်တွေပိတ် ဘဝတွေ အဆုံးသတ်သွားတဲ့ သူတွေလည်းရှိချင်ရှိမယ်
ဒီလိုနဲ့ ပဲ ပျော်ရွှင်မှုတွေပျောက်ရှခဲ့တာ ငယ်ရွယ်နုပျိုမှုတွေလွတ်ကျခဲ့တာ
Highway လမ်းတွေ ပေါ်မှာလား တိုက်တွေကြားလား
ဒါမှမဟုတ် Orchard Road ရဲ့ ထိန်ထိန်ညီး မီးရောင်တွေအောက်မှာလား..........
 
ဘာပဲဖြစ်ဖြစ် အိပ်မက်တွေကို ဈေးတင်ပြီး ရောင်းခဲ့မိမှတော့
မထူးဘူးရှေ့ဆက်လျှောက်မယ် ........ ခုတော့........
တိမ်တွေဖုံးလည်းအထူးအဆန်းမဟုတ်
မိုးပြိုတော့လည်းအထူးအဆန်းမဟုတ်
ကြယ်တွေကြွေလည်းအထူးအဆန်းမဟုတ်

ဒါပေမယ့် ဒါပေမယ့်ပေါ့
ငါတို့ တွေလေ အိမ်ပြေးလေးတွေတော့ မဟုတ်ခဲ့ကြဘူးပေါ့။

                    -----------------------------------------------------------------------------


ပစ္စုပ္ပန်၏ တည့်တည့်အရပ်၌ ရှိသော
_______ေ မာ င် မိုး ချို ______________

အိပ်မက်ရဲ့ အပေါ်ဆုံးကြယ်သီးကို တပ်လိုက် ။
မျက်စိနှစ်လုံးကို နေသားတကျဖြစ်သည်အထိ စောင့် ။
ဆန္ဒကို လက်ဝဲဘက်ရောက်တဲ့အထိ ခေါက်ချိုးပါးပါးချိုးပြီး ဘယ်ဘက် ဘောင်းဘီအိတ်ကပ်ထဲ ထိုးထည့် ။
ရှိုက်ဖွာလက်စ ဘယ်ဘက်လက်ဖျံကို တစ်ဖွာ နှစ်ဖွာ မီးမသေရုံ အငွေ့တွေနဲ့ အတွေးထဲ တစ်စ တစ်စ ။
နှစ် ၂၀ ကျော် ။ နှစ် ၃၀ ကျော်  ဒီနောက် ၄၀ ကျော် ။
အတ္တ ကို ဝါးလုံးရှည်နဲ့ သိမ်းပြီးရမ်းထည့်လိုက် ။
မူးရေလေးတစ်ခွက်နှစ်ခွက် ။ လွယ်အိတ်ထောင့်စွန်းက အပေါက်ထဲ မျှော်လင့်ချက်က ခုန်ဝင်လိုက် ။
လျှောကျလိုက် ။ မနက်ဖြန်ကို မက်ဆေ့ခ်ျပို့ပါ ။
အမှားအယွင်း ရှိပါသလား ။ လူဆိုတာ ရေခဲမှတ်အောက်ဘယ်မျှ ။
အပူချိန် အမှားအမှန် ။ ရာနှုန်းပြည့်ကွက်လပ်များဖြင့် အောင်မြင်ပြီးမြောက်ပြီးဖြစ်ကြောင်း ။
စသည်ဖြင့် ။
အပျော်အပါး နဲ့ အလေအလွင့် ဟာ ဟိုမှာ ဒီမှာ ကပ်ပါးကောင်လို ဖုန်မှုန့်လို ။
သွားဖို့လာဖို့ ဖိနပ်ကြိုး ချည်တယ် ။
တချို့က တစ်လှမ်း ။
တချို့က နှစ်လှမ်း ။
အလဲအကွဲများတဲ့ သံသရာကနေ ဟိုဘက်ကမ်းမှာ . . .

                    -----------------------------------------------------------------------------
 ပြက္ခဒိန် ဆယ့်ရှစ်
---------- ပိုင်ဥာဏ် --------











                    -----------------------------------------------------------------------------


လမ်း( ၄၀ ) ဗောဓိကုန်း၊ ကျွန်တော်နေတဲ့အဆောင်ရဲ့ နှစ်ဆယ့်တစ်ရာစုလူငယ်

____ေ ရွှ ကို ယ် န တ် ( U C S M ) ______________________________


နေ့တစ်နေ့ရဲ့မနက်ခင်းကို
သူတို့က ချစ်သုဝေရဲ့သီချင်းတစ်ပုဒ်သီဆိုလို့ ဟောဒီလိုမျက်နှာသစ်လိုက်တယ်
( နှိုးစက်ကနှိုးမှ ကိုးရိုးကားယားနိုးထ )
စံတော်ချိန်ခုနှစ်နာရီမှာ သူတို့စတင်မိုးသောက်
ကာလာစုံ၊ အဆင်တန်ဆာစုံနဲ့ ခပ်မိုက်မိုက်လန်းနိုင်ဖို့
သူတို့အသိုက်  ပျိုတိုင်းကြိုက်  နဲ့ တစ်သားတည်းဖြစ်ရင်း အရေခွံစလဲကြတော့တယ် ။

တစ်ချို့က အင်္ကျီအဖြူ၊ ပုဆိုးအပြာ တူညီဝတ်စုံဝတ် ဆိုင်ကယ်ခပ်မြင့်မြင့် စီးလို့
တစ်ချို့က အင်္ကျီဖြူ၊ စိမ်းပြာရောင်ပုဆိုး
တူညီဝတ်စုံဝတ် Tricker မော်တော်ဆိုင်ကယ်နဲ့အသားကျလို့
တစ်ချို့ကတော့ ကိုယ်ခန္ဒာထက် ဘော်ဒီဖစ်တ် တီရှပ်နဲ့ အော်လ်တာ
အပေါ်မျက်ဝန်းမည်း၊ အောက်ခြေထောက် Half Shoes
ခပ်ကျပ်ကျပ်စကင်န်နီ ဂျင်းဘောင်းဘီဝတ်လို့
သူတို့စိတ်ကူး သူတို့ဒီဇိုင်းက သူတို့သွားတက်ရမယ့်
ကျောင်းတော်ကြီးတွေရဲ့ စူးစမ်းမှုမျက်ဝန်းတွေအောက် တလက်လက်အသက်ဝင် တောက်ပလို့ ။

သူတို့ဆံပင်ဒီဇိုင်းက ဒီနေ့တစ်မျိုးဆို
ဟော --- နောက်တစ်ပတ်နေရင် တစ်မျိုး
သူတို့ဆံပင်အရောင်က အခုအချိန် အညိုဆို
အမှတ်ရချိန် သတိထားကြည့်၊ နောက်အရောင်တစ်မျိုး
ကောက်ချင်ရင်ကောက်၊ ဖြောင့်ချင်ရင်ဖြောင့်
ကောက်ဖြောင့် တူးအင်န်ဝမ်း အလန်းဖလန်း အလန်းဖလန်း
ဝတ်ပုံစားပုံ၊ ဒီဇိုင်းထုတ်ပုံ၊ ရှိုးလုပ်ပုံ ဂွမ်းတဲ့အခါ ဂွမ်းနေခဲ့
ပြောပုံဆိုပုံ၊ နေထိုင်ပုံ၊ သွားလာလှုပ်ရှားပုံ ကြမ်းတဲ့အခါကြမ်းနေခဲ့
Nobody – Giordano – Gucci – Levi’s - Cheq
ခါတော်မှီရာသီအလိုက် တံဆိပ်မျိုးစုံနဲ့ လန်းတဲ့အခါ မိုင်ကုန်လွှတ်လန်းနေခဲ့
ဆန်းတဲ့အခါရှိ၊ မဆန်းတဲ့အခါလည်းရှိ
အဆင်ပြေတဲ့အကြိမ်ရှိ၊ အဆင်မပြေတဲ့အကြိမ်ရှိ
သူတို့ခေတ် သူတို့ဖက်ရှင်က သူတို့ရေးတဲ့သမိုင်းအောက် ဖရိုဖရဲပွင့်လန်းလို့ ။

ဘယ်ဖက်ရှင်ပစ္စည်းအသစ်ထွက်တယ်၊ ဘယ်အဆိုတော် သီချင်းအသစ်ထွက်တယ်
စသဖြင့် အကြောင်းတရား စိတ်ဝင်တစားနဲ့ Modeling အိပ်မက်မက်သူရှိတယ်
အသစ်ထွက် Application ဆော့ဖ်ဝဲ ၊ ပရိုဂရမ်းမင်း ဘာသာရပ်
တရုတ်အခြေစိုက်ဟက်ကာအဖွဲ့ ဝက်ဆိုဒ်အချို့ ရက်အတန်ကြာ တိုက်ခိုက်
အိုင်တီနည်းပညာအကြောင်းစိတ်ဝင်တစား၊ ခံယူချက်ကြီးမား ပရိုဂရမ်မာ ဝါသနာအိုးလည်းရှိတယ်
အချစ်ကဗျာတိုင်း ဆိုင်ဆိုင်၊ မဆိုင်ဆိုင်
 မိငယ် - - မိငယ်ရေ လို့ ထည့်ရေးတတ်လေ့ရှိတဲ့ ကဗျာဆရာပေါက်စတစ်ယောက်ရှိတယ်
ဦးခေါင်းထက် အီမို ဆံပင်ကို နှစ်မိနစ်တစ်ကြိမ်
သပ်တင်လေ့ရှိတဲ့ ပဲခပ်များများ ကင်းဘွဲ့ရတစ်ကောင်ရှိတယ်
လေလုံးထွားထွား ဟောင်ဖွာဖွာစကားများများ အင်ဂျင်နီယာလောင်း အမျိုးကောင်းသား ရှိတယ်
စာဖွဲ့လို့မကုန်နိုင်လောက်တဲ့ လူအမျိုးမျိုး၊ စိတ်အထွေထွေတွေရှိတယ် ။

ကျောင်းသားအဆောင်ဆိုတော့  ဂီတသံအမျိုးမျိုးနဲ့ညံစီ
အသံမြည်ပေမယ့် နားဝင်ပီယံဖြစ်တဲ့အချိန်ရှိ၊ မဖြစ်တဲ့အချိန်လည်းရှိ
ပြောရင်းလက်စ ဘေးအခန်းမှ အသည်းကွဲသီချင်းပေါင်းစုံ ထွက်ကျ
" လွမ်းရုံကျေနပ်တယ် ဘေးမှာမရှိလည်းဘဲ မင်းနဲ့ငါ့ရဲ့အမှတ်တရများစွာကျန်သေးတယ်"
အသံသေးတယ် ( မမိုက်ဘူး ) ၊ အသံကြောင်တယ် ( မမိုက်ဘူးကွာ )
" သူနဲ့ယှဉ်ရင်ငါက ရာတန်တစ်ရွက်ပါပဲ အရင်က ပြာယာခတ်စွာနဲ့ မင်းဆီကိုသယ်လာပြဿနာပဲ"
မင်း ရက်ပ် ရွတ်တာ အဂွမ်းကြီးပဲ ( MC လွှမ်းပိုင်နဲ့ မိုးနဲ့မြေ ဆီနဲ့ရေ )
" ငါ့အနားမင်းမရှိတဲ့အချိန်လေးများ ငါ့နားမင်းရှိသလိုနေပေးပါ"
အသံပျစ်ချွဲချွဲနဲ့ မဆိုပါနဲ့ဗျို့ ( ဆိုတေးလို တေးဆိုရင် အပြေးငိုရမယ် )
မှတ်ချက်များစွာက အသံရဲ့မြန်နှုန်းအတိုင်း တစ်ပုဒ်ပြီးတစ်ပုဒ် စီရီလို့
ဂန္တဝင်ဆန်ဆန်မတီးခတ်နိုင်၊ ဂန္တဝင်ဆန်ဆန်မသီဆိုနိုင်၊ ဂန္တဝင်ဆန်ဆန် မရေးဖွဲ့နိုင်
သူတို့ဖန်တီးထားတဲ့ အရိုးသားဆုံးဂီတဆိုတာ
ဘယ် Key နဲ့ တီးတီး မြည်တယ်၊ ဘယ် Beat နဲ့ တီးတီး ကြွတယ်၊
ဘယ်လိုပုံစံနဲ့ဆိုဆို လှမြဲလှနေတယ် ။

သူတို့ဆိုတာ အကြောင်းမသိရင် ပေါင်းဖို့သင်းဖို့ နည်းနည်းခက်တယ်
အရွယ်ငယ်ငယ်  လူငယ်  ဆိုတဲ့ ဂုဏ်ပုဒ်နဲ့ လတ်ဆတ်မွှေးမြတယ်
တံဆိပ်မျိုးစုံခေတ်ပေါ်ဆိုင်ကယ်တစ်ချို့နဲ့ တဗြူးဗြူးနဲ့ ဗျင်း အိပ်ဇောသံ ဆူညံတယ်
ကျောင်းကားစီးတယ်၊ ကျောင်းအသီးသီးကိုတက်တယ်
ခေတ်ရဲ့သားပျိုဖြစ်တော့ ခေတ်မီတယ်၊ ခေတ်ဆန်တယ်
ဦးခေါင်းထက် ကိုရီးယားဆံပင်ပုံစံမျိုးစုံ အရောင်ထွက်တယ်
ဆက်သွယ်ရေးအတွက် ငါးသိန်းတန်၊နှစ်သိန်းတန် ဟမ်းဖုန်း ကိုင်တယ်
အိုင်ပတ်(IPad )၊ အိုင်ဖုန်း( IPhone ) ၊ Tablet PC နဲ့ တတ်နိုင်တဲ့သူ ရှိုးထုတ်တယ်
ကဗျာရေးတယ်၊ စာရေးတယ်၊ သီချင်းရေးတယ်၊ အင်တာနက်သုံးတယ်
အသည်းကွဲချိန် ဂစ်တာတီးလို့ ကြေကွဲရင်းဆွေးတယ်
သူတို့အချင်းချင်း တစ်ခါတစ်ရံ ကူညီရိုင်းပင်းတယ်၊ တစ်ခါတစ်ရံ ပြင်းထန်ပြိုင်ဆိုင်တယ်
အနိုင်မခံ အရှုံးမပေး၊ လှေခွက်ချည်းကျန်အလံမလဲ  စိတ်ဓာတ်နဲ့
အတ္တအိပ်မက်ကိုယ်စီလက်ဆွဲလို့ သူတို့အနာဂတ်ဆီ ခပ်သုတ်သုတ်ချီတက်နေတယ် ။

ခင်ဗျားမျက်စိနည်းနည်းရှုပ်သွားလား
ဆရာ ခရမ်းပြာထက်လူ ကဗျာစာသား ကိုးကားပြောရရင်
"လေတယ်မပြောနဲ့၊ လောတယ်မပြောနဲ့"
ဟောဒါ ကျွန်တော်နေတဲ့အဆောင်ရဲ့ နှစ်ဆယ့်တစ်ရာစုလူငယ် ။            ။

++++++++++++++++++++++++++++++++++++++++++++++++++++++++++++++
                                                     ကာတွန်း                                                                          



++++++++++++++++++++++++++++++++++++++++++++++++++++++++++++++

 အက်ဆေး

မြင့်မိုရ်တောင်သွား တောလား

_____ေ န ကျ ယ် ဝ န်း _______


ဒီစာကြောင်းတွေကို ချရေးမယ်လို့ ဖီးလ်ဝင်တဲ့နေ့က ကမ္ဘာပျက်တဲ့ရက်နဲ့ တိုက်ဆိုင်သွားတယ် ။ အဲဒါကြောင့်ပဲ ၂ ရက်ခွာပြီးမှ ရေးလိုက်တော့တယ် ။

ဒီနေ့ အိပ်ရာက အစောကြီး နိုးတယ် ။ မြန်မာစံတော်ချိန်နဲ့တော့ မဟုတ်ဘူး ။ နေ လည်းဝင်၊ လေ လည်းဝင် တဲ့ ပြူတစ် ကြည့်ရတဲ့ အပေါက်ကို ဖွင့် လိုက်တော့၊ ပတ်ဝန်းကျင် မြင်ကွင်းက ထူးမခြားနား သီချင်းလေး ညည်းပြီး ဝင်လာတယ် ။ ဒီခေါက်ရိုးကို ပြန့်အောင် တိုက်ဖို့ မီးပူကြီးကြီးတော့ လိုနေပြီ။ အဲဒါနဲ့ ရေချိုးခန်းထဲက ကြေးမုံပြင် ကို လှမ်းကြည့်လိုက်တယ် ။

မှန်ထဲက ကျွန်တော့်ကို ကျွန်တော်က မဲ့ပြတော့ ပြန်မဲ့ပြတယ် ။
မှန်ထဲက ကျွန်တော့်ကို ကျွန်တော်က ပြုံးပြတော့ ပြန်ပြုံးပြတယ် ။
မှန်ထဲက ကျွန်တော့်ကို ကျွန်တော်က ညာလက်ထောင်ပြလိုက်တယ် ။
..................... ။ 

ကျွန်တော် သက်ပြင်းချ လိုက်တယ် ။

( ထိုနေရာမှ စ၍ စာဖတ်သူ ခင်ဗျားတို့ အလွယ်တကူ နားလည်နိုင်စေရန် ကျွန်တော်၏ ခံစားချက်များကို လူပြိန်းနည်းဖြင့် ရေးသားပါအံ့ )

ကျွန်တော်သည် သံလိုက်အိမ်မြှောင်တစ်ကောင် ဖြစ်ပါသည် ။

မျက်တွင်းချိုင့်နေတဲ့ လပြည့်ကို ကြည့်မျှော်ရတာ ဇက်နာတယ် ။ အမြင်မတော်တဲ့ လူတချို့က ကျွန်တော့်ကို ခလုတ်ဝိုင်းပိတ်ကြတယ် ။ ကျွန်တော် တိုးတိုးလေး ဆက်လည်နေတယ် ။ ဘယ်သူသိတာ မှတ်လို့ ။

ကျွန်တော့် ညာဘက်ဦးနှောက်ထဲကို သူ့အကြောင်းတွေ ပြွတ်သိပ် ထည့်နေချိန်မှာ ၊ သူ့ ဘယ်ဘက်ဦးနှောက်က အပြင်းအထန် အလုပ်လုပ်နေလိမ့်မယ် ။ နောက်ဆုံးက နေရတာ သာ ပါတယ် ။ ဖိနပ် တက် အနင်းမခံရဘူးပေါ့ ။ အဲဒါကို နတ်ဆိုးတစ်ကောင်က ကျွန်တော့်ကြည့်ပြီး လက်ညှိုးက ကွေးလိုက် ဆန့်လိုက် လုပ်ရင်း ကရော်ကရော် တဲ့ ။ လက်သည်းလည်းမညှပ်ရသေးဘူး ။ ဂစ်တာ မတီးဘူးနဲ့တူပါတယ် ။ ကျွန်တော် တစ်ခါ ပြောဖူးသလိုပေါ့ ။ ချစ်ရတာ လက်သည်းအရှည်နဲ့ ဂစ်တာတီးရသလိုပါပဲ ခက်တယ် ဆိုတော့ လက်ညှိုး ငေါက်ငေါက်ထိုးပြီး အသည်းကွဲစေ တဲ့ ။

စက္ကူပန်းတစ်ပွင့်ရဲ့ ဈာပန မှာ ငိုချင်းဆိုပေးမယ့်သူ တစ်ယောက်မှ မရှိဘူး ။ စိတ်မကောင်းပါဘူးကွယ် ။ မင်းဝတ်သမျှ အင်္ကျီအရောင်တွေကို လိုက်ပြီး စာဖွဲ့ပေးဖို့ ငါ့မှာ ကဗျာဥာဏ်မထက် လို့ပါ ။ တကယ်ဆို ဒီသင်ခန်းစာကို ငါ မသင်ဘဲ တတ်သင့်ရမှာပါ။
ခြေဗလာ နဲ့ လိုက်လာတာပါ ။ ဆရာ့လိုမျိုး ဘဝ က ဖိနပ်ကြိုးငုံ့ချည်နေတုန်း မစံပယ်က မုန်း သွားမှာစိုးလို့ ဖိနပ်တောင် စီးခဲ့တာ မဟုတ်ဘူး ။ 

မျက်နှာပြင်တစ်ခုကို အလင်းတန်း တစ်ခု ကျရောက်ရင် ရိုက်လင်းတန်းရဲ့ မျက်နှာပြင်ပေါ် ကျရောက်တဲ့ ထောင့်ဒီဂရီအတိုင်း ပြန်လင်းတန်း ရိုက်ခတ်ပြီး ပြန်တယ်။ ရိုက်လင်းတန်းနဲ့ ပြန်လင်းတန်း ထပ်တူကျဖို့ဆိုရင် အလင်းတန်းက မျက်နှာပြင်ပေါ်ကို ထောင့်မှန်ကျ ရိုက်ခတ်ရမယ်ဆိုတာ ၉ တန်း ၁ဝ တန်း ရူပဗေဒ စာကြေရင် သိကြလိမ့်မယ် ။ မရှင်းဘူး မသိဘူးဆိုရင် ကျွန်တော့်ကို ကြားခံ တစ်ခုခု ထားပြီး မေးနိုင်တယ် ။ ဘာလို့လဲဆိုတော့ မေတ္တာရောင်ပြန်ဟပ်လိမ့်မယ် အသွားအပြန် ဘာညာ ဆိုတဲ့ စကားတွေကို လွယ်လွယ်ပြောတတ်တဲ့ သူတချို့ကို သတိထားမိစေချင်လို့ပါ ။ ခင်ဗျားတို့ ပေးတဲ့ အလင်းတန်း ခင်ဗျားဆီ ဆက်ဆက် ပြန်လာစေချင်ရင်တော့ ၉ဝံထောင့်မတ်ကျအောင်ရိုက် ပြီး စောင့်နေပေတော့  ။ ဒါပဲ ရှိတယ် ။ ကျွန်တော်ကတော့ ထောင့်မှန်ကျဖို့ နဲနဲ လွဲသွားတယ် ။

တိမ်ဖုံးတဲ့ည မှာ ကြွေတဲ့ကြယ်တွေကို သနားမိတယ် ။ ငါးတွေ ပင်လယ်ထဲမှာ လှိုင်းမူးတတ်ကြသလား ။ ဒါဆိုရင်တော့ ခေါင်းခန်းက မစီးနဲ့ ။ ဈေးကြီးတယ် ။ လိမ္မော်ရောင် နဲ့ လိမ္မော်သီး ဘယ်သူ အရင်လာတာလဲ ။ ဝါ စိမ်း နီ ပြာ အသင်းလေးသင်းမှာ လိမ္မော်ရောင် အသင်းကို ဘယ်သူ ထပ်တိုးတာလဲ ။ gtalk က idle sign ကို လိမ္မော်ရောင် ထားဖို့ ဘယ်သူ အကြံပေးတာလဲ ။ သိကြပါသလား ။ အကယ်၍ ကောင်းကင်သာ လိမ္မော်ရောင် ဆိုရင် သူမရဲ့ ခြေသည်းဖွေးဖွေးလေးတွေမှာ ကောင်းကင်မှုန်တွေ ပေကျံနေဦးမှာလား ။ သူမကြောင့် ဒီစကြဝဠာကြီးရဲ့ ( ဘယ်နေရာမဆို ) ( တစ်ရက်လောက် ) ( မပြည့်စုံလို့ ) သက်တံ့တွေ ကိုယ်ထင်မပြနိုင်တော့ဘူး ဆိုရင် ဘယ်သူက ခေါင်းဝင်ခံမှာလဲ ။ ၁၉၉ ကို ဖုန်းဆက်ရမှာလား ။ 999 ကို ဖုန်းဆက်ရမှာလား ။ တီ တီ တီ ။ လူကြီးမင်းခေါ်ဆိုသော တယ်လီဖုန်းမှာ busy at the moment ။ တကယ်ပြောတာ တိမ်ဖုံးတဲ့ညမှာ ကြွေတဲ့ကြယ်တွေကို သနားမိတယ် ။

ဦးစံရှားကို ပြန်ဖတ်တာ အရင်လို ရင်ခုန်စရာ မကောင်းတော့ဘူး ။ ငါပဲ စဉ်းစားဆင်ခြင်ဥာဏ်တိုးလာလို့လား ။ ဇာတ်လမ်းတွေကို မှတ်မိနေလို့လား မသိဘူး ။ နို့ပေမယ့် ကျွန်ုပ်မိတ်ဆွေကြီး စောတာအယ် ကတော့ ကျွန်ုပ်ကို ခင်ဗျားက တကယ့်ဂေါက်သီးပဲ ဟု ပြောချေတုန်း ။ ကိုင်း သည်လိုဆိုလျှင် ဂေါက်ကျင်းထဲသို့ အကျွန်ုပ် လှိမ့်ဝင်ဖို့သာ ရှိတော့ရာ၏ ။ ကျွန်ုပ်အား ခပ်ပြင်းပြင်းသာ နှက်ကြပေတော့ ။ တော်ပြီ ။
"သူများစကားတွေ သုံးရတာ လျှာယားတယ် ။"

ကျွန်တော်ပြောတာကိုတော့ ယုံ ။ ဒီစပျစ်သီးက ချိုတယ် ဆို .. လှမ်းဟပ်ကြမှာလား။ အရှေ့တောင်အာရှမှာ အချစ်တတ်ဆုံး“ဆု”ကို ကျွန်တော်ပဲ ရသင့်တယ် ။ ဘာလို့လဲဆိုတော့ ကျွန်တော်က အပျင်းကြီးတယ်လေ ။ ချစ်မိပြီးသွားပြီ ဆို မုန်းရမှာ ပျင်းတယ် ။ ထားပါလေ ..  မြင်းမိုရ်တောင်သွားတောလားတစ်ပုဒ်ကို ရေးဖို့ ငါကိုက ကုသိုလ်ကံ နည်းခဲ့တယ် ထင်ပါတယ် ။ 
                    -----------------------------------------------------------------------------


ခရမ်းပြာပတ်လမ်းမှာ ချိတ်တွယ်နေတဲ့ လေတံခွန်

_____ စ စ် နို င် _______________________

အရာအားလုံးကိုငြီးငွေ့လွန်းနေသည်မှာ ကြာပြီ ။ တော်တော်ကိုကြာခဲ့ပြီဖြစ်သည်။ နာရီသံတချက်ချက် မြည်နေသည်။ အကြောင်းမဲ့ငေးငိုင်နေခြင်းဖြင့် အချိန်ဖြုန်းမိသည်။ စိတ်ထဲမှာ စကားလုံးတွေ ဖြတ်ပြေး သွားတာမြင်ရသည်။ မီးခလုပ်ကို ဖွင့်လိုက်သည်။ ဇာတ်လမ်းအစမှာပင် မင်းသားသေဆုံးပြီးဖြစ်ကြောင်း သတင်းရရှိသည်။ ကိုယ် မောပန်းနေသည်။ မစိုက်ဖြစ်သော နှင်းဆီပင်တစ်ပင်ကို အားနာသည်။ အဆုံးမရှိနိုင်သော လှိုဏ်ခေါင်းမည်းမည်းတစ်ခုအတွင်းသို့ ဝင်ရောက်မိခဲ့ခြင်းဖြစ်ပေမည်။ မည်သည့်အရာကိုမှမျှော်လင့် မထားခြင်းသည် ငြိမ်းချမ်းရလေသည်။ ကြောင်လေးတညောင်ညောင် အော်နေသည်။ သတ္တ၀ါတစ်ခု,ကံတစ်ခုဟူသော စကားကလည်း တရားသည်။ တံမြက်စည်းလှည်းသွားသူကို မတွေ့ရပါ။ အမှိုက်စတစ်ချို့ကိုသာ သဲလွန်စအဖြစ် ချန်ရစ်သည်။ ကျွန်တော် ဘာကို ယစ်မူးရမည်နည်း။

ထိုနေ့က နေခြစ်ခြစ်တောက်ပူပါသည်။ ခေါင်းအနည်းငယ်မူးနေသောကြောင့်လည်း ဖြစ်မည်။ ဆံပင်တိုတိုအလယ်ခွဲနှင့် ကောင်မလေးကို ချစ်မိသွားလေသည်။ လွန်ခဲ့သော ၁၅ နှစ်ကို ပြန်ရောက်ရှိသွားတာလား။ မသေချာပါ။ မျက်စိရှေ့မှာ လူသုံးယောက် ခွက်ထိုးခွက်လန် ရယ်နေသည်။ မှောက်ထားသောဖဲချပ်ကို ဆွဲလှန်လိုက်မိသည်။ လူငယ်လေးတစ်ယောက်၏ နာကျည်းနေသောမျက်နှာ ပေါ်လာသည်။ အမှန်တော့ မိုးတွေသည်းသည်းမည်းမည်းရွာနေဖို့ကောင်းသည်။ ကျွန်တော်ချစ်သော ကဗျာစာအုပ်လေးတစ်အုပ်ကိုသာ ကျစ်ကျစ်ပါအောင် ဆုပ်ထားသည်။ သုညထဲသို့ ဘာမှထပ်ဖြည့်ရန် မလိုအပ်တော့ပါ။ လူ့ဘဝသည် ရယ်မောစရာကောင်းလှသည်။ စာအုပ်အငှားဆိုင်မှာရလာသော အသိဥာဏ်များကို ဘဝ၏ဘယ်နေရာထိ သယ်သွားရမည်နည်း။ ကြွေပန်းအိုးလေးလိုသာ လွတ်လွတ် လပ်လပ်ကျကွဲလိုက်ချင်ပါတော့သည်။

ယုန်မလေးမျက်နှာဖုံး စွပ်ထားသည်။ လေတံခွန်လွှတ်ရာတွင် မကျွမ်းကျင်သောကြောင့် ကျွန်တော် ရှုံးပါသည်။ ခိုးခိုးခစ်ခစ်ရယ်သံ များကို ကြားလိုက်ရပြန်သည်။ အစိမ်းရောင်တွေလမ်းမှားပြီး ဝင်လာတာ ဖြစ်မည်။ ဘဝမှာ အတတ်နိုင်ဆုံးရိုးသားခဲ့ပါသည်။ သင်္ခါရတရားကိုမသိဘဲ ဒင်္ဂါးလေးတဝီဝီလည်နေ သည်။ အမှတ်တရဆိုတာ အံဆွဲထဲမှာ ရှိလိမ့်မည်။ ကြယ်တံခွန်လိုကြွေဖို့ ကောင်းကင်ဆီသို့ ပျံတက်ရပါလိမ့်ဦးမည်။ မစိုက်ပျိုးသေးဘဲ ရိတ်သိမ်းချင်နေသော လယ်သမားလေးလိုလည်း ရှက်လှသည်။ နေသည်အနောက်မှထွက်၍ အရှေ့သို့ဝင်ပါသည်။

သံသရာလား ၊ ရထားလား ၊ စိတ်ပိုင်းဆိုင်ရာဗဟိုပြုခြင်းလား။ မသိပါ ။ အကြောင်းတရားက မလှုပ်ဘဲ အကျိုးတရားက ရွေ့ပါသည်။ ငြီးငွေ့လွန်းနေတာသိရဲ့လား။ မွန်းကြပ်လွန်းနေတာ သိရဲ့လား။ မေးခွန်းများဖြင့်သာ ထိုးစိုက်လိုက်ချင်ပါတော့သည်။ တော်ရာမှာနေရင်း ဆံပင်တွေရှည်လာတာကို တွေ့ရသည်။ တစ်ဖက်ကမ်းသို့ များများစားစားယူသွားရန်မရှိပါ။ ရယ်သံများကို ကြားနေရဆဲဖြစ်ပါသည်။ အနိုင်မယူတတ်သူသည် အလံဖြူလည်း ဆောင်လေ့မရှိပါ။ မျက်စိရှေ့မှာတင် မျက်နှာဖုံးတစ်ခုပြုတ်ကျလာခဲ့သည်။ ရောက်လာပါပြီ ။ သူ့လမ်းသူသွားနေခြင်းဖြစ်၍ ကျွန်တော်နှင့်သာ တည့်တည့်တိုးနေရပါ သည်။ ဧပရယ်လဖြစ်ပါသည်။ မျက်စိရှေ့မှာတင် ကမ္ဘာကြီးပိုမိုတိမ်းစောင်းလာပါသည်။ အသက်ကြီးမှ ပြန်ဖြူစင်ရခြင်းသည် လေးကြောင်းမျဉ်းနှင့် လက်ရေးလှပြန်လေ့ကျင့်ရသလို ကသိကအောက် နိုင်ပါသည်။ ဘယ်အရာကိုမှ ငြိတွယ်မနေချင်သည့် အဖြစ်တွင် စိတ်ကငြိတွယ်လွန်းနေပါသည်။ ခိုးခိုးခစ်ခစ်ရယ်သံများကိုလည်း ကြားနေရပြန်သည်။ မေမေ့ကိုလည်း သိပ်လွမ်းရပါသည်။ ပျော်ရွှင်မှု ဟူသည် ကျွန်တော့်ထံမှ ကြိုးပြတ်သွားသော လေတံခွန်လေးသာဖြစ်ပါသည်။ ဗလာစာအုပ်ဖြူဖြူတွေ မြင်တိုင်း ကျောက်သင်ပုန်းမဲမဲလေးတွေရှိသော ခေတ်ဆီသို့သာ စိတ်ကို ဇက်ကြိုးတပ်မိနေပါတော့ သည်။ ။
                    -----------------------------------------------------------------------------


ထရပ်ကားပေါ်က အက်ဆေးများ (၁)

______ သ င်း ကွဲ _______________

(၁)
ကျွန်တော်ပင်လယ်ဆီကို သွားနေတယ် ။ ပင်လယ်ဆိုတာအလုံးကြီးလား အပြားကြီးလား ၊ မော်တော်ကားလို ဘီးလေးဘီးနဲ့လား ၊ အေးချမ်းမွန်လို သွားတက်လေးပါလား ၊ ကျွန်တော် မသိဘူး ။ ကျွန်တော် ပင်လယ်ဆီကို သွားနေတယ် ။ ပင်လယ်ဆိုတာ ဘယ်အရပ် ဘယ်ဌာနမှာ ရှိမှန်း ကျွန်တော် မသိဘူး ။ ပင်လယ်ဆီသွားဖို့ လမ်းညွှန်မြေပုံလည်းမပါဘူး ။ ကျွန်တော့် သိမှုထဲမှာ ရှိနေတာတစ်ခုက ၊ ကျွန်တော် ပင်လယ်ဆီ အရောက်သွားဖို့ပဲ ။ ပင်လယ်ရဲ့ သဘော သဘာဝ ၊ ပင်လယ်ရဲ့ အနှစ်သာရ ၊ ပင်လယ်ရဲ့ ဖြစ်စဉ် ၊ ကျွန်တော် ဘာဆို ဘာမှမသိဘူး ။ ဒီလိုဆိုတော့  ကျွန်တော် ပင်လယ်ဆီ သွားနေတယ် ဆိုတာ ခင်ဗျားတို့က မယုံကြည်နိုင်ဘဲ ဖြစ်လိမ့်ဦးမယ် ။ ကျွန်တော် ရဲရဲဝံ့ဝံ့ ပြောနိုင်တာ တစ်ခုက ကျွန်တော် ပင်လယ်ဆီသွားနေတယ် ။

“ပင်လယ်ကို မမြင်ဖူးခင်ကတည်းက
ပင်လယ်ကို ချစ်ခဲ့တယ်
ကျုပ်လား . . . အခု ပင်လယ်ဆီ သွားနေတာပါ”
(ကန္တာရသား - နေမျိုး)

(၂)

သူ သစ်သီးလေး တစ်လုံးကို ခွဲလိုက်တယ် ။ သစ်သီးလေးထဲက သစ်စေ့လေးထွက်လာတယ် ။ သူ ကလေးပီပီ  သစ်စေ့ကလေးကို လက်နဲ့ တောက်ထုတ်လိုက်တယ် ။ နောင်နှစ်ပေါင်း များစွာ ကြာတဲ့အခါ သစ်စေ့ကလေးဟာ သစ်ပင် တစ်ပင်ဖြစ်သွားတယ် ။ သူလည်း အဘိုးအိုတစ်ယောက်ဖြစ်သွားတယ် ။ သစ်ပင်ရိပ်အောက်မှာ ကလေးသူငယ်တွေ ဆော့ကစားနေကြတယ် ။ သူတို့ရဲ့ မျက်နှာမှာ ဖြူစင်ခြင်း အရိပ်အယောင်တွေပြည့်လို့ ။ နောင်တစ်ချိန်မှာ အဲ့ဒီ သစ်စေ့ကလေးတွေဟာ သစ်ပင်တွေ ဖြစ်လာမလားလို့ သူတွေးမိတယ် ။ သူ့ရဲ့လက်ထဲမှာ သစ်သီးတစ်လုံးရှိတယ် ။

“ငါမြင်နေရ
သစ်သီးထဲက သစ်ပင်ကလေး
အဲဒီသစ်ပင် အောက်မှာ
ပျော်ပျော်ရွှင်ရွှင် ဟစ်အော် ဆော့ကစားနေကြ
ကလေးငယ်များ”
(သစ်ပင်အောက်က ကလေးငယ်များ - နေမျိုး)


(၃)

သူမ မနက် လေးနာရီ အတိမှာပဲ အိပ်ရာက နိုးလာတယ် ၊ မျက်လုံးတွေက ကျင့်သားရနေတာကြောင့် မနက်လေးနာရီ ဆိုတာနဲ့ အိပ်ရာက နိုးနေတတ်တာ နှစ်ပေါင်းမနည်းတော့ ။ တစ်ကိုယ်ရည် တစ်ကာယ သန့်ရှင်းရေးကိစ္စတွေ ပြုအပြီးမှာ မျက်နှာသစ်ဖို့ အိမ်ရှေ့ရေကပြင်ကို ထွက်လာခဲ့တယ် ။ မျက်နှာသစ်ရင်း သတိပြုမိတာက သူမရဲ့ ပါးပြင်ပေါ်က ထင်ထင်ရှားရှား အရေးအကြောင်းတွေ ။ သူမ အပျိုတုန်းကများ ဒီလို မဟုတ် ၊ ညနေရေခပ်ဆင်းပြီဟေ့ ဆိုရင် ကာလသားတစ်သိုက် မျက်ဖြူဆိုက်လောက်အောင် လိုက်ပိုးကြတာ ခံခဲ့ရသူ ။ အင်းလေ . . . အသက်လည်း ၇၀ ကျော်နေမှပဲ ဟု တွေးရင်းပြုံးမိသည် ။ အဲဒီနောက် မကြာခင်မှာ အရုဏ်ဆွမ်းခံကြွလာမယ့် သံဃာတော်တွေကို လောင်းလှူဖို့ အတွက် ထမင်းတစ်အိုးတည်ထားပြီး ၊ ဘုရားရှိခိုးရန် အိမ်ရှေ့ခန်းသို့ ထွက်လာခဲ့တယ် ။

“ဘုရားစင်ရှေ့မှာ ပုဆစ်တုပ်
နှုတ်မှ တတွက်တွတ် ရွတ်ဆို
အဘွားအိုဟာ ဘုရားရှိခိုးစာတွေကို မေ့ပေါ့
ဉာဏ်ထိုင်းလေတော့
ဘယ်တော့မှ စ ၊ လယ် ၊ ဆုံး ကို
မှန်ကန်စွာ မရွတ်ဆိုနိုင်ပါ
ဘုရားရှင် ခွင့်လွှတ်တော်မူပါ”
 (ငါ့အိမ်နားက အဘွားအို - နေမျိုး)


                    -----------------------------------------------------------------------------


အပြာရောင်။ အနီရောင်။ အရောင်မဲ့များနှင့်

_______ ရ င် န င့်ေ အာ င် _____________

အခါလွန်ခြင်းများတွင် တစ်ပတ်ရစ်နောင်တများက ရှေ့ထွက်မင်းသမီးများဖြစ်ကြသည်။ ဝါကျကို ဝါကျအတိုင်းထားလိုက်သောအခါ မိုးပေါ်သို့တက်ရန် လမ်းများက မီးပွိုင့်နီကုန်ကြသည်။ နောက်တစ်ပတ်တွင် ပြုလုပ်ရန် အစီအစဉ်များက ရေခဲတုံးများနှင့်အတူ အရည်ပျော်လို့။ ခုချိန်ဆို လေပြေများနှင့် နွေဦးသည် ဆောင်းကို မထီမဲ့မြင် လုပ်ရော့နေဦးမည်။ အပြာရောင်။ အနီရောင်။ အရောင်မဲ့များနှင့်။

ထဖို့ ပျင်းရင်း ထလိုက်ချိန်မှာ ပြန်ထိုင်ဖို့ ဒွိဟများလည်း အတောင်ပံများနှင့် ရေကူးလိုက်ကြသည်။ ကမ္ဘာသည် အရင်လို နှစ်ဆယ့်သုံး နှစ်ပိုင်းတစ်ပိုင်း တိမ်းစောင်း မလည်တော့။ ပဲလှော်ဝါးရင်း ထန်းလျက်စားရင်း အသက်ကြီးလာသောအခါ နောက်ဆက်တွဲ ဇာတ်သိမ်းပိုင်းမဲ့ အတွေးအခေါ်များက ရေပေါ်တွင် ပေါလောပေါ်နေတော့သည်။ အပြာရောင်။ အနီရောင်။ အရောင်မဲ့များနှင့်။

မချိမဆန့်လူနှင့် အတောမသတ်ရောဂါတို့က မတိမ်းမယိမ်းတူနေကြပါလျှင် .. ဟူသော စာသားကို ဖြောင့်ဖြောင့်တန်းတန်း မဖတ်တတ်ခင် ကာဗွန်ဒိုင်အောက်ဆိုက်ကို တဝကြီး ရှူလိုက်ရသည်။ မြကန်သာ ကဗျာကို ဘယ်သူရေးပါသလဲ။ ရှိတ်စပီးယားတော့ မဖြစ်နိုင်ပါ။ အသက်ရှူဖို့ နှစ်ရက်လောက်မေ့ခဲ့တုန်းက ရေထဲမှာ ရောက်နေခဲ့သည်။ ပျော်ရွှင်မှုတွေ ရောင်းသော ဈေးက ဈေးကြီးနေသဖြင့် ညဈေးတန်းဘက်သို့ ငိုစရာအဟောင်းတွေ လိုက်လံရှာဖွေမိသည်။ မီးခြစ်တစ်လုံးကို ခြစ်လိုက်တော့ စိတ်တွေ ဝုန်းဝုန်းတောက်လာကြောင်း လမ်းကြုံလျှင် ပြောရပါဦးမည်။ အပြာရောင်။ အနီရောင်။ အရောင်မဲ့များနှင့်။

အီသီယိုပီးယားတွင် ၂၀၀၀ ခုနှစ်က မိုးရေထဲမှာ ငါးများ ပါလာခဲ့ဖူးသည်။ အချို့သော တိမ်တိုက်များက စက်ဝိုင်းပုံများဖြစ်ကြသည်။ လူသည် လူပီသရန် တစ်ခါတစ်ရံမှသာ လိုအပ်သည်။ မတရားပါ။ ဆန္ဒဟူသော ဝရမ်းပြေးနောက် လိုက်ဖမ်းနေကြသော်လည်း ဘယ်တော့မှ မမိလေခဲ့။ သူ့ကို ဖမ်းမိလျှင်တော့ ဆုကြေးမနည်းလှ ဟု ကြေငြာချက်ထုတ်ထားသည်။ ပိုက်ဆံအိတ်ထဲတွင် ငါးပါးသီလကို ထည့်ရင်း ကိုယ်ကျင့်တရားများကို ရောင်းစားမလို့ လုပ်တုန်း။ အပြာရောင်။ အနီရောင်။ အရောင်မဲ့များနှင့်။

တကယ်မရှိသော အရှိတရားများကို ခပ်တည်တည်နှင့် လောင်းကြေးထပ်လိုက်သည်။ အသိတရားက အောက်ကြေးပေါက်နေသည်။ လူကြိုက်မများလှ။ ဟိုတစ်နေ့က နယူးဇီလန်နှင့် ပဲရစ်မြို့များသို့ အလည်သွားလိုက်သည်။ မိုနိုပိုလီဂိမ်းပေါ်တွင် ဖြစ်သည်။ အီဂျစ်သို့ သွားချင်သော်လည်း အံစာတုံးက မကျခဲ့။ တစ်ရက်က ကောင်းကင်ကြီး နေမကောင်းဖြစ်၍ သတင်းမေးဖို့ ကြက်ဥသွားဝယ်ရသည်။ နောက်ရက်တွင် ကြက်ဥများကား သတင်းမမေးခင် လူကောင်လေးများပေါက်လာကြသည်။ မထူးဆန်းပါ။ ကဗျာနှင့် ကမ္ဘာကို မှားယွင်း သုံးစွဲမိခြင်းကြောင့် အရင်လက အပြစ်ပေးခံရသည်။ အပြာရောင်။ အနီရောင်။ အရောင်မဲ့များနှင့်။

အိတ်ကပ်ထဲတွင် အိပ်မက်တစ်ခုထည့်ထားသည်။ အရေးပေါ် ထုတ်ကြည့်ရန်ဖြစ်သည်။ ပိုးသတ်ဆေးနှင့် ပါရာစီတမော မှားသောက်မိသည့်ညက အရမ်းအိပ်လို့ ကောင်းခဲ့သည်။ အဖြေမရှိပါ။ အဘယ့်ကြောင့်ဆိုသော မေးခွန်းမရှိ၍ ဖြစ်သည်။ အဖြေမှားပါသည်။ အဘယ့်ကြောင့်ဆိုသော် မေးခွန်းမှားနေ၍ ဖြစ်ပါသည်။ မြွေတစ်ကောင်လို အမောက်ထောင်ပြလိုက်သည်။ တီကောင်တစ်ကောင် မဟုတ်ကြောင်း သက်သေပြချင်၍ ဖြစ်သည်။ ပျော်ပျော်နေပါ။ မနိုင်လျှင် သည်းခံပြီး မရှိလျှင် ရောင့်ရဲလိုက်ပါ။ လောကသည် အရင်လို နှမ်းမဖြူးတော့ ။ အပြာရောင်။ အနီရောင်။ အရောင်မဲ့များနှင့်။

ကီးဘုတ်၏ အန်းတားခလုတ်များကို သံသယဖြစ်ရင်း အင်တာနက်ဆိုသော နည်းပညာများအလယ် ကမ္ဘာပတ်လိုက်သည်။ ဘီးလုံးများအားလုံးသည် အဘယ်ကြောင့် စက်ဝိုင်းဖြစ်နေကြသနည်း။ လေးထောင့်၊ သို့မဟုတ် တြိဂံဖြစ်သင့်သည်။ အတ္တကို စပရေးဘူးတစ်ဘူးအတွင်းသို့ ဂတ်စ်နှင့်ရောထည့်ထားလိုက်သည်။ အကယ်၍ ကိုယ်ချင်းစာတရားမပါသည့် အင်းဆက်ပိုးများရောက်လာပါလျှင် သူတို့ကို ထိုစပရေးဘူးဖြင့် ဖြန်းလိုက်ရန်ဖြစ်သည်။ လူတွေကို ကျီစားဖို့ သဘာဝတရားက မိုးကြိုးများ၊ မုန်တိုင်းများ၊ ငလျင်များနှင့် စောင့်နေသည်။ လူတွေကလည်း သဘာဝတရားကို အံတုဖို့ ရေကာတာဆောက်သည်။ လျှပ်စစ်ထုတ်သည်။ ကားမောင်းသည်။ လေယာဉ်မောင်းသည်။ စက်ရုံမီးခိုးခေါင်းတိုင်များ လုပ်သည်။ နျူးကလီးယားထုတ်သည်။ အပြာရောင်။ အနီရောင်။ အရောင်မဲ့များနှင့်။
ကြယ်မရှိသော ကောင်းကင်ရပ်ဝန်းတွင် ကလေးတစ်ဦးက လကို ဦးထုပ်လုပ်ဆောင်းကာ နဂါးငွေ့တန်းကို နဂါးနိုင်ဓါးလုပ် ဆော့ကစားနေသည်။ ပိုးမင်းသားနှင့် ဂျိန်းစဘွန်း ခေတ်ကုန်သွားလျှင် အပျင်းပြေဆော့ဖို့ ကားသူခိုးဂိမ်းရှိသည်။ ပီတူးဂိမ်းရှိသည်။ အိတ်စ်ဘောက်စ်ဂိမ်းရှိသည်။ ပီအီးအက်စ်ရှိသည်။ ဒါနှင့် အားမရလျှင် ညကလပ်ရှိသည်။ အနှိပ်ခန်းရှိသည်။ အရက်ဆိုင်ရှိသည်။ ကာစီနိုရှိသည်။ ပရီးမီးယားလိဂ်ရှိသည်။ မြင်းပြိုင်ပွဲရှိသည်။ အပြာရောင်။ အနီရောင်။ အရောင်မဲ့များနှင့်။

ကန်ထဲမှာ အရင်လို ရေမပြည့်တော့။ ကြာပန်းများခူးလျှင်လည်း ဒဏ်ငွေပေးဆောင်ရဦးမည်။ ပျော်ပျော်ပါးပါး လှေလှော်ရင်း ရေနစ်ကြသူများအကြောင်း မီဒီယာများက သတင်းပေးထားသည်။ လောကသည် အရင်လို သာသာယာယာ မဟုတ်တော့။ မီးပုံးပျံ ဦးကျော်ရင်က ဖုန်းဆက်အကြောင်းကြားသည်။ သူပြုတ်ကျသေဆုံးရသည်မှာ တကယ်တော့ လုပ်ကြံခံရကြောင်း တီးတိုးပြောသွားသည်။ နတ်သျှင်နောင်ကို ဘယ်သူသတ်တာလဲ။ ကျွန်တော်မဟုတ်ပါ။ ကဒါဖီမဟုတ်ပါ။ ဘင်လာဒင်မဟုတ်ပါ။ သေချာတာက သူ့ရတုတွေကိုတော့ ခေတ်၏ ပြောင်းလဲနှုန်းနှင့် သွေးသားတောင်းဆိုမှုများက သတ်ဖို့ပြင်နေကြပြီ။ အပြာရောင်။ အနီရောင်။ အရောင်မဲ့များနှင့်။

ဇာတ်သိမ်းခန်းသည် ထင်သလိုမဟုတ်ခဲ့ပါလျှင် ကဲ့ရဲ့ဖို့ပြင်ဆင်နေကြသည်။ မီးခလုတ်ကို ဖွင့်လိုက်သည်။ လူတွေ ပျောက်ကုန်သည်။ အားလုံးလိုလိုသည် အမှောင်မှာပဲ မြင်ကြရတော့သည်။ လူကြီးများ ဘောလုံးပွဲလောင်းနေကြသည်။ ကလေးများ မိုရင်ဟိုနှင့် ဖာဂူဆန်ကို ကနောင်မင်းသားထက် ပိုသိလာကြသည်။ သွားပြီ။ ကျွန်တော်က မိုနိုပိုလီကစားရင်း အံစာတုံးက ထောင်ကျမည့် အကွက်သို့ ရောက်သွားသည်။ အခုချိန်ထိ အသက်ရှင်လာသမျှသည် အားလုံးမှာ မြင်ခဲ့ရသည်မှာ အပြာရောင်။ အနီရောင်။ အရောင်မဲ့များနှင့်။

++++++++++++++++++++++++++++++++++++++++++++++++++++++++++++++

                                                    ဟာသ

 
ကည့်မြင်တိုင်ဖြစ်ပေါ်လာပုံ

အင်္ဂလိပ်ခေတ်တွင်ဖြစ်သည်။
နယ်ချဲ့အင်္ဂလိပ်စစ်သင်္ဘောတစ်စင်း ကြည့်မြင်တိုင်ဆိပ်ကမ်းသို့ ဆိုက်ကပ်လာ၏။
ထိုဆိုက်ကပ်လာသော အင်္ဂလိပ်စစ်သင်္ဘောကြီးအား မြင်သောအခါ ဆိပ်ကမ်းရှိ လူထုကြီးက
ဝိုင်းဝန်းဆဲဆိုကြ၏။ ဆဲဆိုသံများကို ကြားသောအခါ အင်္ဂလိပ်စစ်ဗိုလ်ချုပ်တစ်ဦးက
စစ်သင်္ဘောပေါ်မှနေ၍ စကားတစ်ခွန်းဆို၏။

COME AND DIE !
(ကမ်း အန် ဒိုင်း)

ထိုစကားစုအား အမြန်ပြောရာမှ ကမ်းအန်ဒိုင်း ကမ်းအန်ဒိုင်းနှင့် ယခု ကြည့်မြင်တိုင် ဟူ၍ ဖြစ်လာလေတော့သည်။

=================================================

ပုစွန်တောင် ဖြစ်ပေါ်လာပုံ

အင်္ဂလိပ်ခေတ်တွင်ဖြစ်သည်။
နယ်ချဲ့အင်္ဂလိပ်စစ်သင်္ဘောတစ်စင်း ပုစွန်တောင်ဆိပ်ကမ်းသို့ ဆိုက်ကပ်လာ၏။
ထိုအခါ အင်္ဂလိပ်တို့အားမုန်းတီးသူလူတစ်ယောက်သည် စစ်သင်္ဘောပေါ်သို့ အန္တရာယ်ပြုရန်
ပြေးတက်သွား၏။

ထိုမြင်ကွင်းကိုမြင်သောအခါ အင်္ဂလိပ်စစ်ဗိုလ်ချုပ်ကြီးသည် ထိတ်လန့်တကြားဖြင့် သူ၏ရဲဘော်များအား အမိန့်ပေး၏။ ထိုအမိန့်မှာ..

PUSH HIM DOWN ! ဟူ၍ဖြစ်သည်။
(ပွတ်ရ်ှဟင်းမ် ဒေါင်း)

ထိုအင်္ဂလိပ်စကားစုအား အမြန်ပြောရာမှ ပွတ်ရ်ှဟင်းမ်ဒေါင်း ပွတ်ရ်ှဟင်းမ်ဒေါင်းနှင့် ယခု ပုစွန်တောင် ဟူ၍ ဖြစ်လာလေသည်။

( N P )


တော်ချက်က
-------------

စာသင်ခန်းတစ်ခုအတွင်း သမိုင်းဘာသာရပ်သင်ကြားနေချိန်ဖြစ်သည် ။
ဆရာမ              - ကဲ . . ကလေးတို့ရေ ၁၈၀၉ ခုနှစ်က ဘာဖြစ်ခဲ့သလဲ ။
ကျောင်းသားများ  - အေဗရာဟမ်လင်ကွန်း ကို မွေးဖွားခဲ့ပါတယ် ။
ဆရာမ              - အေး ဟုတ်ပြီကွဲ့ ။ နောက်တစ်ခု ထပ်မေးမယ် ။
                         ၁၈၁၉ ခုနှစ်တုန်းကရော ဘာဖြစ်ခဲ့သလဲကွဲ့ ။
ကျောင်းသားများ  - အေဗရာဟမ်လင်ကွန်း ဆယ်နှစ်ပြည့်ပါတယ် ဆရာမ ။


=================================================
မေမေမှာထားလို့
-----------------

ဆရာမ   - ကလေးတို့ရေ . . မနက်ဖြန် ပလူတိုဂြိုလ်နဲ့ မားစ်ဂြိုလ်အကြောင်းလေ့လာကြမယ်ကွဲ့ .
              ကျောင်းမပျက်ကြနဲ့နော် ။
ဖိုးစီလေး - မနက်ဖြန် သားကျောင်းလာလို့မရဘူး ဆရာမ ။
ဆရာမ   - ဘာဖြစ်လို့လဲ ဖိုးစီ ။
ဖိုးစီလေး - မေမေကမှာထားတယ် ။ အိမ်နဲ့အဝေးကြီးတွေကို မသွားပါနဲ့တဲ့ ။

=================================================

ရှာဖွေတွေ့ရှိသူ
---------------
ဆရာမ     - မောင်ဖြူ  . . ဒီကမ္ဘာ့မြေပုံမှာ အမေရိကတိုက်က ဘယ်ဟာလဲ ရှာပြပါဦး ။
မောင်ဖြူ   - ဒီမှာပါ ဆရာမ ။
ဆရာမ     - အေး ဟုတ်ပြီကွဲ့ ။ ဒီတစ်ခါ မောင်ဖိုးလုံး အလှည့် ။
                အမေရိကတိုက်ကို ဘယ်သူက ရှာဖွေတွေ့ရှိခဲ့တာလဲ ။
မောင်ဖိုးလုံး - မောင်ဖြူ ပါ ဆရာမ ။
ဆရာမ      -  ဟေ  ။

=================================================

သူပြောတာလဲ ဟုတ်တာပဲ
---------------------------

ဆရာမ     - ဟေ့ မောင်ဖြူ . . မင်းအဖေအသက်ဘယ်လောက်ရှိပြီလဲ
မောင်ဖြူ   - ကျွန်တော့အသက်နဲ့အတူတူပါပဲ ဆရာမ
ဆရာမ     - ဟေ .. ဘယ်လိုဖြစ်နိုင်မှာလဲကွ ။ မင်းအဖေနဲ့မင်းနဲ့ အသက်အတူတူဆိုတာ ။
မောင်ဖြူ   - ဖြစ်နိုင်ပါတယ် ဆရာမ ။ အဖေက ကျွန်တော့ကိုမွေးတော့မှ သူလဲ အဖေဖြစ်တာပါ ။
                ဒါကြောင့် ကျွန်တော့အသက်နဲ့ အဖေရဲ့အသက် အတူတူပါပဲ ။

( Y Y )

++++++++++++++++++++++++++++++++++++++++++++++++++++++++++++++
                                              ၀တ္တုတို


အဖြူရောင် သုဿာန်မှာ စံပယ်တွေ ဖွေးခနဲ ပွင့်

________ ဖိုးေ ဇာ် ( ဓာ တု ) ____________


သူ့တွင် မြွေဖြူလေးတစ်ကောင်ရှိသည် ။ ထိုမြွေဖြူလေးကို စံပယ်ဟု အမည်ပေးထား၏ ။ မြွေဖြူလေးသည် အထီးလား အမလား ဆိုတာ သူမသိ ။ သူ့တွင် စံပယ်ဟု အမည်ရသော မြွေဖြူလေးတစ်ကောင်ရှိသည် ။

သူ့တွင် စံပယ်ဟု အမည်ရသော ချစ်သူတစ်ယောက်ရှိသည် ။ ထို စံပယ်ဟူသည့် အမည်အား သူမ၏ ဖခင်မှ ပေးထားခြင်းဖြစ်၏ ။ သူမ၏ ဖခင်က စံပယ်ဟူသော အမည်ကိုပေးသောကြောင့် ၊ သူမက စံပယ်ဟူသော အမည်ကို ယူလိုက်ရ၏ ။ မင်္ဂလာတရားတော်နှင့် ညီ၊ မညီတော့ မသိ ။ သူမ၏ဖခင်တွင် စံပယ်ဟု အမည်ရသော မြွေဖြူတစ်ကောင် မရှိချေ ။

စံပယ်သည် အလွန်တရာမှပင် ပါးနပ်လှ၏ ။ သူ့ကိုတွေ့သည့်အခါတိုင်းတွင် လျှာကလေးထုတ်ပြ၍ နှုတ်ဆက်တတ်လေသည်။ စံပယ်သည် ညအိပ်ခါနီးတွင် မျက်မှာပြင်တစ်ခုလုံးကို သနပ်ခါးအပြည့်လူးတတ်၏ ။ စံပယ်သည် အိပ်စက်နေသောအခါတွင် သူမဟုတ်သည့်အလား မှန်ဘောင်ထဲတွင် ငြိမ်သက်စွာ အိပ်နေတတ်သည် ။ စံပယ်သည် တစ်ခါတရံတွင် ဘီယာသောက်တတ်၏ ။ မူးသွားသောအခါ ဟိုရစ်ဒီရစ်ဖြင့် ပြဿနာရှာတတ်လေသည် ။ စံပယ်အကြိုက်ဆုံးသော အစားအစာမှာ ဖားကောင်ငယ်ကလေးများဖြစ်သည် ။ စံပယ်သည် မိုးခြိမ်းသံကို ကြောက်၏ ။ ကြောင်ကိုကြောက်၏ ။ စံပယ်သည် ရော့ခ်ဂီတကို နှစ်သက်၏ ။ ပုလွေသံကို နှစ်သက်၏ ။

သူသည် စံပယ့်ကို ခေါင်းလျှော်ပေးရ၏ ။ သူသည် စံပယ့်ကို ရေချိုးပေးရ၏ ။ စံပယ်နေမကောင်းဖြစ်လျှင် သူပြုစုရသည် ။ စံပယ် အရေခွံလဲလျှင် သူဂရုစိုက်ရသည် ။ သူသည် စံပယ့် ဘဝဖြစ်၏ ။ စံပယ်သည် သူ့ဘဝ ဖြစ်၏ ။ သူသည် လူယောက်ျားတစ်ယောက်ဖြစ်၏ ။ စံပယ်သည် လူမိန်းမတစ်ယောက်ဖြစ်၏ ။ စံပယ်သည် မြွေဖြူတစ်ကောင်ဖြစ်၏ ။

တစ်နေ့တွင် သူအားပေးသော မန်ချက်စတာယူနိုက်တက်အသင်း ပရီးမီးယားလိဂ်ဖလားရရှိသွားသည် ။ တစ်နေ့တွင် သူချစ်သော စံပယ်သေဆုံးသွားသည် ။ သူ စံပယ့်အား ကောင်းမွန်စွာ သင်္ဂြိုလ်ခဲ့၏ ။ စံပယ့် ဈာပနပွဲတွင် ဖဲဝိုင်းမပါ ။ ရက်လည်မပါ ။ မည်သည့် ဆွေမျိုးအသိုင်းအဝိုင်းမှ မပါ ။ စံပယ့်ဈာပနအား သူနှင့် စံပယ် နှစ်ယောက်တည်း ကျင်းပခဲ့သည် ။ စံပယ့်ဈာပန အပြီး တစ်လခန့်အကြာတွင် စံပယ်သေဆုံးသွား၏ ။ သူ့ဘဝထဲမှ စံပယ်ဟူသည့် အမည်နာမ လွင့်စင်ထွက်ပြေးသွားသည် ။ စံပယ် မကြားနိုင်တော့ ။ သူ့အော်သံများအား စံပယ်လုံးဝမကြားနိုင်တော့ ။  စံပယ်သေဆုံးပြီး တစ်လခန့်အကြာတွင် စံပယ်သေဆုံးသွားခဲ့သည် ။

သူသည် လူယောက်ျားတစ်ယောက်ဖြစ်၏။
စံပယ်သည် လူမိန်းမ တစ်ယောက်ဖြစ်၏။
စံပယ်သည် မြွေဖြူတစ်ကောင်ဖြစ်၏။
သူသည် မြွေဖြူတစ်ကောင်ဖြစ်၏။

စံပယ်သေဆုံးပြီး တစ်လခန့်အကြာတွင် စံပယ်သေဆုံးသွားခဲ့သည် ။ ထို့နောက် တစ်လခန့်အကြာတွင် သူသေဆုံးသွားခဲ့သည် ။
သူသည် သူ့ကိုယ်သူ မြွေဖြူတစ်ကောင်ဟု ထင်နေသော လူယောက်ျားတစ်ဦးဖြစ်သည် ။ သူသည် သူ့ကိုယ်သူ လူယောက်ျားတစ်ဦးဟု ထင်နေသော မြွေဖြူတစ်ကောင်ဖြစ်သည် ။

                    -----------------------------------------------------------------------------

အဖြူရောင်တံတိုင်းမှာ ထိုးထားတဲ့ တက်တူး

_____ ဆူး ခ က် မ င်း _________________


(၁)

မေကျော်သည် အိပ်မှုန်စုံမွှားဖြင့် သွားတိုက်နေရာမှ မီးဖိုတွင်းရှိ သူ့ကို လှမ်းအော်၏။

"ဖိုးဇော်ရေ .. ငါ့ဖို့ ကြက်ဥတစ်လုံး ကြော်ပေးစမ်းပါ .. ပေါင်မုန့်ပါ နှစ်ချပ်လောက် မီးကင်ထားလိုက်"

သူ မေကျော့်အတွက် နံနက်ခင်းစာ ပြင်ဆင်ပေးပြီးနောက် ရေးလက်စဝတ္ထုအား အဆုံးသတ်ရန် စာရေးစားပွဲသို့ ထွက်လာခဲ့သည်။ ဝတ္ထုထဲရှိ ဇာတ်ကောင်နှစ်ဦး (မင်းသားနှင့် မင်းသမီး) သည် သူနှင့် မေကျော် ဖြစ်၏။ မေကျော်က ဂါဝန်ရှည်ဖြူဖျော့ဖျော့ကို ဝတ်ထားပြီး၊ ချောက်ကမ်းပါးစွန်းထိပ်တွင် မတ်တပ်ရပ်နေသည်။ သူမ၏ ဂါဝန်အနားစတို့သည် တဖျတ်ဖျတ် လှုပ်ခါနေ၏။ ထို့နောက် သူမ လက်နှစ်ဖက်ကို ဆန့်တန်းလိုက်လေသည်။ အို .. သူမ .. သူမ ချောက်ထဲကို ခုန်ချလိုက်တော့မှာလား .. မဖြစ်ဘူး .. မဖြစ်ရဘူး .. ငါ မင်းကို ဘယ်နည်းနဲ့မှ အဆုံးရှုံးမခံနိုင်ဘူး မေကျော် .. ။ သူ မေကျော့်ထံသို့ အရူးတစ်ယောက်လို တဟုန်ထိုး ပြေးထွက်သွားသည်။

"နင့် ပေါင်မုန့်မီးကင်က နည်းနည်းတူးသွားတယ် .. အသုံးကိုမကျဘူး .. ဒါလေးလုပ်တာကိုပဲ"

"ဟာ .. ကျော်ကျော်ကလည်း .. ဒီမှာ စာရေးနေတာကွ .. အရှိန်တောင်ရနေမှ"

မေကျော်က သူ မဟုတ်သလိုပဲ၊ ကော်ဖီခွက်လေးကိုင်ကာ လေချွန်ရင်း ခြံထဲဆင်းသွား၏။

(၂)

မေကျော်သည် သူ၏ ရှားရှားပါးပါး မိန်းကလေးသူငယ်ချင်းဖြစ်သည်။ နယ်မှနေ၍ ကျောင်းလာတက်သော သူမသည်၊ ကျောင်းပြီးသွားသောအခါတွင်လည်း နယ်မပြန်တော့ဘဲ တစ်ယောက်တည်းသမားဖြစ်သော သူ့အိမ်တွင် တက်နေလေ၏။ မေကျော်နှင့် သူသည် အချစ်ဆုံး သူငယ်ချင်းများသာ ဖြစ်သည်။

ယောက်ျားပျိုတစ်ဦးနှင့် မိန်းမပျိုတစ်ဦးတို့ သွေးမတော်သားမစပ်၊ သမီးရည်းစားလည်းမဟုတ်၊ လင်မယားလည်းမဟုတ်ပါဘဲ တစ်အိမ်တည်းတွင် နေကြခြင်းမှာ "ဘယ်လိုကြီးလဲဟ" ဟု ထင်စရာရှိသည်။ သူ့ဘက်က မည်သည့်စည်းကိုမှ ဖောက်ဖျက်ခဲ့ခြင်းမရှိသလို၊ သူမကလည်း ပတ်ဝန်းကျင်ကို ဂရုမစိုက်တတ်။ သူနှင့် မေကျော်တို့ တစ်အိမ်တည်းတွင် အတူနေကြ၏။

(၃)

သူမ စပယ်ယာကို ငါးထောင်တန် ပေးလိုက်သည်။ စပယ်ယာက နှစ်ရာတန်မပါဘူးလား အမ်းစရာမရှိ ဟု ပြော၏။ သူမနံဘေးမှလူက တစ်ထောင်တန်ဖြင့် ကားခပေးသည်။

"အဲ့ဒါ နှစ်ယောက်စာ ယူလိုက်"

သူမနံဘေးမှလူက လှည့်ကြည့်၏။ ကတ်ကိုဘိန်းနှင့် အတော်ဆင်လေသည်။

"ကျွန်မနာမည် မေကျော် .. ဖုန်းနံပါတ်က .. ၀၉-၅၀၉၀××× .. ရှင့်အကြွေး နောက်ကြုံရင် ဆပ်မယ် .. အိုကေလား"

ကတ်ကိုဘိန်း အူကြောင်ကြောင်ဖြင့် ခေါင်းညိတ်၏။

(၄)

"နင် အထဲမှာစောင့်နေ ဖိုးဇော် .. ငါ့ဖို့ အက်စ်ပရက်စ်စို တစ်ခွက် မှာထားပေး"

ကော်ဖီဆိုင်လေးအတွင်းမှ အဲကွန်းလေက လတ်ဆတ်အေးမြနေသည်။ အနောက်တိုင်းသီချင်းသံ ခပ်တိုးတိုးကိုလည်း ကြားရ၏။ သူ အက်စ်ပရက်စ်စို နှစ်ခွက် မှာပြီး ကျသင့်ငွေ ရှင်းကာ၊ ကဗျာစာအုပ်ထုတ်ဖတ်ရင်း မေကျော့်ကို စောင့်နေလိုက်သည်။ ကဗျာဆရာ ငြိဏ်းဝေ၏ "ဂ ဃ န ဏ" ။

ခဏကြာတော့ မေကျော် ရောက်လာသည်။ လက်ထဲတွင် မုန့်ထုပ်တစ်ထုပ် ဆွဲလျက်။

"ဘာတွေလဲ ကျော်ကျော်"

"မုန့်လက်ကောက်"

အက်စ်ပရက်စ်စို နှင့် မုန့်လက်ကောက် ဘာဆိုင်လို့လဲ ဟု သူ မမေးတော့။ မေကျော်က ဒီလိုပဲ။ စိတ်ထင်ရာ လျှောက်လုပ်တတ်တာ သူမရဲ့အကျင့်။

"ဖိုးဇော်"

"အင်း"

"ငါ ချစ်ရမယ့်သူ တွေ့နေပြီထင်တယ်"

"အင်း"

(၅)

"ရှင့်မှာ စေ့စပ်ထားတဲ့သူ ရှိတာလား"

"အင်း .. လူကြီးမိဘတွေ စီစဉ်တာပါ .. ကိုယ့်ဆန္ဒမပါဘူး"

"ဖျက်သိမ်းလိုက်ပါ"

". . . . . . ."

"ရှင့် လက်သူကြွယ်က စေ့စပ်လက်စွပ် ပေးစမ်းပါ"

". . . . . . ."

သူမ ကတ်ကိုဘိန်း၏ လက်ကိုဆွဲ၍ လက်စွပ်ချွတ်ယူလိုက်သည်။ ထို့နောက် သူမ,သောက်လက်စ ဝိုင်ဖန်ခွက်တွင်းသို့ ပစ်ထည့်ပြီး တရှိန်ထိုး မော့သောက်ချလိုက်လေ၏။

"ရှင့်ကို ကျွန်မ ချစ်တယ်"

(၆)

"ငါ လက်ထပ်တော့မယ် ဖိုးဇော်"

"အင်း .. ကောင်းတာပေါ့"

"ဘယ်သူလဲ .. ဘယ်ကလဲ လို့ .. မမေးတော့ဘူးလား"

"ငါမှ မသိချင်တာ"

"တားရော မတားတော့ဘူးလား"

"ငါက နင့်ရဲ့ အုပ်ထိန်းသူမှမဟုတ်တာ .. ငါက .. နင့်ရဲ့ .. နင့်ရဲ့ .."

"ဘာဖြစ်လဲ ဖိုးဇော် .. ဆက်ပြောလေ"

"ငါက နင့်ရဲ့ .. အချစ်ဆုံးသူငယ်ချင်းပဲလေ"

(၇)

သူ နာရီကို မမှိတ်မသုန် စိုက်ကြည့်နေသည်။ နေ့လည် ၁၂ နာရီထိုးရန် စက္ကန့်ပိုင်းမျှသာ လိုတော့သည်။ နေ့လည် ၁၂ နာရီသည် မေကျော့်မင်္ဂလာပွဲ စတင်ကျင်းပမည့်အချိန်ဖြစ်၏။ တဖြည်းဖြည်း နီးကပ်လာပြီ။ ၉ .. ၈ .. ၇ .. ၆ .. ၅ .. ၄ .. ၃ .. ၂ .. ၁ .. .. .. .. .. ..

"ခွမ်း !!!"

သူ ဘေ့စ်ဘောရိုက်တံဖြင့် နာရီကို အားကုန်လွှဲရိုက်လိုက်ခြင်းဖြစ်သည်။ သူ့အိမ်ခန်းလေး၏ ကြမ်းပြင်တွင် နာရီမှန်ကွဲစများ ပြန့်ကြဲသွား၏။

"ကဲ .. အချိန်ကျပြီ မိန်းကလေး .. မင်း ဘာလုပ်ချင်လဲ"

မိန်းမပျိုသည် သူမ၏ လက်သူကြွယ်မှ လက်စွပ်ကိုချွတ်၍ ဝိုင်ဖန်ခွက်အတွင်းသို့ ပစ်ထည့်လိုက်သည်။ ထို့နောက် သူ့ထံ ဖန်ခွက်ကို ကမ်းပေးလိုက်၏။

"ရှင့်ကို ဒါ သောက်စေချင်တယ် ကိုဖိုးဇော် .. ပြီးရင် .."

"ကျွန်မကို နမ်းစေချင်တယ်"

ထိုမိန်းမပျိုသည် ကတ်ကိုဘိန်း၏ မတော်လိုက်ရသော ဇနီးလောင်းဖြစ်သည်။


                    -----------------------------------------------------------------------------


ကျွန်တော့်မှာ ပင်လယ်တစ်ခု ရှိတုန်းက
______ သ စ္စာ နီ _______________

(၁)

ကျွန်တော့်မှာ ပင်လယ်တစ်ခုရှိတုန်းက ..

ကျွန်တော့်မှာ ဂျင်းဘောင်းဘီတစ်ထည်ရှိသည်။ ကျွန်တော့်မှာ ကောင်မလေးတစ်ယောက်ရှိသည်။ ကျွန်တော့်မှာ ဂစ်တာတစ်လက်ရှိသည်။ ကျွန်တော့်မှာ သီချင်းတစ်ပုဒ်ရှိသည်။ ကျွန်တော့်မှာ ကျောပိုးအိတ်တစ်လုံးရှိသည်။ ကျွန်တော့်မှာ ကြောင်နက်တစ်ကောင်ရှိသည်။ ကျွန်တော့်မှာ အိပ်မက်တစ်ခုရှိသည်။

ကျွန်တော့်မှာ ပင်လယ်တစ်ခုရှိတုန်းက ..

ကျွန်တော့်မှာ အိုအေစစ်ကို သိုဝှက်ထားသော အနီရောင်သဲကန္တာရတစ်ခုရှိသည်။ ရွက်လွှင့်နေသော ဦးတည်ရာမဲ့ ခြေလှမ်းများ ရှိသည်။ ဘယ်သောအခါမှ နေမထွက်သော မိုးကုတ်စက်ဝိုင်းတစ်ခုရှိသည်။ ကျွန်တော့်မှာ အရိုအသေကင်းမဲ့ခြင်းဇုံသို့ ထွက်ခွာသွားသည့် အဆန်ရထားတစ်စင်းရှိသည်။ မီးတောက်လောင်နေသည့် အက္ခရာများဖြင့် တည်ဆောက်ထားသော ကဗျာတစ်ပုဒ်ရှိသည်။ မိုးခါးရည်တံဆိပ်ဖြင့် အဖုံးပိတ်ထားသော ရေသန့်တစ်ဗူးရှိသည်။ ကျွန်တော့်မှာ လူမရောက်သော တောင်ကုန်းထိပ်၌ မျှော်လင့်ခြင်း၏ ကားစင် ရှိသည်။ “မြေခွေးများ မဝင်ရ” ဟု ဆိုင်းဘုတ်ချိတ်ထားသော စပျစ်ခြံတစ်ခြံရှိသည်။ အသံတိတ်ကိရိယာ တပ်ဆင်ထားသော ရင်ထဲက မိုးကြိုးတစ်ခု ရှိသည်။

(၂)

ကျွန်တော့်မှာ ပင်လယ်တစ်ခုရှိတုန်းက ..

ကျွန်တော်သည် အပေါင်ဆိုင်ပို့ထားသော ဂစ်တာတစ်လက်ကို ပြန်မရွေးနိုင်ဘဲ အဆုံးခံလိုက်ရသည်။ ကြည်အေး၏ မြနန္ဒာဝတ္ထုကို ပြင်သစ်မင်းသမီး ကက်သရင်းဒညုနှင့် ရုပ်ရှင်ရိုက်ကူးရန် ဇာတ်ညွှန်းတစ်ပုဒ်ရေး၍နေသည်။ တောမခိုဘဲနှင့် သူပုန်ဘွဲ့ ခံယူထားသည်။ ကျွန်တော်သည် ကျွန်တော်ကြိုက်သော ကောင်မလေးအိမ်ရှေ့သို့ တစ်နေ့ကိုးခေါက် မှန်မှန်လျှောက်သည်။ ကောင်စီရုံးဆိုင်းဘုတ်ကို ခဲနဲ့ သွားပေါက်သည်။ ဟစ်ပီဝါဒနှင့် လက်ဝဲဝါဒကို ပျားရည်လုပ်သောက်သည်။ ကျွန်တော်သည် အချိန်ကာလများကို ဖဲရိုက်ခြင်းဖြင့် အလျော်အစားလုပ်သည်။ တော်လှန်ရေးများကို လက်ဖက်ရည်နှင့် မြည်းသည်။ မယ်သီတာမပါသော လေးတင်ပွဲကို ဝင်သည်။ ကျွန်တော်သည် ပင်လယ်ကို ရွှေငါးတစ်ကောင်လို မွေးထားသည်။ ကျောင်းစာအုပ်များကို ပိဿာချိန်ဖြင့် ရောင်းစားသည်။

(၃)

ကျွန်တော့်မှာ ပင်လယ်တစ်ခုရှိတုန်းက ..

ထိုပင်လယ်သည် ကျွန်တော်သွားလေရာနောက် အရိပ်လို အမြဲလိုက်တတ်သည်။ ပင်လယ်ကို ကျွန်တော်သည် တစ်ခါတရံ ကျောပိုးအိတ်ထဲ၊ တစ်ခါတရံ ဂျင်းဘောင်းဘီအိတ်ထဲ၊ တစ်ခါတရံ ရင်ထဲထည့်ကာ ယူဆောင်သွားလေ့ရှိသည်။ တစ်ခါတရံ ကျွန်တော်သည် ပင်လယ်ကမ်းစပ်တွင် ရပ်ကာ ပင်လယ်ကို မှန်တစ်ချပ်လို ငုံ့ကြည့်တတ်သည်။ လသာသောညများ၌ ပင်လယ်ကို ဖြန့်ခင်းကာ ကျွန်တော်အိပ်စက်ချင်အိပ်စက်တတ်သည်။ တစ်ခါတရံ ပင်လယ်သည် ကျွန်တော်နှင့် အရက်အတူတူသောက်သည်။ (တစ်ခုတော့ရှိသည်။ သူက ဝိုင်သာသောက်လေ့ရှိ၏။) တစ်ခါတရံ ပင်လယ်နှင့်ကျွန်တော် စစ်တုရင်ထိုးကြသည်။ (သူက အမြဲတမ်း အဖြူရုပ်ကိုင်လေ့ရှိ၏။) တစ်ခါတရံ ပင်လယ်၏ ပုံတူကို ကျွန်တော် ပန်းချီရေးသည်။

ကျွန်တော့်မှာ ပင်လယ်တစ်ခုရှိတုန်းက ..

ပင်လယ်သည် လက်ဖက်ရည်ဆိုင်စားပွဲတွင် လှိုင်းထန်ချင်ထန်သည်။ ပင်လယ်သည် အနုပညာဟောင်း၊ တစ်ပါတီအာဏာရှင်စနစ်၊ ပုတ္တောဝါဒဆုံးမစာ၊ စစ်ပွဲများ နှင့် အညံ့ခံရေးစိတ်ဓာတ်ကို စုတ်မြိုနစ်မြုပ်စေသည်။ ပင်လယ်သည် အိပ်မက်ကမ်းခြေများကို တောက်ပစေသည်။ ပင်လယ်သည် ညအခါ ငွေလရောင်ကို တိတ်တဆိတ်လက်ခံချင်လက်ခံသည်။ ပင်လယ်သည် ဟောလီးဝုဒ်က မင်းသမီးတစ်ယောက်နှင့် ရည်းစားထားချင်ထားသည်။ ပင်လယ်သည် ရှိတ်စပီးယားနှင့် ပုခုံးချင်း တိုင်းချင်တိုင်းသည်။ ပင်လယ်သည် ရော့ခ်အင်ရိုးလ်ကသော်လည်း ကင်တပ်ကီကြက်ကြော် မကြိုက်။ ပင်လယ်သည် မိဘမေတ္တာ၊ အစဉ်အလာယဉ်ကျေးမှု၊ ပညာတတ်၊ ပိုက်ဆံရှာဖွေခြင်း၊ ဓနရှင်ပေါက်စ အတွေးအခေါ်၊ တိုက်ပုံအင်္ကျီ၊ ခေါင်းလိမ်းဆီ၊ ဒစ်ပလိုမေစီ၊ လေးလုံးစပ်ကာရံ တို့ကို သောင်ပြင်ပေါ် ပို့ပစ်သည်။ ပင်လယ်သည် ဂဠုန်တွေ ဆားချက်တာ လက်မခံ။ သွေးတိုးရောဂါမရှိ။ ဘဏ်ငွေစာရင်းမရှိ။

(၄)

ကျွန်တော့်မှာ ပင်လယ်တစ်ခုရှိတုန်းက ..

အစိမ်းရောင်တောင်တန်းများ၌ ပင်လယ်တစ်ခုမရှိ။ မော်စီတုံး၌  ပင်လယ်တစ်ခုမရှိ။ တော်လှန်ရေးကောင်စီ၌ ပင်လယ်တစ်ခုမရှိ။ သီတင်းကျွတ်ပွဲတော်၌ ပင်လယ်တစ်ခုမရှိ။ ပင်လယ်ဓားပြတစ်ဦး၌ ပင်လယ်တစ်ခုမရှိ။ စတော့ရှယ်ယာဈေးကွက်၌ ပင်လယ်တစ်ခုမရှိ။ သေနတ်ပြောင်းဝ၌ ပင်လယ်တစ်ခုမရှိ။ သေနတ်ပြောင်းဝ၌ ပင်လယ်တစ်ခုမရှိ။ ရာသီအလိုက်ပွင့်သောပန်းများ၌ ပင်လယ်တစ်ခုမရှိ။ ပိုဆိုဒွန်းမှာ ပင်လယ်တစ်ခုမရှိ။

ကျွန်တော့်မှာ ပင်လယ်တစ်ခုရှိတုန်းက ..

ဗီယက်နမ် နှစ်နိုင်ငံ မပေါင်းစည်းသေးပါ။ ရှယ်လက်ဖက်ရည်တစ်ခွက် ၂၅၀ ကျပ် မဖြစ်သေးပါ။ သင်ဇာဝင့်ကျော် ဟိုးလေးတကျော် မဖြစ်သေးပါ။ ကျားပေါက် သီချင်းမဆိုသေးပါ။ မြေမှုန်လွင် မမွေးဖွားသေးပါ။ ရန်ကုန်မြို့ကြီး လျှပ်စစ်မီး မပျက်သေးပါ။ မြစ်ဆုံစီမံကိန်း မပေါ်ပေါက်သေးပါ။ ၂၀၁၂ ကြားဖြတ်ရွေးကောက်ပွဲ မကျင်းပရသေးပါ။ ဒေါ်အောင်ဆန်းစုကြည်ဓာတ်ပုံများ ပလက်ဖောင်းပေါ်မှာ မရောင်းကြသေးပါ။ တစ်နိုင်ငံလုံး ကြက်ဆူပင် မစိုက်ကြသေးပါ။ မင်းသား ကျော်ဟိန်း ဘုန်းကြီးမဝတ်သေးပါ။

ကျွန်တော့်မှာ ပင်လယ်တစ်ခုရှိတုန်းက ..


                      -----------------------------------------------------------------------------

 
အစိမ်းရင့်ရောင် တိမ်တိုက်များ အကြောင်း
________ တ ည် တံ့ ( G . B . K ) ______________

(၁)

နိဒါန်းနှင့် နိဂုံးသည် ထင်သလောက်လည်း ကွာဝေးလိမ့်မည်ဟု အာမဘန္တေမရှိ။ မီးခိုးမှိုင်းရောင် ကောင်းကင်သည် ဘယ်ဘက်ရင်အုံတွင် ပိုမို အုံ့ဆိုင်းနေ၏။ မိုးရွာတော့မှာလား။ ရွာပါ၊ သဘောရှိ ရွာလိုက်ပါ။ မိုးတစ်စက်တစ်ပေါက်သည် အသက်လောက်နာကျင်ရကြောင်း တစ်သိန်းနှင့် တစ်ကြိမ်မြောက် ဋီကာမဖွင့်လိုတော့။ မြား အစင်းပေါင်း ကုဋေကုဋာကြားတွင် အယောင်ဆောင်ထားသော မိုးရေတုအချို့ လိမ့်ဆင်းသွားလိမ့်မည်ကို မည်သူမှလည်း တခမ်းတနား မှတ်တမ်းတင်နေလိမ့်မည် မဟုတ်ပါ။ ငါသိလို့ ငါရှိခြင်းမဟုတ်။ ငါရှိရဲ့လား ဟုပင် ဝေဝါးနေရသည့်အဖြစ်။ တိမ်တိုက်တို့၏ တစ်နေရာရာ၌ ယန်းပေါဆတ်နှင့် တွေ့လျှင် ထိုကိစ္စကို ကောင်းစွာ အငြင်းပွားရပေဦးမည်။

သြကာသလောကကြီးတစ်ခုလုံး စိမ်းနေသည်။ ကောင်းကင်ကြီး စိမ်း၏၊ အသက်ရှူသံများ စိမ်း၏၊ ဖြတ်ပြေးသွားသော လေရူးလေပွေများ စိမ်း၏၊ ရင်ဘတ်တစ်ခွင်ကို အစိမ်းရောင်များ ပက်ဖြန်းသုတ်လိမ်းလိုက်သောအခါ နာကျင်မှုသည် တဒင်္ဂ ငုတ်လျှိုးပျောက်ကွယ်သွားသလိုလိုလို ရှိ၏။ သို့သော် တကယ်တော့ ပျောက်မသွား။ အချိုပြီးမှ လာသော အခါးသည် မူလထက် ဂုဏ်သတ္တိနှစ်ဆတိုးတတ်ကြောင်း နားလည်နိုင်ရန် နှလုံးသားတစ်စုံကို ကားစင်ပို့လိုက်ရသည်။

တစ်ချိန်တုန်းက ရယ်မောသံသဲ့သဲ့သည် ခရမ်းပြာရောင်ကောင်းကင်ပြင်တွင် တိမ်လွှာတိမ်တိုက်တို့ကို လှပစွာ ရေးခြယ်လိုက်သည်။ ဝေ့ဝဲကြွေကျလာသော အနူးညံ့ဆုံး ပွင့်ဖတ်များကို စီရီလိုက်သောအခါ အနာဂတ်သည် ပန်းခင်းလမ်းတစ်ခု ဖြစ်သွားခဲ့ဖူးသည်။ သူမ၏ နီထွေးသော နှုတ်ခမ်းအစုံသည် ပူနွေးသောရင်ခုန်သံကို ထိန်းညှိပေးနေ၏။ ညင်းသွဲ့တိုးဖွသော စကားသံများ၊ ကက်ပချီနိုကော်ဖီနှစ်ခွက်နှင့် ကဗျာတစ်ပုဒ် ရှိသည်။ ဘာလိုပါသေးသနည်း။
 
ကြိုးတစ်ချောင်းခိုင်မြဲရန် တကယ်တမ်းလိုအပ်သည့်အရာသည် တစ်ဖက်စီမှ အလျှော့အတင်းကိုထိန်းညှိပေးသော လက်တစ်စုံပင် ဖြစ်ကြောင်း သိလိုက်ရချိန်တွင် မျက်ရည်စများ အငွေ့ပျံခဲ့ပြီးပြီ။ အခါနှောင်းတို့မည်သည် တိမ်တိုက်မည်းများကိုပါ တပါတည်း သယ်ဆောင်လာတတ်၏။ ရွာပါ၊ ရွာလိုက်ပါ။ အမုန်းတီးဆုံးသော မိုးရေစက်များ ကုန်ဆုံးသွားလျှင် ရွှေခြည်ဖျော့ဖျော့ တဖန်ပြန်လည်လင်းလက်လာနိုင်ကောင်းပါရဲ့။

(၂)

ဘဝသည် သူမနှင့်အနုပညာပင် ဖြစ်၏။ တစ်ခုထုတ်ယူလိုက်သောအခါ အခြားတစ်ခု ကြွင်းကျန်ပါလိမ့်မည်။ သို့သော် ယင်းတို့အနက် မည်သည်မှ ကျွန်တော့်ကို ထားရစ်ထွက်ပြေးသွားလိမ့်မည်မဟုတ်ဟု သေချာခဲ့ဖူးသည်။ တဖွဲဖွဲ လွင့်ပါးကျဆင်းနေသော မိုးစက်ရေမှုန်ငယ်လေးများ မပျောက်ကွယ်မီ နေခြည်လဲ့လဲ့ တိုးထွက်လာသောအခါ မိုးကုတ်စက်ဝိုင်းကျယ်ကြီးကို နောက်ခံပြုလျှက် ခုနစ်ရောင်ခြယ် သက်တန့်တစ်စင်း လှပစွာဖြစ်တည်လာလိမ့်မည်ဟု ကလေးတို့ဘာဝ အလောင်းအစားပြုခဲ့ဖူး၏။ ကျွန်တော်သေချာခဲ့သည်ကား ထိုကဲ့သို့သော သေချာခြင်းမျိုးပါ။
 
အချစ်သည် စွဲမြဲစွာ ယုံကြည်မှုလွန်ကဲသူတို့အား ဤကမ္ဘာတွင် အနိစ္စသဘောတရားရှိသေးကြောင်း သတိပေးဒဏ်ခတ်သည်။ မျက်ကန်းဝါဒနှင့် သံသယ အစွန်းနှစ်ဖက်ကို မရှောင်နိုင်သောအခါ တရားစီရင်ရာနေ့မတိုင်မီပင် ကိုယ့်တရားကိုယ် စီရင်ရ၏။ မည်သူ၏ ကရုဏာကိုမျှ မလိုအပ်ပါ။ လောကသည် ကိုယ်ညံ့လျှင် ကိုယ်ခံစတမ်းဟု တရားမျှတစွာ ဆုံးဖြတ်ထားပြီးဖြစ်သည်။

သူမ၏ စကားသံနွေးနွေးသည် မနေ့တနေ့ကကဲ့သို့ ကောင်းစွာလတ်ဆတ်ဆဲ။ ဖြစ်နိုင်လျှင် ဖန်ပုလင်းငယ်တစ်လုံးအတွင်း သိမ်းဆည်းသိုဝှက်၍ ကမ္ဘာမြေကြီး၏ အတွင်းအကျဆုံးနေရာတွင် တိတ်တဆိတ်မြှုပ်နှံခဲ့ချင်ပါသည်။ နောင်နှစ်ပေါင်းထောင်သောင်း ကြာမြင့်သည့်အခါ ခေတ်သစ်လူသားတို့သည် ကမ္ဘာမြေပေါ်တွင် မျိုးတုံးသွားပြီ ဖြစ်သော ဂန္တဝင်ဆန်သည့် ကျောက်ဖြစ်ရုပ်ကြွင်းခံစားမှုတစ်ခုကို တွေ့ရှိ မှတ်တမ်းတင်နိုင်ကြပါလိမ့်မည်။ မာယာများ၍ ကောက်ကျစ်သော အချစ်သည်လည်း လေထုထဲတွင် တဖန် လှည့်လည်စီးမျောရင်း ပြုစားနိုင်မည့် နှလုံးသားတို့ကို လိုက်လံရှာဖွေပါလိမ့်မည်။

 လူသည် တစ်ဦးတည်းဆိုလျှင် အထီးကျန်ဆန်လှသည်ဟု မည်သည့်လူမိုက်ကများ စောဒကတက်ခဲ့ပါသနည်း။ နံရိုးတစ်ချောင်း ထုတ်ယူခြင်းခံလိုက်ရသည်ကို တွေ့သောအခါ စေတန်က နှစ်ခြိုက်စွာရယ်မောသည်။ ယောက်ျားတစ်ဦး၏ လိုအပ်ချက်များကို ဖြည့်ဆည်းရန် မိန်းမကိုဖန်ဆင်းလိုက်သောအခါမှ အကြီးမားဆုံးသော လစ်ဟာမှုကွက်လပ် ပေါ်လာရသည်ကို ဘုရားသခင် သိခဲ့ဟန်မတူချေ။

သို့သော စိမ်းသည် ကျွန်တော်၏ နံရိုးတစ်ချောင်းသက်သက် မဟုတ်ခဲ့ပါ။ နံရိုးများနှင့် ထောက်ကန်ထားရုံမျှဖြင့် လောကဓံရှစ်ပါးကို မားမားမရပ်နိုင်သော စိတ်နှင့်ခန္ဓာအတွက် ဖြေသိမ့်ဖွယ် အိုအေစစ်တစ်ခု ဖြစ်ခဲ့သည်။ ဒေါသကြီး၍ ပေါက်ကွဲလွယ်သော လူငယ်တစ်ဦးကို ရင့်ကျက်မှုနှင့် တည်ငြိမ်မှုခွန်အားများ ပေးစွမ်းခဲ့သော အလင်းတိုင်တစ်ခုလည်း ဖြစ်ခဲ့သည်။

“သိလား မောင် ဒေါသကြီးရင် အရမ်းကြောက်ဖို့ကောင်းတာပဲ”

ထိုနေ့မှစ၍ ဝုန်းဝုန်းဒိုင်းဒိုင်း ပေါက်ကွဲတတ်သော ကျွန်တော် အတိတ်တွင် သေဆုံးကျန်ရစ်သည်။ အမေ အံ့သြသည်။ သူငယ်ချင်းများ အံ့သြသည်။ ကျွန်တော့်ကိုယ်၌က ပို၍အံ့သြသည်။ သူမကတော့ အံ့သြလိမ့်မည် မထင်ပါ။ “စိမ်းကြောင့် မောင် ဒေါသကြီးတဲ့အကျင့်ကို ပြင်လိုက်ပြီ” ဟုလည်း ကျွန်တော်ပြောမပြခဲ့ဖူး။ ပြောပြရန်လည်း လိုမည်မထင်ချေ။ ယောက်ျားတစ်ဦးကို စေညွှန်ရန် စွမ်းပကားအပြင်းဆုံးလက်နက်သည် မိန်းမ၏ “စကား” ဖြစ်ကြောင်း သူတို့ ပါးနပ်လွန်းစွာ သိထားပြီးဖြစ်၏။ လက်အစုံဖြင့် ထုတ်ယူပေးထားသော နှလုံးသားသည် ပေးသမျှ အမိန့်တော်ကို မြေဝယ်မကျ နားထောင်ရန်အသင့်။ “လိုလေသေးမရှိ” ဟု သုံးနှုန်းရန် ပိုကဲကောင်းပိုကဲနေမည် ဖြစ်သော်ငြား သူမ လိုအပ်သည်ကို ဖြည့်ဆည်းဖို့ တွန့်ဆုတ်ခြင်း ကင်းလှသည်။


ဖြူဝင်းသော လက်ကောက်ဝတ်ပေါ်တွင် အစိမ်းနုရောင် ပလတ်စတစ်နာရီလေးကို တွေ့ရသောအခါ သူမအတွက် မွေးနေ့လက်ဆောင်ပါကင်ဗူးအတွင်း၌ ချမ်းသာသမျှ မုန့်ဖိုး ငါးသောင်းကျော်နှင့် ရင်းလိုက်ရသော ပန်းနုရောင် စတီးနာရီလေးတစ်လုံး အသင့်ရောက်လာခဲ့သည်။ “လက်သည်းနီဆိုးတာက အောက်ခံမပါရင် လက်သည်းတွေ ပျက်စီးတတ်တယ်” ဆိုသော အစ်မ၏ စကားကို ကြားလိုက်ရသည့်နေ့က သူမအတွက် အောက်ခံလက်သည်းဆိုးဆေးပုလင်းကို မျက်နှာပူပူဖြင်း သွားဝယ်ကာ လက်ဆောင်ပေးခဲ့၏။ ဒိန်ချဉ်ကို ထန်းလျက်နှင့် ဘယ်လိုမှ မကြိုက်သော ကျွန်တော်သည် သူမနှင့်အတူ ဒိန်ချဉ်သောက်တိုင်း “ထန်းလျက်နဲ့ နှစ်ခွက်” ဟုသာ မှာတတ်ခဲ့၏။ အပေါစား ချော့ကလက်ကိုပင် ဝယ်စားရန်ဝန်လေးခဲ့သော ကျွန်တော်သည် သူမအတွက်ဆိုလျှင် ပိုက်ဆံမရှိသည့်ကြားမှ အကောင်းစားဆိုသော ချော့ကလက်ကိုမှ ရှာဖွေဖန်တီးခဲ့၏။ “Assignment ရှိလို့” ပြောလိုက်သောအခါ သူမလိုသမျှ သတင်းအချက်အလက်ကို ရှာဖွေပို့ပေးပြီး ဖြစ်ခဲ့၏။ သီချင်းကြိုက်သော်လည်း mp3 မရှိသော သူမအတွက် တစ်ရက်လျှင် အလုပ်ချိန်ဆယ့်နှစ်နာရီနှင့်ရင်းပြီး ကျွန်တော့်အတွက်ပင် ဝယ်ရန် စိတ်မကူးခဲ့ဖူးသော  iPod တစ်လုံး ဝယ်ပေးခဲ့ဖူး၏။ ပြဿနာတစ်စုံတစ်ရာရှိတိုင်း “မောင်က အဲဒီလိုနားလည်မှုရှိလို့ ချစ်နေရတာ” ဆိုသော စကားအောက်တွင် အရာရာကို သဘောထားကြီးစွာ နားလည်ခွင့်လွှတ်ပေးခဲ့သည်။ သူမ တောင်းဆိုလာသောအခါ “စိမ်း စိတ်ချမ်းသာရင် ပြီးတာပဲ” ဆိုသော တစ်ခွန်းဖြင့် အရာခပ်သိမ်း လိုက်လျောပေးခဲ့သည်။
ဘာများ လိုခဲ့သေးလို့လဲ စိမ်းရယ်… ။

(၃)

ရော်ရွက်ဝါများ တဖြုတ်ဖြုတ်ကြွေနေပြီ။ စိမ်းလန်းခြင်းသို့ မရောက်မီ သွေ့ခြောက်ခြောက်အဆင့်ကို ဦးစွာ ဖြတ်သန်းရသေးကြောင်း နားလည်သည်။ ရင့်ကျက်မှုနှင့် လွမ်းဆွတ်တမ်းတခြင်းသည် မည်သို့မျှမသက်ဆိုင်သည့် သီးခြားခံစားမှုများဖြစ်ကြောင်း သိလိုက်ရသည့်အခါ ဝမ်းနည်းမှုများ ဆိုင်းမဆင့်ဗုံမဆင့် ဝင်ရောက်လာသည်။ ပျော်ရွှင်ဖွယ် ပုံပြင်တစ်ပုဒ်၏ စိတ်လက်ပေါ့ပါးမှုမျိုးသည် လက်တွေ့ဘ၀အတွက် အဘယ်ကြောင့် သက်ရောက်မှုနှုန်း နည်းပါးလှရသနည်း။ တစ်ဝက်ကျော်သွားပြီဖြစ်သော မိုင်းလ်ဒ်ဆဲဗင်းဘူးကို သတိပြုမိသည့်အခါ လမိုက်ညသည် အရိပ်သုံးပါး နားမလည်စွာ ရှည်ကြာလွန်းလှကြောင်း ခပ်တိုးတိုး ကျိန်ဆဲလိုက်မိသည်။
ဤအထက်အင်းစိန်လမ်းမပေါ်သို့ လွန်ခဲ့သည့် သုံးနှစ်ခန့်က အကြိမ်ကြိမ်ရောက်ခဲ့သည်။ အစိမ်းနုရောင်သုတ်ဆေးများ ပြယ်လွင့်စပြုနေသည့် နှစ်ထပ်အိမ်လေးသည် သာမန်ထက် စည်းချက်မြန်နေသော နှလုံးသားကို အရူးအမူးဆွဲဆောင်ခဲ့ဖူး၏။ အဆိုပါအိမ်လေးရှိ သံဇကာကွက်ခပ်ကျဲကျဲ ဝရံတာလေးသည်ပင် ညဥ့်၏ ဆွတ်ပျံ့ကြည်နူးဖွယ် အားလုံးကို သိမ်းကြုံးယူငင်ထားရာနေရာလည်း ဖြစ်တော့သည်။ မှုံရီဖျော့တော့သော လရောင်သည်ပင် ထိုနေရာ၌ အလင်းဓာတ်များ ပိုမိုစုဝေးနေသကဲ့သို့ ရှိသည်။ ထိုနေရာသို့ရောက်သည်နှင့် အခေါက်ခေါက်အခါခါ ဖြတ်လျှောက်နေသော ခြေလှမ်းများသည်လည်း အလိုလို နှေးကွေးသွား၏။ သူမ မြင်ပါစေဟု ဆုတောင်းရသည်မှာလည်း အလီလီ (ညတုန်းက စိမ်း မောင့်ကို မြင်ရဲ့လားဟု မေးတိုင်း သူမက မြင်တာပေါ့လို့သာ အမြဲဖြေတတ်၏)။

နာရီလက်တံများ ပွန်းပဲ့သွားသောအခါ တက္ကသိုလ်ရိပ်သာလမ်းတစ်လျှောက် ကျွန်တော်တို့ နှစ်ဦး၏ ခြေရာများ ပိုမိုထူထပ်လာခဲ့သည်။ လှည်းတန်းရှိ ကော်ဖီဆိုင်လေးမှ ထိုင်ခုံများလည်း ကျွန်တော်တို့ကို အချိန်မှန်မျှော်တတ်လာသည်။ အင်ဂျင်သံပြင်းသော ၁၀၇ ဘတ်စ်ကားများက အရှိန်သည်းစွာဖြင့် တဝီဝီကျော်တက်ကုန်ကြသည်။ မနက်စောစောအိပ်ရာထရန် မုန်းတီးလှသော ကျွန်တော်သည် မနက်စဉ် မျှော်တော်ယောင်ပတ်ပျိုးကို ကျေနပ်စွာ တီးခတ်နေတတ်ခဲ့ပြီ။

“မနက်အစောကြီး ကားဂိတ်မှာ လာလာစောင့်နေရတာ၊ ဒုက္ခမကြီးဘူးလား”
သူမက ရယ်သွမ်းသွေးရင်း ကျေနပ်သလိုလို မေးတော့ ..
“အဲ့ဒီဒုက္ခတွေက စိမ်းနဲ့ တွေ့တိုင်း သုခတွေ ဖြစ်ဖြစ်ကုန်လို့ ခက်နေတာ”
နောက်ပိုင်းကျ သူမ မကြာခဏ ပြောတတ်သည်။

“မောင်ကလေ၊ သိပ်စကားတတ်တာပဲ သိလား။ အဲ့ဒါကြောင့်”
“အဲ့ဒါကြောင့် ဘာဖြစ်လဲ”
“အို မပြောပါဘူးလို့”
အပြုံးတစ်ချက်သည် ကော်ဖီပူပူတစ်ခွက်ထက် နွေးထွေးမှုစီးဆင်းစေတတ်ကြောင်း နှလုံးသားဗေဒတွင် ပြဌာန်းရန် အဆိုတင်သွင်းရဦးမည်။ အို ပြုံးပါလေတော့ ပြုစားတတ်သူငဲ့။

(၄)

“လွမ်းလိုက်တာ မောင်ရယ်”

မိုင်ထောင်သောင်းချီအကွာက ပစ်ခွင်းလိုက်သော မြားတစ်စင်းသည် ပစ်မှတ်ကို တရွေးသားမှ အလွဲအချော်မရှိ။ တည့်မတ်စွာ စိုက်ဝင်သည်။ မိုနာလီဇာ၏ ဓာတ်ပြားဟောင်းတစ်ချပ်အတွက် အချိန်ကုန်ခံရန် ဝန်လေးခဲ့ဖုးသော ကျွန်တော်သည် သူမ၏အပြုံးကိုတော့ အနုစိတ်ဈာန်ဝင်စားရင်း အနက်ကောက်ရမှန်းသိခဲ့သည်။ တွန့်ညွှတ် ကွေးဆန့်တတ်သည့် နှင်းဆီနှစ်လွှာတွင် ဖျတ်ခနဲ တောက်ပသွားတတ်သည့် ရောင်ပြေးများကိုလည်း အသေအချာ ဖမ်းယူနိုင်စွမ်းရှိခဲ့သည် (အင်းလေ ရှိခဲ့တယ်လို့ ထင်ခဲ့ဖူးတာပါ)။ စကားတစ်ခွန်း၏ ဆိုလိုရင်းသည် အချိန်ကာလ၏ ထုရိုက်မှုဖြင့် မွမွကြေကာ ပျောက်ကွယ်သွားတတ်ကြောင်း သိပါလျှက် တယုတယသိမ်းဆည်းထားခြင်းသည် မိုက်မဲမှု သက်သက်ပင် မဟုတ်လော။

အချစ်ဆိုသောခံစားချက်ကို ပြီးပြည့်စုံသော အဓိပ္ပါယ်ဖွင့်ရန်ကြိုးစားရင်း ရူးသွပ်သွားသူသည် သူ့ကိုယ်သူ သူရဲကောင်းဟု ကြွေးကြော်နေ၏။ ကျွန်တော် မငြင်းပါ။ ရယူဖို့ ဆန္ဒရှိသူ၊ ပေးဆပ်ရန်လိုလားသူ၊ ခံစားချက်ကို ဖုံးကွယ်ရင်း ရှင်သန်နေလိုသူ၊ ကိုယ့်အထင်နှင့် ကိုယ်တော့ ဟုတ်လှပြီဟု ထင်နေကြသူတွေချည်း။ အရူးနှင့် သူရဲကောင်းသည် အချစ်၏အဘိဓမ္မာတွင် များစွာကွဲပြားမှု မရှိလှပါ။ သို့သော် ကျွန်တော်သည်ကား သူရဲကောင်းဖြစ်ခဲ့လေသော်မှ ထုံထိုင်းညံ့ဖျင်းသော သူရဲကောင်းသာ ဖြစ်ပါလိမ့်မည်။

စိမ်းကို သိပ်ချစ်တာပဲဟု ပြောသောအခါ စိမ်းလဲ မောင့်လိုပါပဲဟု တုန့်ပြန်၏။ ဆေးလိပ်တွေ သိပ်မသောက်ပါနဲ့ မောင်ရယ်ဟု ဆိုသောအခါ ကျွန်တော့်ကို စိတ်ပူလို့ဟုတွေး၍ ကျေနပ်ခဲ့ရသည်။ နောက်ကို စိမ်း မောင် စိတ်ဆင်းရဲအောင် ဘယ်တော့မှမလုပ်တော့ပါဘူးဟု တောင်းပန်သောအခါ သူမ လုပ်ခဲ့သမျှတို့ကို အရည်ကျို၍ ခွင့်လွှတ်သိမ်းဆည်းခဲ့ရသည်။ ကတိကဝတ်များ ဖလှယ်ခဲ့ပြီးသောအခါ အချစ်ကိုတုပ်နှောင်ချည်သည့် ဒြပ်မဲ့ကြိုးများ တိုးပွားသွားလိမ့်မည်ဟု ယုံကြည်ခဲ့မိသည်။

မရယ်ပါနှင့်။ “စိမ်းကို ချစ်တယ်” ဟု ပြောလိုက်သောအခါ အဆိုပါလေးနက်မှုသည် ဘာသာဗေဒနှင့် သိရှိခံစားနိုင်မှု တံတိုင်းကြီးများကို ထိုးဖောက်ကျော်လွန်လျှက် အခြားစကြဝဠာတစ်ခုတိုင် တိုးဝင်လွတ်မြောက်သွားသည်ကို အချိန်ကာလမှတ်တိုင်များက သက်သေခံပေးပါလိမ့်မည်။

သြော် ထိုသို့ ချစ်ရပါသော စိမ်း။

(၅)

စစ်မှန်သော တည်မြဲခြင်းဆိုသည်ကား  အဘယ်နည်း။ ထမင်းထုပ်မသိုးမီတော့ တွေ့လိုလှသေး၏။ မတည်မြဲခြင်းသဘောကို နှလုံးသွင်းလက်သင့်ခံခြင်းမပြုဘဲ တည်မြဲမှုကို တောင့်တနေပြန်သောအခါ လောက၏လူမိုက်ကြီးများစာရင်းတွင် အလိုအလျောက် ကျွန်တော့်နာမည် ထပ်တိုးသွားသည်။

အမှောင်ထဲတွင် အလင်းရှာရန် လမ်းဖောက်နေသူ၊ ထမင်းတစ်လုတ်စားဖို့ တွေးပူနေရသူ၊ အနုပညာမှလွဲ၍ ချမ်းသာခြင်းကင်းသူ၊ မိန်းကလေးတစ်ဦးလိုအပ်သည့် ကြင်နာယုယမှုများကို ဖြည့်ဆည်းမပေးနိုင်သူ၊ စီးကရက်ကို လက်နှင့်မပြတ်အောင် ကြိုက်လှသူ၊ စကားကြီးစကားကျယ်ပြောတတ်သူ၊ ရေချိုးပျင်းသူ၊ စာရေးဆရာယောင်ယောင်ဖမ်းနေသူ၊ ကဗျာ မြတ်နိုးသူ၊ စာအုပ်များကို ရူးသွပ်သူ၊ ရေပေါ်ဆီစိတ်ဓာတ်ကို ရွံရှာမုန်းတီးသူ၊ အရင်းနှီးဆုံး သူငယ်များနှင့် အဆဲပါမှစကားပြောတတ်သူ၊ အလွန်အမင်း အားနာတတ်သူ၊ ထိုသူသည် ကျွန်တော်ဖြစ်၍ ကျွန်တော်သည် ဘာကောင်မှ မဟုတ်ခဲ့ပါ။ ထို ဘာကောင်မှမဟုတ်သော ကျွန်တော့်ကိုမှ လက်တွဲရန်ရွေးချယ်ခဲ့သော စိမ်းသည် ဘာကောင်မှ မဟုတ်သော “တန်ဖိုး” ကိုလည်း နားလည်လက်ခံတတ်လိမ့်မည်ဟု တစ်ထစ်ချယုံကြည်ခဲ့၏။ ယုံကြည်ခြင်းနှင့် လက်တွေ့ကျခြင်းဟူသည်ကား နေရာချိန်ခါမရွေး လက်ဆွဲနှုတ်ဆက်ကြလိမ့်မည်ဟု မည်သည့်တွေးခေါ်ပညာရှင်မှ မိန့်မြွက်ခဲ့သည်ဟု မကြားစဖူး။ ကိုယ့်ကိုယ်ကိုတော့ အသက်အရွယ်အလိုက် ထိုက်သင့်လျောက်ပတ်သော တရားကို နှလုံးသွင်းခဲ့နိုင်ပြီဟု ထင်ခဲ့၏။ ငါသည် တရားမမဲ့ဟုလည်း ကြုံးဝါးခဲ့သေး၏။ လွန်ခဲ့သည့် တစ်စက္ကန့်မှ ငါသည်ပင် ယခုငါမဟုတ်တော့ဟူသော သဘောကိုလည်း ရင်ဝယ်ပိုက်နိုင်ခဲ့၏။ သို့သော်ငြား သူမနှင့် ပတ်သက်လာလျှင်မူ အဘယ်ကြောင့်များ ပုံသေနည်းလက်တံများကြားမှ ရုန်းမထွက်နိုင်ခဲ့သေးသနည်း။ ယခုနေ ပိုက်သဂိုရီယမ်တစ်ဦးကို လမ်းမှာတွေ့ခဲ့လျှင် ဘဝ၏အမှားများကိုပြင်ဆင်ရန် ပုံသေနည်းတစ်ခုခုထုတ်ခိုင်းရပါဦးမည်။

“ဟုတ်တယ် မောင်။ စိမ်း မပျော်တော့ဘူး”

နောက်ပြောင်ခြင်းဟူသည် နေရာချိန်ခါလိုက်တတ်၏။ သို့သော် တည်ငြိမ်အေးစက်နေသော မျက်ဝန်းထဲတွင် ကျီစယ်ရိပ် စိုးစဉ်းမျှပင်မရှိ။ ပျောက်စေဆရာလို အစွမ်းရှိခဲ့ပါလျှင် နားစည်၏အမြှေးပါးတို့ကို ခွာယူသိမ်းဖွက်ထားလိုသော်ငြား လက်တွေ့တွင် တိုးဝင်ကျူးကျော်လာသော စကားလုံးများကို ခုခံနိုင်စွမ်းမရှိ။ ယုံချင်မှ ယုံပါဟု မပြောပါနှင့်။ ယုံရမည်ကို သိပါလျက် မယုံနိင်ပါဟု ဇွတ်မှိတ်လိမ်ညာရခြင်းသည်လည်း ပင်ပန်းဆင်းရဲခြင်းတစ်မျိုးဖြစ်ကြောင်း ကြုံဖူးသူသာ သိပါသည်။ မချစ်နိုင်တော့ဘူးတဲ့လား။ တစ်ချိန်က ပုစ္ဆာတစ်ပုဒ်သည် အဖြေမှန် ၅၂၈ ထွက်နေခဲ့ပါလျှက် ၉၇၂ ပေါင်းထည့်ရန် ကြိုးစားခဲ့သူမှာ သူမ ဖြစ်ကြောင်း သတိမှရပါလေစ။

“မောင် တကယ်နားမလည်ဘူး။ ချစ်တယ်ဆိုတဲ့စကားတစ်ခွန်းက ပြောပြီးရင် ပြောင်းလဲသွားဖို့ ဒီလောက်လွယ်လို့လား စိမ်း”

“ဒါကတော့ အစကတည်းက သိပ်မလေးနက်လို့ ဖြစ်ချင်ဖြစ်မှာပေါ့ မောင်”

ဘုရားရေ။ လေးနက်သည်ဟု မိမိကိုယ်တိုင်ပင် မရေရာသော ခံစားချက်များကို ဆုပ်ကိုင်လျှက် ယောက်ျားတစ်ဦး၏ ရင်ခွင်ထဲသို့ တိုးဝင်ခဲ့သောမိန်းမသည် သတ္တိကောင်းခြင်းလော၊ မိုက်မဲခြင်းလော။ ချစ်လှပါရဲ့ဟု တီတာချွဲနွဲ့စကားများ လေထုထဲဝယ် ပူနွေးလတ်ဆတ်စွာ စီးမျောနေသေးသည်။ ဆန္ဒရှိလျှင် ဖမ်းဆုပ်ယူနိုင်သော်လည်း နှုတ်ခမ်းအစုံကို လှလှပပ ကွေးညွတ်၍ အရှက်မဲ့စွာ ငြင်းဆန်နိုင်သေးပြန်သည်။ အလိုအလျောက်ထွက်ကျလာသော ကတိကဝတ်တို့ကို ကောက်ယူပြီးမှ လက်ထဲတွင် ကွဲကြေသွားသည်ဆိုအံ့။ ရက်ရောစွာ သွန်ချပေးခဲ့သူ၏ အပြစ်လော၊ မက်မောစွာ ကောက်ယူမိသူ၏ အပြစ်လော။

ကမ္ဘာသည် ချာချာလည်သွားခြင်းမဟုတ်။ အံ့သြဆွံ့အစွာ ရပ်တန့်သွားခြင်းသာ ဖြစ်၏။ ရင်ခွင်ကို ဗဟိုချက်ပြု၍ မုန်တိုင်းဆင်တော့မည်ဖြစ်ကြောင်း အချက်ပေးသံများ အရူးအမူးပေါ်ထွက်လာကြသည်။ ပြေး၍လွတ်တော့မည် မဟုတ်ကြောင်း သိလိုက်ရမှ ဘုရားတသူတို့ကို ဘုရားသခင် မည်သို့စီရင်မည်နည်း။ ကျွန်တော့်အတွက်တော့ ခေါင်းရှုပ်မခံပါနှင့်။ ကိုယ့်ထိုက်နှင့်ကိုယ့်ကံသာ ရှိပါစေလေ။ သဘာဝက တည့်မတ်စေရန် ထည့်သွင်းဖန်ဆင်း ပေးခဲ့သော ခြေထောက်နှစ်ဖက်သည် သူတို့၏ တာဝန်ကို ထမ်းဆောင်ရန် ပျက်ကွက်ခဲ့ပြီးနောက် နှလုံးသားသည်လည်း တအိအိ ပြိုကာယိုင်လဲ၍ ….။

“ကောင်းပြီလေ။ မောင် လမ်းခွဲပေးမှ စိမ်း စိတ်ချမ်းသာမှာမဟုတ်လား။ မောင် လိုက်လျောပေးရမှာပေါ့”

တွတ်တီးတွတ်တာချွဲနွဲ့တတ်သော စိမ်း ဘာကြောင့် ထူးဆန်းစွာငြိမ်သက်နေရပါသနည်း။ တစ်ခုခုတော့ ပြောပါဦး စိမ်းရယ်။ သူမသည် တရားသူကြီးထံမှ အမိန့်စီရင်ချက်ကို နားထောင်နေရသူလိုမျိုး အသက်မဲ့သော တိတ်ဆိတ်ခြင်းမျိုးဖြင့် တိတ်ဆိတ်နေခဲ့သည်။ သို့သော် စီရင်ဆုံးဖြတ်ခွင့်ကို တရားခံထံမှ ပြန်လည်တောင်းယူလိုက်နာခဲ့ရသော တရားသူကြီး၏ ဝမ်းနည်းကြေကွဲမှုကို သူမ သိပါရက်နှင့် မသိချင်ယောင်ဆောင်ထားမည်ဖြစ်ကြောင်းကိုလည်း ကျွန်တော် ကောင်းစွာသိပါသည်။

ပြီးသွားပြီလား။ ဒီလိုနဲ့ပဲ ပြီးသွားခဲ့ပြီတဲ့လား။ မွန်း ကြပ် လှိုက် ဖို မော ပန်း မှုများသည် လူဖျင်းလူညံ့တစ်ဦး၏ ပါးကို စိတ်ရှိလက်ရှိ ရိုက်နှက်နေကြ၏။ တမင်ပေါ့ပါးဟန်လုပ်ရသော စကားလုံးများ၏ ထုထည်သည် ကမ္ဘာပေါ်တွင် ရှိရှိသမျှ အရာဝတ္ထုတို့ထက် လေးလံကြောင်း ရူပဗေဒတွင် မသင်ခဲ့ရဖူးပါ။ ဆွဲယူဆုပ်ကိုင်ထားသော လက်အစုံကို ရုန်းဖယ်၍ လှည့်ထွက်သွားချိန်တွင် ရေခဲတိုက်သို့ လူမိုက်တစ်ဦး၏ နှလုံးသား ရောက်လာတော့မည်ဖြစ်ကြောင်း ကြိုတင် သတင်းရရှိသည်။

ကြည့်စမ်းပါ စိမ်း၊ မောင့်မျက်လုံးကို သေချာကြည့်စမ်းပါ။

စိမ်းမကြည့်ရဲဘူး မဟုတ်လား။

မောင် သိတယ်၊ စိမ်း ကြောက်နေခဲ့တယ် မဟုတ်လား။

တဖောက်ဖောက်ခုန်ဆင်းလာသော မိုးရေစက်များအကြားတွင် မိုးရေတုများ ရောယောင်လိုက်ပါသွားသည့်အခါ “၀ဋ်မလည်ပါစေနဲ့” ဟု ဆုတောင်းရုံမှ တပါးလည်း …. ။

 
(၆)

ဖြစ်ပျက်ခဲ့သမျှ အရာတိုင်းအတွက် ကျွန်တော့်လိပ်ပြာ ကျွန်တော်လုံ၍ ကျွန်တော့်သိက္ခာကို ကျွန်တော် ယုံပါသည်။ ထိုအတွက်လည်း နှလုံးသားနိုဘယ်လ်ဆု ချီးမြှင့်မည့်သူ မရှိပါ။ အချစ်၏ နောက်ဆက်တွဲစာမျက်နှာများတွင် ကိုယ့်ကံကြမ္မာကိုယ်ဖန်တီးမှုကို တွဲဖက်ထားသင့်ကြောင်း အကြံပြုပါရစေ။ အချစ်ကို ကျနစွာထုတ်ပိုး၍ ခရမ်းရောင်လွင်ပြင်သို့ ပို့ဆောင်လိုက်သောအခါ အချစ်သည် အမြန်ရထားပေါ်မှ ခုန်ချထွက်ပြေးသွား၏။ တစ်ချိန်ချိန်တွင်တော့ ပြန်လာပေလိမ့်ဦးမည်။

ရိုးသားစွာ ဝန်ခံရလျှင် ကျွန်တော်သည် အရိပ်သုံးပါးနားမလည်ခဲ့သော လူညံ့တစ်ဦး ဖြစ်ပါ၏။ ရင်ခွင်ထဲမှ မိန်းမ၏ ရင်ခုန်သံအတိုးအကျယ်ကိုပင် ဖမ်းယူနိုင်စွမ်းမရှိခဲ့သော လူညံ့ပင် ဖြစ်ပါ၏။  အနုပညာကို မချစ်တတ်သူသည် အနုပညာသမားကိုတော့ ချစ်တတ်လိမ့်မည်ဟု ရူးမိုက်စွာ ထင်ယောင်မှားနေခဲ့သော လူ့ညံ့ပင် ဖြစ်ပါ၏။ ထိုသို့ဝန်ခံရသည်ကိုလည်း မရှက်ပါ။ ဟီရိသြတပ္ပတရားကို နားမလည်ပါးမလည် အလွဲသုံးစားလုပ်နေသူတို့သာ ရှက်ကြပါလိမ့်မည်။ ရုပ်ဝတ္ထုဝါဒကို ချွေးတဒီးဒီး တည်ထောင်နေသော ရေပေါ်ဆီလူ့မလိုင်များသာ ရှက်ကြပါလိမ့်မည်။ လက်ထပ်ရန်စကားကို လွယ်လွယ်ပြော၍ လွယ်လွယ်ချိုးဖောက်တတ်သော မိန်းကလေးများသာ ရှက်ကြပါလိမ့်မည်။ ကျွန်တော် မရှက်ပါ။


(၇)

အစိမ်းရင့်ရောင်တေးသွားများ ဆိတ်သုဉ်းသွားသည့်အခါ ဘ၀သည် ချွဲပျစ်စေးထန်းနေသည့် လက်ဖက်ရည် တစ်ခွက်ပမာ အော်ဂလီဆန်ဖွယ်ကောင်းသွား၏။ သို့သော် ထိုလက်ဖက်ရည်ကိုပင် အရသာခံတတ်ရန် ကြိုးစားရပါဦးမည်။

++++++++++++++++++++++++++++++++++++++++++++++++++++++++++++++

                                          အွန်လိုင်းအနုပညာရပ်ဝန်း


 
နွေရာသီဖွား ဆူးပန်းကလေးများ၏ သီကျူးမှုအလကာင်္
______ လ မ်းေ လျှာ က် ဘေ လာ့ ဂါ ________________


လမ်းလျှောက်ခြင်းဟာ ကျန်းမာရေးအတွက်အကောင်းဆုံးလေ့ကျင့်ခန်းတစ်ခုဖြစ်ပါသည် တဲ့ ။ ကျွန်တော့်အတွက်တော့
ဘယ်လိုနေမယ်မသိ ။ တစ်နေ့တစ်နေ့ လျှောက်လိုက်ရသည့်လမ်း ။ သို့သော် . . . ကျွန်တော်လျှောက်နေသည်က လမ်းမဟုတ်တဲ့လမ်း။

ခေတ်မှီတိုးတက်လာသောခေတ်ကြီးကို မျက်နှာလိုမျက်နှာရလုပ်၍ လက်ဖြင့်လမ်းလျှောက်ထွက်နေခြင်းပင် ။ တစ် ဘလော့ဝင်
တစ်ဝဘ်ဆိုက်ထွက်နှင့် ကျွန်တော် လမ်းလျှောက်ထွက်နေပါတယ် ။ လမ်းမှာတွေ့ခဲ့သမျှကိုလဲ လေ့လာမှတ်သားပေါ့ဗျာ ။
တစ်ခါတစ်ခါ အရသာရှိလွန်းတဲ့အစားအစာတွေများစားမိတဲ့အခါ မိတ်ကောင်းဆွေကောင်းတွေကို သတိရတတ်ပါသတဲ့ ။
ကျွန်တော်လည်း ကျွန်တော်လျှောက်ခဲ့တဲ့လမ်းပေါ်မှာ အရသာရှိတဲ့ စာကောင်းပေကောင်းလေးတွေဖတ်မိရင် ပရိသတ်ကြီးကို သတိရမိသဗျ ။

ရသကောင်းဆိုတာကလဲ မျှဝေပေးခြင်းအားဖြင့် အားပေးခြင်း ချီးမြှောက်ခြင်း မည်သကိုး ။ ဒီတစ်လအတွက်လည်း ပရိတ်သတ်ကြီးကို
ဘယ်လိုအရသာကောင်းမျိုးလေးတွေနဲ့ ဝေမျှရင်ကောင်းမလဲဆိုပြီး ဘလော့တခွင်ပြဲပြဲစင်အောင် ကျွန်တော် လမ်းလျှောက်ထွက်မိပါတယ် ။ လျှောက်ရင်းလျှောက်ရင်းနဲ့ ဘလော့ဂါ နွေဆူးလင်္ကာ ရဲ့ ဘလော့လေးအရောက်မှာတော့ ပရိတ်သတ်ကို မျှဝေပေးချင်စရာ အရသာလေးတွေကို ကျွန်တော် တွေ့လိုက်မိပါတော့တယ် ။ ကဲ . . . ကိုနွေဆူးလကာင်္ ရဲ့ အတွေး နဲ့ အရေးလေးတွေကို ခံစားကြည့်ကြပါဦး ။ ။ ။

xxxxxxxxxxxxxxxxxxxxxxxxxxxxxxxxxxxxxxx

စစ်မှန်မှု
---------

‘ပလုံ’

သော့ခလောက်တစ်ခုကို မြစ်ရေထဲ လွှင့်ပစ်လိုက်တယ်။

“ဟေ့လူ ... သော့ခလောက် အကောင်းကြီးဗျာ ... ဘာလို့ လွှင့်ပစ်ရတာလဲ ...?”

“သော့ပျောက်သွားလို့ပါ ...”

“ဟာ ... အဲဒါဆိုလည်း သော့တုလုပ်ပြီး သုံးလို့ ရတာပဲ .. နှမြောစရာကြီး ...”

“ဟုတ်တယ် ... ဒါပေမယ့် ကျနော် သော့ခလောက်နေရာက ဝင်စဉ်းစားမိလို့ပါ ...”

“ဗျာ ... ဘယ်လို ..?”

“ကိုယ့်ကို သော့တုနဲ့ ဖွင့်ပြီး အသုံးချ ခံရတာထက် ရေထဲခုန်ချပြီး သတ်သေလိုက်တာက ပိုကောင်းတယ်ဗျ ...”

ပြောပြီး အပြုံးစစ်စစ်တစ်ခုနဲ့ သူ့ကို ပြုံးပြရင်း ကျွန်တော် လှည့်ထွက် လာခဲ့တယ်။ ။

-----------------------------------------------------------------------------------------------------

လောဘ
---------

လူတစ်ယောက်သည် ကြယ်ကြွေသွားတာကို ကြည့်ရင်း တွေးတွေးဆဆနှင့် သူ့ဘေးမှ အဖော်အား စကား စ လိုက်သည်။

“တကယ်လို့ကွာ ... ကြယ်ကြွေတဲ့ အချိန်မှာ ... မင်းဆုတောင်းသမျှ ရမယ်ဆိုရင် ... မင်းဘာကို အရင် ဆုတောင်းမလဲ ?”

အဖော်လုပ်သူက စဉ်းစဉ်းစားစားနှင့် ပြန်ဖြေလိုက်သည်။

“အင်း ... တကယ်သာ ရမယ်ဆိုရင် ... ပထမဆုံး နောက်ထပ် ကြယ်အစင်း တစ်ရာလောက် တစ်ခုချင်း ကြွေပါစေလို့ ဆုတောင်းမှာပေါ့ကွ” ။ ။

---------------------------------------------------------------------------------------------------------

နာရီလူသား
------------

အရမ်း အပျင်းထူတတ်တဲ့ ကျွန်တော့်ကို အဖေက ဆုံးမပါတယ် ...။

“လောကကြီးမှာ နာရီလို နေစမ်းပါ သားရယ်...”

ပညာရှိစကားလိုလို ... ပညာရှိလေသံလိုလို နဲ့ပါ...။
ကျွန်တော်ကလည်း သိပ်မခေတဲ့ကောင်ဆိုတော့ သူ့ ပညာရှိလိုလို လေသံစကားကို နားလည်ပါတယ်။
နာရီတွေက အချိန်တိုင်း မရပ်မနား အလုပ်လုပ်တယ်လို့ ပြောချင်တာပါ ...။
ဒါပေမယ့် ကျွန်တော် ပြောခဲ့သလို ကျွန်တော်ကလည်း သိပ်မခေတဲ့ကောင်ဆိုတော့ ဘယ်ရမလဲ ... ပြန်ပြောလိုက်တယ် ...

“ဟာ ... နာရီလိုတော့ မနေချင်ပါဘူး အဖေရာ ... ဆယ့်နှစ်နာရီပြည့်တိုင်း အစကနေ ပြန်ပြန် စ နေရမှာပေါ့ ...”

ကျွန်တော့်အဖေ ပညာရှိကြီး မျက်မှောင်ကုတ်သွားပါတော့တယ်။ ။

---------------------------------------------------------------------------------------------------------

ငြင်းခုန်ခြင်းနှင့်အဖြေ
----------------------

“အဲဒါ ‘ဆိတ်’ ပါကွာ ....”

“ဟာကွာ ... ‘သိုး’ ပါလို့ ပြောနေတာကို ...”

‘ဆိတ်’ နဲ့ ‘သိုး’ တောင် မခွဲတတ်သေးတဲ့ အရွယ်လေးတွေပါ။ ငြင်းရင်းခုန်ရင်းနဲ့ အသံကျယ်ကျယ်လာတယ်။
ငြင်းခုန်တာလို့ ရေးနေကျအတိုင်း ရေးတာမဟုတ်ပါဘူး။ ကလေးတွေဆိုတော့ ခုန်ခုန်ပြီးကို ငြင်းနေကြတာ။
လမ်းပေါ်က ဖြတ်လျှောက်သွားတဲ့ လူကြီးတစ်ယောက်ကိုပဲ မေးကြည့်ကြတယ်။
လူကြီးက ဖြေတယ် .....

“ဘယ်အကောင်လဲ ? .... သြော် ... ‘ဆိတ်သိုး’ ကြီးပါကွာ” .... တဲ့။

ကလေးနှစ်ယောက် စိတ်လေ သွားကြလေရဲ့ ။ ။

( နွေဆူးလင်္ကာ)


ကဲ . . . ပရိတ်သတ်ကြီး တစ်ခုခုခံစားလိုက်ရမယ်ဆိုရင်ပဲ ကျွန်တော် ဝေမျှပေးရကျိုနပ်ပါတယ် ။ ကိုနွေဆူးလကာင်္ရဲ့ လက်ရာတွေကို
ကိုယ်တိုင်ကိုယ်ကျ သွားရောက်ခံစားချင်ရင်တော့ http://nwaysuelinkar.blogspot.com သို့သွားရောက်ဖတ်ရှုနိုင်ပါတယ် ။
ပရိတ်သတ်ကြီးလဲ ရသကောင်းလေးတွေများခံစားမိခဲ့ရင် တခြားမိတ်ဆွေတွေကို ဝေမျှပေးဖို့ မမေ့ကြနဲ့နော့ . . . ။

++++++++++++++++++++++++++++++++++++++++++++++++++++++++++++++

                                                                                                              အခန်းဆက်ဝတ္တုတို

 
သူမ ပြန်ဝင်စားတဲ့ မိုးရာသီ ( အပိုင်း ၁ )

______ေ န ပို င် ____________


I suggest to do War but not Love.
Because in war either you Live or Die.
But in love neither you Live nor Die.

( Hitler )

အခန်း (၁)

ညက မိုးအတော်ချုပ်နေပြီမို့ အချိန်ဆွဲမနေချင်တော့သဖြင့် မျက်စိရှေ့မှ အရက်ခွက်အား လင်းစက်ညီ မော့သောက်လိုက်၏။

ဟေ့ကောင် မင်းမူးနေပြီလား

မင်းခ၏စကားကို လင်းစက်ညီက အပြုံးနှင့်ဖြေ၏။ လင်းစက်ညီအတွက် မျက်နှာအနည်းငယ် ထုံနေခြင်းနှင့် ရီဝေဝေဖြစ်နေခြင်းမှ လွဲ၍ သိပ်ထူးထူးခြားခြားမရှိလှ။

ဒီမှာ မင်းခ မင်းအပိုတွေပြောမနေနဲ့ စင်ကာပူမှာတုန်းကဆို ငါ ညလုံးပေါက်သောက်နေကျ မင်းလောက်ကတော့ ခပ်သေးသေးပါကွာ

ဟား..ဟား..ဟား..”

မင်းခက ရယ်မောရင်း အရက်ခွက်အား တကျိုက်ထဲ မော့သောက်လိုက်ကာ ပုလင်းထဲရှိ လက်ကျန်အား အရက်ခွက် နှစ်ခွက်ထဲ အညီအမျှ ခွဲထည့်လိုက်၏။

လူပျိုတွေကွ အိမ်ပြန်နောက်ကျလို့ ဆူမယ့် မိန်းမ မရှိဘူး အေးဆေးပေါ့ကွာ

ငါတို့လိုလူပျိုတွေအတွက် မိန်းမနဲ့ ထမင်းချက် ဘယ်ဟာပိုသင့်တော်မလဲ

ဟ ရှင်းနေတာပဲ ထမင်းချက်ပေါ့ကွ အေ့..”

မင်းခ၏အဖြေအား လင်းစက်ညီ မျက်မှောင်ကျုံ့ရင်း မေးခွန်းထုတ်၏။

ဒီလိုလေကွာ မိန်းမယူရင် မင်းဝင်ငွေက ထွက်ငွေနဲ့ညီမျှတယ် အေ့.. ထမင်းချက်ဆိုရင် မင်းထွက်ငွေက ဝင်ငွေရဲ့တစ်ဝက်ပဲရှိ..အေ့..လိမ့်မယ်

ဟေ့ကောင် မင်းခ..”

အေ့..”

မင်းခ အသံက လင်းစက်ညီအား ပြန်ထူးသံမှန်း လေတက်သံမှန်း မကွဲပြားလှ။ လင်းစက်ညီက ပြုံးရင်း..

ငါမင်းလို မမူးသေးဘူး မင်းခ .. မင်းငါ့ကို နားရှုတ်အောင်မလုပ်နဲ့ ရှင်းအောင်ပြော

ဟာ ခွီးထဲမှပဲ မင်းမိန်းမယူထားရင် မင်းရတဲ့ပိုက်ဆံ အေ့.. မင်းမိန်းမကို အကုန်အပ်၊ မင်းမှာ တစ်ပြားမှ ကျန်မှာ အေ့.. မဟုတ်ဘူး

ပြောရင်း မင်းခ လက်ကို ဘယ်ပြန်ညာပြန် ခါယမ်းပြ၏။ ခေါင်းက အောက်သို့ငိုက်စိုက် ကျချင်နေပြီကို သူ့အား တင်းထိန်းထား၏။

မင်းထမင်းချက် ငွားထားရင်.. အေ့ .. မင်းထမွင်းချက်ငွားခ ပေးပြီး ကျန်တာ အေ့ .. ငါမူးနေပြီကွာ

ဒုန်း!”

မင်းခတစ်ယောက် ရှေ့စားပွဲပေါ်သို့ ခေါင်းငိုက်စိုက်ကျသွား၏။ ပြန်ထမလာတော့။ လင်းစက်ညီက အရက်သောက်ခြင်းကို သိပ်ကျွမ်းကျင်လှသူမဟုတ်။ သို့သော် သူ့အားထိန်းမည့်သူရှိလျှင် သူမှောက်သည်အထိ သောက်သည်။ သူထိန်းရမည့်သူရှိလျှင် ထိန်းသောက်သည်။ သူစင်ကာပူသွားစဉ် သုံးနှစ်လောက်သာ အနေဝေးခဲ့သော မင်းခ မှောက်တော့မည်ကို အကြောင်းသိနေ၍ သူထိန်းသောက်ခဲ့ခြင်းက မှန်နေပြီ။

မင်းခ.. ဟေ့ကောင်.. မင်းခ

မင်းခ စကားမေးပင်မရရှာတော့။ ထောင်မတ်နေသော အရက်ပုလင်းအား ခေါင်းမဖော်တမ်း ဦးညွှတ်နေရှာပြီ။ ထို့ကြောင့် လင်းစက်ညီ စားသောက်ဆိုင်ရှိ ဆိုင်ဝန်ထမ်း အကူအညီဖြင့် မင်းခအား ကားပေါ်တင်ကာ ကားမောင်းထွက်လာခဲ့လိုက်၏။

            မိုးက တစ်ပေါက်စ နှစ်ပေါက်စ ကျဆင်းနေ၏။ ညဘက် ညဥ့်နက်နက်တွင် ကျဆင်းနေသော ထိုမိုးက လမ်းမတလျှောက် အနည်းငယ်မျှ စွတ်စိုသွားလောက်အောင်ပင် မပြင်းထန်လှ။ ကားမှန်ပေါ်သို့ ခပ်ကျဲကျဲ ကျဆင်းနေ၍သာ မိုးရွာနေမှန်း လင်းစက်ညီ သတိထားမိ၏။ နီယွန်မီးရောင်တို့ လမ်းဘေးဘယ်ညာတွင် ညကို မျက်ခြေမပြတ် စောင့်ကြည့်နေကြ၏။ စင်ကာပူတွင် (၃)နှစ်ခန့်နေထိုင်ခဲ့သော လူနေမှုဘဝတွင်လည်း ဤကဲ့သို့သောညပေါင်းများစွာကို လင်းစက်ညီ တွေ့ကြုံခဲ့ဖူး၏။ သို့သော်စင်ကာပူလိုနိုင်ငံမျိုးတွင် ညအခါ၌ လမ်းပေါ်တွင် လူအများကို မထူးဆန်းစွာ တွေ့ရတတ်၏။ လူသူကင်းရှင်းကာတိတ်ဆိတ်နေသော ဤရန်ကုန်ရှိလမ်းမမျိုးက လင်းစက်ညီ၏စိတ်ကို ဖမ်းစားမှုတစ်ခု ပေးစွမ်းနေ၏။

            ကားနောက်ခန်းထဲတွင် မင်းခတစ်ယောက် အရှင်လတ်လတ် အိပ်မောကျနေပြီ။ (ဟောက်သံ တစ်ချက်တစ်ချက် ထွက်လာခြင်းကြောင့်သာ အရှင်လတ်လတ်ဟု ဆိုခြင်းဖြစ်သည်။) အသေကောင်ကြီးကဲ့သို့ အိပ်ပျော်နေလျှင်ကော အသေလတ်လတ်ကြီး အိပ်ပျော်နေသည်ဟု ပြောနိုင်မည်လား။ မဖြစ်နိုင်။ အသေဆိုမှတော့ လတ်နေဦးမည်မဟုတ်။ ဒါဆို အသေပုပ်ပုပ်ကြီး အိပ်ပျော်နေသည်ဟု ပြောရမည်လား။ အို.. ထားပါ။ အရက်ရှိန်နှင့် ကားမောင်းရင်းက လင်းစက်ညီ တွေးမိတွေးရာ လျှောက်တွေးနေမိ၏။ တစ်ချက်တစ်ချက်ကားမှန်ပေါ် ရေစက်တို့က စည်းချက်မှန်မှန်ကျနေဆဲ။ ကားကက်ဆက်အား လင်းစက်ညီ ဖွင့်လိုက်၏။


An empty street, an empty house, a hole inside my heart..”

           
Westlife ၏ သီချင်းဟောင်းတစ်ပုဒ်ဖြစ်သည်။ သီချင်းစာသားကြောင့် လင်းစက်ညီ ပြုံးလိုက်မိ၏။ သီချင်းထဲကအတိုင်း လမ်းပေါ်တွင် လူသူကင်းမဲ့နေခြင်းကို လင်းစက်ညီလက်ခံသည်။ သို့သော် နှလုံးသားရှိအပေါက်အား သူခံစားကြည့်လို့မရ။ အိမ်သာနံရံတွင် အပေါက်တစ်ခုရှိပါက အထဲရှိလူအား မလုံမလဲဖြစ်စေ၏။ ပုဆိုးပေါက်သည်ကိုလည်း လင်းစက်ညီ ကြုံဖူး၏။ ထိုကဲ့သို့ပင် စိတ်ထဲ၌ မလုံမလဲခံစားရ၏။ နှလုံးသားတွင် အပေါက်ဖြစ်နေလျှင်လည်း ကိုယ့်ကိုကိုယ် မလုံမလဲဖြစ်စေမည်ဟု လင်းစက်ညီ ခေါင်းထဲတွင် တေးထားလိုက်၏။ ရယ်တော့ရယ်ရသည်။ ဘာရယ်မဟုတ် တစ်ယောက်ထဲ တောင်တွေးမြောက်တွေး လျှောက်မတွေးချင်သောကြောင့် ကက်ဆက်ဖွင့်လိုက်ခြင်းသာဖြစ်သည်။ သူသီချင်းတွေကို အချိန်ပေးနားမထောင်ခဲ့သည်မှာလည်း ကြာခဲ့ပြီမဟုတ်လား။
           
            သီချင်းတွေနှင့် အဆိုတော်တွေ မှိုလိုပေါက်နေသည်။ စင်ကာပူတွင်ပင် အားလပ်ချိန်မျိုး၌ ကမ်းခြေသွားပြီး ပင်လယ်အား ငေးနေရသည့်အရသာကို လင်းစက်ညီပို၍ သဘောကျခဲ့သည်။ သီချင်းနားထောင်ရန် စိတ်ကူးပင်မရခဲ့။ အခုတော့ အချစ်သီချင်းဟောင်းတစ်ပုဒ်က သူ့အား ဟာသဖြစ်စေခဲ့ပြီ။

            လမ်းဘေးဓာတ်တိုင်တို့၏ မျက်စိရှေ့တွင် ကားလေးတစ်စီး ပုံမှန်ခရီးဆက်နေဆဲဖြစ်သည်။ ရုတ်တရက်လှမ်းမြင်လိုက်ရသော ဖြူဆွတ်ဆွတ်လက်လေးတစ်ဖက်သာမရှိခဲ့ပါက ထိုကားလေးလည်း ရပ်တန့်သွားမည်မဟုတ်

ကျွန်မ ကားကြုံလိုက်လို့ရမလားမသိဘူး

ဂျင်းစကတ် အတိုလေးနှင့် စပို့ရှပ်အဖြူရောင်လေးအား အချိုးကျကျ ဝတ်ဆင်ထားပြီး အပေါ်မှ ဂျင်းကုတ်လေး တစ်ထည်အား လိုက်ဖက်စွာ လွှမ်းခြုံထား၏။ ရေစိုနေသော ရွှေအိုရောင် ဆံနွယ်တို့အား မွေးရာပါအတိုင်း ဦးခေါင်းထက်မှ တွဲလောင်းချထား၏။ ပြည်လမ်းမကြီးအား စွတ်စိုမသွားစေနိုင်သော မိုးရေစက်တို့က သူမအား ပင်လယ်ထဲမှ တက်လာသူတစ်ယောက်လို ရွှဲစိုနေစေခြင်းအား လင်းစက်ညီ အံ့အားသင့်နေမိ၏။ လင်းစက်ညီ၏ အကြည့်အား မလုံမလဲနှင့်..

ကျွန်မ အိမ်ပြန်နောက်ကျနေလို့ပါ။ ဖုန်းကလည်းပါမလာဘူး။ နောက်ပြီးကားတွေကလည်း တစ်စီးမှ မတွေ့တော့လို့ပါ။ ဖြစ်နိုင်ရင် ကူညီပါရှင်..”

လင်းစက်ညီ ယောင်ယမ်းပြီး ဘေးဘယ်ညာအား လှည့်ကြည့်မိ၏။ ဟုတ်ပါသည်။ ကားဟူ၍ အရိပ်အယောင်မျှပင် မတွေ့ရတော့..

ကောင်းပြီလေ ကိုယ်ကူညီမယ်.. ဒါနဲ့ မင်းက ဘယ်ကိုပြန်မှာလဲ

ပါရမီကိုပါ..”

လင်းစက်ညီ ခရီးအကွာအဝေးကို တွက်ဆကြည့်မိ၏။ ယခုရောက်နေသောနေရာက မင်းရဲကျော်စွာလမ်းနှင့် ပြည်လမ်းထောင့် စိန်ဂေဟာ အနီးတွင်ဖြစ်သည်။ ပါရမီဆိုလျှင်အတော်ဝေးသေး၏။ လင်းစက်ညီက ခေါင်းညိတ်ပြရင်း

အင်း.. တက်.. တက်..”

နောက်ခန်းတွင် မင်းခတစ်ယောက် အရှင်လတ်လတ် အိပ်ပျော်နေသည်ကို သူမလည်း သတိထားမိပုံရ၏။ ရှေ့ခန်း၌ပင် အလိုက်သင့်ဝင်ထိုင်လိုက်၏။ အိမ်အပြန်လမ်းတစ်ယောက်ထဲ ဖြစ်နေချိန်တွင် စကားပြောဖော်ရပြီမို့ လင်းစက်ညီ ကျေနပ်မိနေ၏။

မောင်းလေ..”

ကားတခါးပိတ်ဦးလေ..”

ကားတံခါးက ပိတ်ပြီးသားလေ…”

လင်းစက်ညီ သူမကိုကျော်ကာ ကြည့်လိုက်တော့ ကားတံခါးက ကားနှင့်ကပ်လျှက် ပိတ်ထားပြီးသား။ တံခါးပိတ်သံ မကြားလိုက်သည်ကိုပင် လင်းစက်ညီ ကိုယ့်ကိုကိုယ် ဇဝေဇဝါဖြစ်မိ၏။ အရက်ကပဲ အစွမ်းပြနေသည်လား။ မဖြစ်နိုင်။ လင်းစက်ညီ ထိုမျှလောက်နှင့် မူးတတ်သူမဟုတ်။ ယခုချက်ချင်း ၁၆ အလီအား ပြောင်းပြန်ဆိုနိုင်ဦးမည်ဟု ကိုယ့်ကိုကိုယ် ယုံကြည်မိ၏။ သို့သော်ရှည်ရှည်ဝေးဝေး ဆက်တွေးမနေချင်တော့။ အလိုက်သင့်ကားကို မောင်းထွက်ခဲ့လိုက်၏။

ရှင်က ပင်ဂွင်းတစ်ကောင်နဲ့ သိပ်တူတာပဲနော်

ဗျာ  .. !”

ဟုတ်တယ် ပင်ဂွင်းတွေက မတ်တပ်ရပ်ဖို့ သူတို့ခန္ဓာကိုယ်အားအင်ရဲ့ ၇ဝ ရာခိုင်နှုန်းကို အသုံးပြုရတယ်တဲ့..”

လင်းစက်ညီ ကိုယ့်ကိုကိုယ် ခပ်ရှိန်းရှိန်းဖြစ်သွား၏။ ဘေးမှကောင်မလေးအား ငဲ့စောင်းကြည့်လိုက်မိ၏။ တစ်ကိုယ်လုံးရွှဲစိုနေသော်လည်း သူမ ချမ်းနေပုံမရ။

ခင်ဗျား မိုးတွေစိုနေတာ မချမ်းဘူးလား

သူမ ပြုံး၏။ တော်တော်လှသည့် အပြုံးမျိုးဖြစ်သည်။ ညဘက်တွင်ဖြစ်သော်လည်း နီယွန်မီးရောင်နှင့် သဲသဲကွဲကွဲမြင်နေရ၏။

မချမ်းပါဘူး..။ ရှင်ကသာ ရေစိုနေတယ်လို့ မြင်တာ ။ ကျွန်မကဖြင့် သိတောင်မသိဘူး

ကားအရွေ့နှင့်လေအဝှေ့တွင် ပြတင်းပေါက်မှ တိုးဝင်လာသော လေက ရနံ့တစ်မျိုးအား ချော့မော့သယ်ဆောင်လာ၏။ အက်ကွဲကွဲ စူးရှရှ ရနံ့မျိုးဖြစ်သည်။ ဘာကြောင့်မှန်းမသိ ကျောထဲတွင် စိမ့်ခနဲ လင်းစက်ညီ ခံစားရ၏။

ဒါနဲ့ မင်းနာမည် ဘယ်လိုခေါ်လဲ

လွန်း သက် ချို.. ရှင်ကော

ကိုယ့်နာမည်က လင်းစက်ညီ

လင်း.. စက်.. ညီ..”

တစ်လုံးချင်း သူမ သံယောင်လိုက်ရွတ်၏။ ရေစိုနေသော ဆံပင်တို့အား လက်ကိုင်ပုဝါဖြင့် သုတ်နေ၏။ သိပ်မကြာခင်ကတွေးခဲ့မိသော နှလုံးသားရှိအပေါက်သည် ဒါမျိုးပင်ဖြစ်မည်။ ဘာကြောင့်မှန်းမသိ လင်းစက်ညီစိတ်ထဲတွင် မလုံမလဲဖြစ်နေ၏။

ကိုယ်မူးပြီးပြောတာတော့ မဟုတ်ပါဘူး။ မူးလည်းမမူးပါဘူး..။ မင်းတော်တော်လှတဲ့ ကောင်မလေးပဲ

ပြောရင်း သူမအားလင်းစက်ညီ ငဲ့ကြည့်လိုက်၏။

ရှင်မပြောလည်း ကျွန်မကိုယ် ကျွန်မ လှမှန်းသိပါတယ်။ နောက်ပြီး အမူးသမားတွေက ငါမမူးသေးဘူးလို့ အမြဲပြောလေ့ရှိကြတယ်ရှင့်..”

လင်းစက်ညီ လေထစ်သွား၏။ ရုပ်ရှင်ကြည့်နေစဉ် အခွေထစ်သလိုမျိုး ပုံမှန်လည်ပတ်နေသည့် အသက်ရှူလမ်းကြောင်းရှိလေက နှာဖျားတွင် လာထစ်နေသလိုမျိုးဖြစ်သည်။ အသက်ရှူကြပ်သွားခြင်းမျိုးလည်း မဟုတ်။ သူမကပဲဆက်ပြီး

ဒါပေမဲ့ အလှအပတရားဆိုတာက သေခြင်းတရားလောက်မှ ယုံချင်စရာမကောင်းတာ..”

လင်းစက်ညီ ဆွံ့အသွားရပြန်၏။ သူမ၏ စတော်ဘယ်ရီရောင်နှုတ်ခမ်းလေးက တင်းတင်းစေ့ထား၏။ နှာဖျားတွင်သီးနေသော ရေစက်လေးကပင် သူမ၏ အလှအပအား မနာလိုဖြစ်ဟန်နှင့် အောက်သို့ တောက်ခနဲ ကျဆင်းသွား၏။ လင်းစက်ညီမောင်းလာသောကားလေးက လမ်းချိုးတစ်ခုပြီးတစ်ခု မီးပွိုင့်တစ်ခုပြီးတစ်ခု .. ။ လည်နေသော ကားဘီးသံနှင့် လေတိုးသံတို့က ရောယှက်နေကြ၏။

ရှေ့နားမှာရပ်လိုက်တော့..”

သူလိုကိုယ်လို ထည်ဝါနေသော ခြံတစ်ခြံရှေ့တွင် လင်းစက်ညီ ကားကို ထိုးရပ်လိုက်၏။

ဒါ ကျွန်မ အိမ်ပဲ

ချမ်းသာကြွယ်ဝသော သူဌေးအိမ်မျိုးဖြစ်သည်။ အိမ်ဘေးတွင် ခပ်အုတ်အုတ်ညွတ်ကျနေသော သစ်ပင်ကြီးတစ်ပင်အား မသဲမကွဲ မြင်နေရ၏။ အိမ်တစ်အိမ်လုံး မီးရောင်ခပ်ပျပျမှလွဲ၍ အမှောင်ကျနေ၏။

မင်းတစ်အိမ်လုံး အိပ်ကုန်ကြပြီထင်တယ်။ မင်းမှာခြံထဲဝင်ဖို့ သော့ပါရဲ့လား

သူမ ပြုံး၏။ လှမြဲလှဆဲဖြစ်၏။

ခြံစည်းရိုးအုတ်ဘောင်မှာ ရေထွက်မြောင်းလေးတွေ တွေ့လား

သူမ လက်ညှိုးညွှန်ပြရာကို လင်းစက်ညီ ကြည့်လိုက်မိ၏။

အင်း..”

အဲ့ဒီရေထွက်မြောင်းလေးတွေ (၉)ပေါက်ရှိတယ်။ (၁)ပေါက်မှာ ခြံသော့ရှိတယ်။ ကျန်တဲ့ (၈)ပေါက်မှာ ကြွက်ထောင်ခြောက်တွေရှိတယ်။ နောက်ပြီး အဲ့ဒီသော့က အသေမထားဘူး။ သူ့ရက်အလိုက် နေရာပြောင်းထားတာ..”

လင်းစက်ညီ မျက်ခုံးပင့်မိ၏။

ဒါမင်းစိတ်ကူးပဲလား

အင်း ဟုတ်တယ်

မင်းကွာ သော့ကို ဆောင်ထားလည်းရရဲ့သားနဲ့

မဆောင်ချင်လို့ပေါ့ရှင်.. ကဲပါ ကျွန်မလည်း အိမ်ထဲဝင်တော့မယ်။ ကူညီပေးတာ ကျေးဇူးပဲ

လင်းစက်ညီ အလိုက်သင့်ခေါင်းညိတ်ပြလိုက်၏။ သူမကားပေါ်မှ ဆင်းသွားသည်ကိုပင် ပြတင်းပေါက်မှ ငေးနေမိသေး၏။

လွန်းသက်ချို

သူမ လည်ပြန်လှည့်ကြည့်၏။

ဒီမှာ မင်းလက်ကိုင်ပုဝါ ကျန်ခဲ့ပြီ

သူမထပ်ပြုံးပြန်၏။ လင်းစက်ညီ အိမ်ပြန်ရောက်လျှင် အိပ်လို့မှပျော်ပါတော့မလား

ကျန်ခဲ့တာမဟုတ်ဘူး ထားခဲ့တာ

ပြောကာ သူမ အိမ်ထဲဝင်သွား၏။ လင်းစက်ညီလည်း ကားကို မောင်းထွက်ခဲ့လိုက်သည်။

. . . . . . . . . . . . . . . . . . . . . . . . . . . . . . . . . . . . . . . . . . .

အိပ်ယာနိုးတော့ မင်းခတစ်ယောက် တီဗွီရှေ့တွင် တစ်ယောက်ထဲ အခွေပေါင်းများစွာနှင့် ရှုတ်ယှက်ခတ်နေ၏။

ဟ သားကြီး နိုးပြီလား

လင်းစက်ညီ ပျင်းကြောဆန့်ရင်း

အေး မင်းကော .. ဝါး ..  နိုးတာကြာပြီလား

သိပ်မကြာသေးဘူး။ ညက အရှိန်နဲ့ဆိုတော့ နည်းနည်း နုံးနေသလိုပဲ။ မျက်နှာလေးဘာလေးသစ် လက်ဖက်ရည်ဆိုင်သွားရအောင်

မင်းခက လက်ဖက်ရည်ဆိုင်သွားဖို့ အဆင်သင့်ဖြစ်နေပုံရ၏။ ထို့ကြောင့် လင်းစက်ညီ ရေချိုးခန်းဝင်ကာ မျက်နှာသစ် သွားတိုက် အလျင်အမြန်လုပ်၏။ ရေချိုးခန်းမှ ထွက်တော့ မင်းခက VCD သီချင်းခွေဖွင့်ထားပြီး သီချင်းလိုက်ညည်းနေ၏။ တီဗွီထဲတွင် ကောင်မလေးတစ်ယောက် ဂစ်တာတစ်လက်အား ဟန်ပါပါနှင့်ပြုံးရင်း တီးခတ်နေ၏။ ထိုအပြုံးလေးအား လင်းစက်ညီ ကောင်းကောင်းမှတ်မိနေ၏။

ဟေ့ကောင် မင်းခ အဲဒီကောင်မလေးက ဘယ်သူလဲ

အဆိုတော် လွန်းသက်ချို လေ

လင်းစက်ညီမျက်ခုံးပင့်မိ၏။

သြော် သူက အဆိုတော်လား

အင်း ဟုတ်တယ်ကွ မင်းစင်ကာပူထွက်သွားပြီးမှ ပေါ်လာတာလေ

လင်းစက်ညီ ညက အဖြစ်အပျက်အား ပြန်သတိရမိ၏။ လွန်းသက်ချိုက အဆိုတော်မလေး..တဲ့။

မင်းခ အဲဒီ့ကောင်မလေး ညက ငါတို့ကားပေါ်ပါလာတယ် သိလား

ဘယ်လို!”

မင်းခ၏မျက်နှာက ပုံမှန်မဟုတ်။ တစ်ခုခုကို အံ့အားသင့်နေပုံဖြစ်သည်။

ဟားဟား မင်းအံ့သြသွားပြီမလား။ မင်းက အိပ်နေတော့ ဘယ်သိမှာလဲ။ သူကလမ်းမှာတစ်ယောက်ထဲကွာ ပါရမီကိုပြန်မှာဆိုလို့ တစ်ယောက်ထဲဖြစ်နေတာနဲ့ ငါကားကြုံလိုက်ပို့ပေးခဲ့တာ

ဟေ…”

မင်းခအသံက လိုအပ်သည်ထက် ပိုကျယ်လောင်နေသည်။

ဟာ ဘာဖြစ်တာလဲကွာ ဒါလေးပြောတာကို အလန့်တကြား

မင်းခက မျက်လုံးကို တတ်နိုင်သလောက်ပြူးရင်း..

မင်းလိုက်ပို့ခဲ့တာ အဲ့ဒီကောင်မလေးဆိုတာ သေချာလား

အင်းသေချာတယ်

လွန်းသက်ချိုက မင်းစင်ကာပူက ပြန်မရောက်ခင်လေးပဲ ရေနစ်သေသွားတာလေ

ဘာ ..

လင်းစက်ညီ မျက်နှာသုတ်ပုဝါကိုင်ရင်း ကိုယ့်ကိုကိုယ် ဇဝေဇဝါဖြစ်နေမိ၏။ မင်းခက..

မင်းညက အိပ်မက်မက်တာကော မဖြစ်နိုင်ဘူးလား

မဖြစ်နိုင်ဘူး

လင်းစက်ညီ တိတိကျကျ ဖြေရှင်းချက်ပေးနိုင်ရန် စဉ်းစားနေမိ၏။

ဟုတ်တယ် အိပ်မက်မဖြစ်နိုင်ဘူး။ ငါ့ဆီမှာ သူ့လက်ကိုင်ပုဝါတောင် ကျန်ခဲ့သေးတယ်

မင်းခက အသည်းအသန်နှင့်

ဘယ်မှာလဲ အဲဒီ့လက်ကိုင်ပုဝါ..”

ကားထဲမှာ..”

ထို့နောက် သူတို့နှစ်ဦး၏ ခြေလှမ်းများက ကားရပ်ထားရာခြံထဲသို့ အိမ်ပေါ်မှာ အပြေးအလွှား ဆင်းသွားကြ၏။

[ ဆက်လက်ဖော်ပြပါမည် ]



++++++++++++++++++++++++++++++++++++++++++++++++++++++++++++++

                                                            ဆောင်းပါး


 
စောင့်ရှောက်ရမည့် မိဘ
____ေ အာ င် မျိုး ခ န့် (ေ မာ် ကျွ န်း ) ___________

Mother Day ဆိုသောစကားလုံး ခေါင်းထဲရောက်လာသည်။ မေလ ၁၃ ရက်နေ့ကို Mother Day အဖြစ်သတ်မှတ်ထားကြသည်။ မြန်မာနိုင်ငံမှာတော့ “အမေများနေ့” ဟူ၍ ပြာသိုလပြည့်နေ့တွင်ကျင်းပကြသည်။ မြန်မာနိုင်ငံတွင် အမေများနေ့ ဖြစ်ပေါ်ဖို့ စာရေးဆရာဘဘဦးသုခကစတင် တိုက်တွန်းနှိုးဆော်ခဲ့သည်။ လူတိုင်းတွင် မိခင်ရှိကြသည့်အတွက် အမေများနေ့သည် လူတိုင်းနှင့်သက်ဆိုင်သည်။ အမေများနေ့မှာ လှုပ်ရှားမှုများပြုလုပ်ကြသည်။ အမေများနေ့အခမ်းအနားများ ကျင်းပကြသည်။ ဝမ်းသာစရာကိစ္စရပ်များပင်ဖြစ်ပေသည်။ သို့သော် ကျွန်တော်တို့သည် ထိုနေ့မှသာ အမေကိုသတိရ၍ ကန်တော့ကြရမည်မဟုတ်။ မိခင်အပေါ် နာရီမလပ် စက္ကန့်မလပ် ရိုသေကြရမည်ဖြစ်သည်။

ဖြစ်ပေါ်လာသောကမ္ဘာပြုမှု (Globalization) အရ လူငယ်များသည် အမေ့အိမ်နှင့် ဝေးရာသို့ ခရီးနှင်ရမှုများလာသည်။ ခေတ်မီလာသည်နှင့်အမျှ မွေးရပ်မြေကိုစွန့်ခွာ၍ တိုးတက်ရာလမ်းကြောင်းရှိသည့် မြို့၊ နိုင်ငံများတွင် အခြေချနေထိုင်ကြရသည်။ သို့နှင့်အမျှ နွေးထွေးလှသောမိသားစုဘဝသည်လည်း ကမ္ဘာပြုမှုအရွေ့ထဲမှာ ပါခဲ့ရသည်။ မိသားစုလက်စုံထမင်းစားချိန်တွင် Food Court တွင် တစ်ကိုယ်တည်းစားနေရသည့်ဘဝမျိုး၊ လမ်းဘေး ကြုံရာဆိုင်မှာ ကြုံသလိုစားလိုက်ရသည့် အခြေအနေမျိုးတွေ ဖြစ်လာသည်။

မိသားစုနှင့် အနေဝေးလာခြင်းသည် မိမိကိုယ်ကိုယ်အားကိုးတတ်လာခြင်း၊ ဇာတိနှင့်ခွဲနေရခြင်းကြောင့် ဇာတိမာနလျော့ကျခြင်း၊ ရေခြားမြေခြားနေရသောကြောင့် အကြားအမြင်ဗဟုသုတပြည့်စုံခြင်း စသည့်အကျိုးကျေးဇူးများရသကဲ့သို့ အချိန်အတော်ကြာအောင် ခွဲခွာနေရခြင်းဖြင့်လည်း မိသားစုဆက်ဆံရေး လျော့ရဲလာတတ်သည်။

နှစ်အတော်ကြာအောင် မိမိကိုယ်ကို ထိန်းကျောင်း၍ အပေါင်းအသင်းများဖြင့်စုပေါင်း၍ဖြစ်စေ၊ အဆောင်တွင် နေထိုင်၍ဖြစ်စေ ရပ်တည်နေရသော လူငယ်တစ်ယောက်သည် မိခင်ဖခင်များနှင့် အတူ မိသားစုဘဝဖြင့်ပြန်လည်နေထိုင်ပါက အသက်ကြီးလာ၍ စကားများလာတတ်သော မိခင်ဖခင်များ၏ဒဏ်၊ သူတို့၏ အကြောင်းမဲ့စိုးရိမ်ပူပန်သော စကားများနှင့် ငယ်ငယ်တုန်းကကဲ့သို့ ဆိုဆုံးမမှုများ စသည်တို့နှင့် ချက်ခြင်းပြန်လည်အသားကျမည်မဟုတ်။ မိခင်ဖခင်များနှင့် အနေစိမ်းသွားသကဲ့သို့ဖြစ်တတ်သည်။ ဤသည်မှာ ကျွန်တော်တို့လူငယ်များ ဂရုပြုကြရမည့်ကိစ္စဖြစ်သည်။

မိဘများကလည်း အသက်ကြီးလာလေ မိမိသားသမီးများနှင့် အတူနေချင်ကြလေဖြစ်သည်။ မိမိတို့သည် မည်မျှပင် အရွယ်ရောက်နေစေကာမူ မိဘများ၏ အမြင်၌ ကလေးများကဲ့သို့သာ မြင်မိနေကြသည်။ သားသမီးများ မြေးမြစ်များနှင့် သိုက်သိုက်ဝန်းဝန်းနေချင်ကြသည်မှာ မိဘတိုင်း၏ ဓမ္မတာဖြစ်သည်။ ထို့အပြင် သားသမီးများ၏ စောင့်ရှောက်မှုနှင့် ပြုစုမှုကိုလည်း လိုချင်ကြသည်ချည်းဖြစ်သည်။
ထို့ကြောင့် ပြောင်းလဲလာသောခေတ်အရ မိဘများနှင့်ခွဲခွာနေကြရသော်လည်း မိမိတို့၏ စိတ်အတွင်း၌ မိဘများကိုအမြဲအမှတ်ရ၍ သတိတရရှိနေကြရမည်။ မိဘများနှင့် ကာလအတန်ကြာခွဲခွာနေရသော်လည်း ပြန်လည်စုပေါင်းနေထိုင်သောအခါ နွေးထွေးစည်းလုံးစွာ ဆင်ခြင်နေထိုင်ကြရမည်။ မိဘများ၏ စကားများမှုများ၊ စိုးရိမ်တတ်မှုများ၊ စိတ်တိုတတ်မှုများစသည့် လူကြီးစရိုက်များကို သည်းခံကြရမည်။ ထို့အပြင် မည်သည့်အချိန်တွင် လောကမှထွက်ခွာသွားရမည်ကိုမသိသော လူ့ဘဝတွင် အချိန်ရှိတုန်းလေးပြုစုစောင့်ရှောက်ကြရမည်ဖြစ်သည်။ သို့မှသာ မိမိတို့အသက်ကြီးရင့်လာသော တစ်ချိန်တွင်လည်း သားသမီးဖြစ်သူများကပြန်လည်စောင့်ရှောက်ကြမည်ဖြစ်သည်။

                    -----------------------------------------------------------------------------
 
လက်လှမ်းမှီသလောက် ဒါဒါဝါဒ

_______ ရဲ ထ က်ေ ဝ ________________

da da ဝါဒ အစပြုရာ

ဒါဒါ(da da)ဝါဒဟာ ပထမကမ္ဘာစစ်အတွင်း ဆွစ်ဇာလန် နိုင်ငံ ဇူးရစ်မြို့ ကနေ စတင်ခဲ့တဲ့ အနုပညာလှုပ်ရှားမှုတစ်ရပ်ပါပဲ။ (၁၉၁၆)ကနေ (၁၉၂၂)ကာလတွေအတွင်းမှာတော့ ဒါဒါဝါဒရဲ့  လှုပ်ရှားမှုတွေက အင်အားအကောင်းဆုံးဖြစ်ခဲ့ပါတယ်။
       
အဲသည့်အနုပညာလှုပ်ရှားမှုတွေထဲမှာတော့ visual art (ဥပမာအားဖြင့် ပန်းချီ)၊ literature (စာပေအနုပညာ)-ကဗျာနဲ့ဆိုင်တာတွေ၊ အနုပညာဆိုင်ရာဝါဒတွေ သီဝရီတွေ ပြဇာတ်တွေ အစရှိတဲ့အရာတွေပါဝင်ခဲ့ပါတယ်။ ကမ္ဘာ့စစ်ဆန့်ကျင်ရေးနဲ့ သာမန်အနုပညာလုပ်ရိုးလုပ်စဉ်တွေရဲ့  လွှမ်းမိုးနေမှုတွေကို သူတို့အနေနဲ့ အစဉ်အလာမျဉ်းတွေကို ချိုးဖျက်ပြီး ဆန့်ကျင်ခဲ့ပါတယ်။

ဒါဒါဝါဒရဲ့ ရည်ရွယ်ချက်

ခေတ်သစ်ကမ္ဘာရဲ့  အဓိပ္ပာယ်မဲ့နေမှုကို ဒါဒါဝါဒလှုပ်ရှားသူတွေအနေနဲ့ အနုပညာလှုပ်ရှားမှုတွေကို အသုံးပြုပြီး ပြက်ရယ်ပြုခဲ့တာပါပဲ။ စစ်ပွဲတွေကို ဆန့်ကျင်ရေးလုပ်တဲ့အပြင် ဒါဒါဝါဒီတွေဟာ ဘူဇွာလူတန်းစားကို ဆန့်ကျင်ပါတယ်။ သူတို့ရဲ့  ဆန့်ကျင်မှုသဘောသက်ရောက်မှုတွေကြောင့် ဒါဒါအနုပညာလက်ရာတွေဟာလည်း အထိန်းအကွပ်မရှိတော့ဘဲ အစဉ်အလာအနုပညာတွေရဲ့ စည်းကမ်းတွေကနေ လွတ်မြောက်နေပါတော့တယ်။

ဒါဒါတို့ရဲ့့ ဖန်တီးမှုကို အစပြုခြင်း

ဒါဒါတို့ရဲ့  ပထမဦးဆုံး ဖန်တီးမှုက ဇူးရစ်မြို့ မှာရှိတဲ့ ဗိုလ်တိုင်းယား ဆိုင်မှာ စခဲ့တာဖြစ်ပါတယ်။, Hugo Ball, Emmy Hennings, Tristan Tzara, Jean Arp, Marcel Janco, Richard Huelsenbeck, Sophie Täuber,  Hans Richter, အစရှိတဲ့ အနုပညာရှင်တွေ ဦးဆောင်ပြီး ဒါဒါဖန်တီးမှုတွေကို စခဲ့တာပဲ ဖြစ်ပါတယ်။

ဒါဒါဝါဒရဲ့  သဘောတရား အနှစ်ချုပ်
       
ဒါဒါဟာ အနုပညာကို ဆန့်ကျင်တဲ့ ပဋိအနုပညာ(anti-art)သဘောဖြစ်ပါတယ်။ ဒါဒါအနုပညာရှင်တွေဟာ အနုပညာဖန်တီးမှုတိုင်းရဲ့  ပြောင်းပြန်အမြင်ကနေ ပြန်လည်ကြည့်ရှူတာပဲဖြစ်တယ်။ သာမန်အားဖြင့် အနုပညာကို လှပမှု သာယာမှုအဖြစ် ရှုမြင်နေကြချိန်မှာ ဒါဒါဝါဒီတွေက အနုပညာကို အဆိုးမြင်ဝါဒီတွေ အနေနဲ့ သာမန်အနုပညာအမြင်ကို ပြောင်းပြန်လှန်ပစ်ခဲ့ပါတယ်။

ဒါဒါဝါဒရဲ့  လုပ်ရပ်နဲ့ ဝေဖန်ချက်များ

ဥမင်တွေတူးတယ်။ ဘဲလ်တွေတီးတယ်။ စက္ကူအပိုင်းအစတွေနဲ့ ပန်းချီလုပ်တယ်။ မိုနာလီဇာ ပုံကို ကြောင်ခေါင်းတပ်တယ်။ နှုတ်ခမ်းမွှေးထည့်ဆွဲတယ်။ အဲသည့်လို လုပ်ရပ်တွေကြောင့် ဒါဒါဝါဒဟာ ဘာမှ မဟုတ်ဘူး။ဘာအဓိပ္ပာယ်မှမရှိ။ ရမ်းလုပ်နေတဲ့ ဝါဒ အစရှိသဖြင့် နာမည်တွေ တပ်ပြီး အစုလိုက်အပြုံလိုက်ဝေဖန်ခံရပါတော့တယ်။ အဲသည့်တော့ ဒါဒါဝါဒီတွေ ဘာပြန်လုပ်ခဲ့သလဲ။ ဘာမှပြန်မပြောခဲ့ပါဘူး။ သူတို့ကို ဝေဖန်နေတဲ့သူတွေခမျာ ဘာပြန်ပြောလို့ ပြောရမယ်မှန်းမသိ ဖြစ်ခဲ့ကြတယ်။ အကောင်းမြင်တဲ့သူတွေကတော့ ဒါဒါဝါဒဟာ အာရုံခံစားနိုင်စွမ်းနဲ့ သက်ဆိုင်တယ်လို့ ပြောပါတယ်။ ဒါဒါဝါဒဟာ မော်ဒန်အနုပညာအယူအဆတွေအပေါ်ကိုလည်း တဖြည်းဖြည်းနဲ့ လွှမ်းမိုးလာတာကိုတွေ့ရတယ်။ ယနေ့ခေတ် စိတ်ပျက်မှု မုန်းတီးမှုတွေကို ကဗျာအဖြစ် ဖွင့်ချနေတာဟာ ဒါဒါဝါဒရဲ့  အကျိုးဆက်ပဲဖြစ်ပါတယ်။ ဒါဒါဝါဒီတွေရဲ့ ထူးခြားချက်ကတော့ သူတို့ရဲ့  အနုပညာဖန်တီးမှုဟာ လူတွေကို ကတုန်ကယင်ခံစားမှု ဖြစ်အောင် ချန်ထားခဲ့တာပါပဲ။ အခုချိန် ပို့စ်မော်ဒန်ထိအောင် ဒါဒါဝါဒက
မြားဦးတည်ထားနိုင်ခဲ့တာကို တွေ့ရတော့ ဒါဒါဝါဒဟာ (အရင်တုန်းက အသိအမှတ်ပြုမခံရရင်တောင်မှ) အသိအမှတ်ပြုရမယ့် အနုပညာဝါဒ ဖြစ်နေတာကိုတော့ ကျွန်တော်တို့ လက်ခံရပါလိမ့်မယ်။

ဒါဒါဝါဒပျောက်ကွယ်သွားခြင်း

ပထမကမ္ဘာစစ်အပြီး ဒါဒါဝါဒရဲ့ လှုပ်ရှားမှုဟာ တဖြည်းဖြည်းနဲ့ ကျဆင်းလာပြီး နောက်ပိုင်း သိသိသာသာ အားပျော့ကာ
ပျောက်ဆုံးသွားပါတော့တယ်။ သူတို့တွေအနေနဲ့ သူတို့ ခေတ်အခါတုန်းက မအောင်မြင်တဲ့ ဖန်တီးမှုတစ်ခုဖြစ်ခဲ့ပေမယ့် သူတို့ ဖန်တီးမှုတွေ သူတို့ရဲ့  စွန့်ဦးတီထွင်မှုတွေအတွက်တော့ ကျွန်တော်တို့ လေးစားကြမှာပါ။

ယနေ့ခေတ်ဒါဒါဝါဒကို လက်ခံထားတဲ့ flarf poetry

ယနေ့ခေတ်မှာ ဒါဒါဝါဒကို လက်ကိုင်ထားပြီး flarf poetry တွေ ပြုလုပ်ဖန်တီးကြပါတယ်။ သူတို့ အနေနဲ့ ယဉ်ကျေးမှုဘောင်ကို လွန်တဲ့
ဖန်တီးမှုတွေ ပြုလုပ်ကြပါတယ်။ အချို့ သော ဖန်တီးမှုတွေဟာ ကျွန်တော်တို့ မြန်မာနိုင်ငံယဉ်ကျေးမှုနဲ့ မကိုက်တဲ့အတွက် ပြည်သူလူထုကို ချပြလို့မရဘူးဖြစ်နေတယ်။ ဒါကတော့ ဒါဒါနဲ့ ပတ်သက်လို့ ကျွန်တော်သိသလောက်ပါ။ အနှစ်ချုပ်သဘောသာ ဖြစ်ပါတယ်။ အကယ်၍များ အကျယ်လေ့လာချင်ရင် wiki မှာဆက်လက်လေ့လာဖို့ အကြံပြုပါရစေ။ အားလုံးကိုကျေးဇူးတင်ပါတယ်။

reference:
Wiki- Dadaism
unknown source
Tar Yar Min Wai (ပြိုင်မြင်းတို့၏ခွာသံ)


++++++++++++++++++++++++++++++++++++++++++++++++++++++++++++++
                                 
                                                                                                              DOWNLOAD ZONE



ခရမ်းရိပ်အနုပညာမဂ္ဂဇင်း ( မေလ ) အား pdf download ရယူလိုပါက အောက်ပါလင့်ခ်မှာယူနိုင်ပါတယ်

ခရမ်းရိပ်အနုပညာမဂ္ဂဇင်း ( မေလ)

++++++++++++++++++++++++++++++++++++++++++++++++++++++++++++++

 ခရမ်းရိပ်မဂ္ဂဇင်း စီစဉ်သူများ -


* ဆူးခက်မင်း
* မင်းလုလင်
* မောင်မိုးချို
* သူရဿဝါ
* အောင်မျိုးခန့် ( မော်ကျွန်း )
* ကြယ်စစ်သည်
* နေပိုင်
* ဟိဏ်းဝေ
* ကြည်သက်ဟန်


( ခရမ်းရိပ်ဖြစ်မြောက်ရေးအတွက် အဖက်ဖက်မှ ပါဝင်အားဖြည့်သူများအား အထူးကျေးဇူးတင်ရှိပါတယ် )


ခရမ်းရိပ်မဂ္ဂဇင်းသို့ စာမူများပေးပို့လိုပါက -
purpleshademagazine@gmail.com သို့လိပ်မူ၍ ပေးပို့နိင်ပါတယ် ။


- လေးစားစွာဖြင့်
- ခရမ်းရိပ် အနုပညာ





0 comments:

Post a Comment